Pojkiyon bʼa 1983. Jelni lek kʼiyon jani, pe yajni ay kiʼoj 10 jabʼil, kʼe kabʼ tsatsal syajal bʼa spetsanil ja jkwerpo. Junuk chabʼ jabʼil tsaʼan, jun saʼan sakbʼel kʼeyon sok mixani xbʼobʼ nijkukon. Ama jkʼulan pwersa snijkesel ja koki, mixani ay yip. Man ja bʼa kʼakʼu jaw, mixani xbʼobʼ bʼejyukon. Ja chameli cha mixani ya kʼikon. Ja yuja jniwanili jachni jastal bʼa jun yal untik.

Ayxani junuk ixaw lutanon bʼa jnaj yajni yulatayotikone jujuntik ixuke taʼumantiʼe bʼa Jyoba. Ja jas kʼajyel wa xkʼulani, wa xnakʼa jbʼaj ja yajni wala ulatajitikoni, pe ja bʼa kʼakʼu jaw kaʼakan ja taʼumantiʼ bʼa Jyoba oj loʼilanuke jmok. Yajni wane xcholjel kʼabʼ sbʼaja Kʼachinubʼi, juljkʼujol ja yajni ayto kiʼoj joʼe jabʼil, jun misionero sbʼiʼil Jethro, bʼa ti kulan bʼa Surinam wa xjak jun ekʼele ja bʼa jlugartikoni sok wa xyayi estudio bʼa Biblia ja jtati. Jelni lek kila ja Jethro yujni jel tsamal sjeʼa ja smodo jmok. Chomajkil, ay ekʼele ja jtataweloʼik wa xyiʼajone och ja bʼa stsomjele wa skʼulane ja Taʼumantiʼik ja bʼa jlugartikoni. Ja yuj yajni ja Florence, june ja bʼa ixuke yulatayone ja bʼa kʼakʼu jaw, sjobʼoki ta wa xkʼana oj naʼ mas sbʼaja Biblia, kalayabʼ wan.

Ja Florence kumxi soka statami, ja Justus, sok kʼe yaweki jun estudio bʼa Biblia. Yuja yilawe mi xnaʼa skʼumajel juʼun, ja yuj sjeʼaweki. Yajni ekʼ ja tyempo, wanxani xkʼumaxikuj bʼa mixani maʼ wa skoltayon. Jun kʼakʼu yalawe kabʼ bʼa tixani wane jekjel oj waj xchol-e bʼa Surinam. Ja mas triste, mixani maʼ kan ja bʼa Orealla bʼa oj yaweki estudio bʼa Biblia. Pe jelni gustoʼaxiyon yajni kila ja Jyoba mini chʼay skʼujol bʼa keʼna.

Tʼusan tsaʼan, jul ja bʼa Orealla jun precursor sbʼiʼil Floyd. Jun kʼakʼu jak yulatayon yajni wan xcholjel bʼa naʼits naʼits. Yajni skʼapaki jun estudio bʼa Biblia, tseniyon, «¿Jas yuj wala tseni?», sjobʼoki. Kalayabʼ jkʼulantani estudiar ja poyeto ¿Jas maʼ wa skʼana oj jkʼuluktik ja Dyosi? sok kʼetani jkʼul estudiar ja libro El conocimiento que lleva a vida eterna. * Chomajkil, jcholo yabʼ jas yuj kaʼunejkan skʼulajel estudiar. Jkʼulan Estudiar soka Floyd ja janekʼto wa skʼulankuj palta ja libro Conocimiento, pe anto ja yeʼn cha jekji oj waj koltanuk bʼa pilan lugar. Yajkʼachil ekʼele, mixani maʼ kan bʼa oj sjeki.

 Pe ja bʼa 2004 julye ja bʼa Orealla ja Granville sok ja Joshua, bʼa precursore especial. Wane xcholjel bʼa naʼits naʼits, sok jach staʼawone. Yajni sjobʼoweki ta wa xkʼana jun estudio bʼa Biblia, tseniyon. Jkʼana yile ta oj yaweki estudio ja libro Conocimiento man bʼa skʼeʼulabʼil. Wani xkʼana oj kil ta junxta oj sjeʼeki ja jastalni sjeʼaweki ja matik bʼajtani. Ja Granville yalakabʼi ja bʼi bʼa jlugari wa xkʼulaxi tsomjelik. Ama tʼusan mi ayxani lajune jabʼil ja mi la elyon ja bʼa jnaji, wani xkʼana oj wajkon. Ja yuj ja Granville ekʼ yiʼon sok yiʼajon och ja bʼa naʼits bʼa tsomjelal bʼa jun siya bʼa rweda.

Yajni ekʼ tʼusan tyempo, ja Granville stsatsankʼujolanon bʼa oj jchʼik ja jbʼiʼil ja bʼa Eskwela bʼa Matik wa xCholo. Yalakabʼi: «Ama mini lek ayuka, pe wani xbʼobʼ kʼumanan. Bʼa jun kʼakʼu ojni wa ekʼuk juna loʼil bʼa spetsanil ixuk winik. Ti oja wila». Ja jas yalakabʼi stsatsankʼujolanon sok ya jipjkʼujol.

Kʼeni elkon xcholjel soka yeʼn, pe jitsan ja bʼejik ja bʼa jlugari mini lekuk ay bʼa oj wajkonsok siya bʼa rweda. Ja yuj jkʼanayi mas lek ayiʼon och bʼa jun karretiya, sok jelni lek wajkujtikon. Ja bʼa abril bʼa 2005 kiʼaj jaʼ. Tʼusan tsaʼan, ja hermanoʼik sjeʼaweki jastal stalnajel ja juʼunik ja bʼa kongregasyon sok ja sonido ja bʼa Naʼits bʼa Tsomjelal.

Pe ja mas triste, ja bʼa 2007, ja jtati ekʼ sbʼaj jun desgrasya bʼa jun barko sok chami. Ja jpamilya jelni yaj yabʼye. Ja Granville wa skʼulan orasyon jmoktikon sok wa stsatsankʼujolanotikon soka Biblia. Chabʼ jabʼil mas tsaʼan, cha ekʼ jbʼajtikon pilan desgrasya: ja Granville chami bʼa jun desgrasya bʼa jun barko.

Ja chʼin jkongregasyontikon jelni triste kani, mixani jun ansyano kani kechanxtani kan jun skoltuman ansyano. Ja cham ja Granville jelni yaj kabʼi, pes kʼotni jun kamigo bʼa jel xyajtay bʼa tolabida wa skoltayon sbʼaja jastal wa xkila jbʼaj soka Dyosi sok ja bʼa jsakʼanili. Ja bʼajtan tsomjelal jkʼulantikon tsaʼan ja yajni chami, keʼnani jkʼuman ja parrapoʼik ja bʼa sPaklajel Ja Juʼun Cholumani. Bʼobʼni jkʼumuk chabʼ parrapo, pe anto tixa kʼe okon. Tʼilani koyon ja bʼa plataporma yujni mi la chʼajbʼajiyon.

Masxani lek kabʼ och ajyukon yajni jujuntik hermanoʼik bʼa pilan kongregasyon jakye bʼa oj skoltayotikon ja bʼa Orealla. Chomajkil, ja Naʼits Betel sjeka jun precursor especial sbʼiʼil Kojo. Jelni gustoʼaxiyon yuja jnan sok ja kijtsʼin kʼe skʼul-e estudiar ja Biblia sok yiʼaje jaʼ. Ja bʼa marzo bʼa 2015, tʼojiyon skoltuman ansyano. Sok mini ekʼ mas tyempo ka ekʼuk ja bʼajtan jloʼil bʼa spetsanil ixuk winik. Ja kʼakʼu jaw tseniyon ja yajni juljkʼujol sok okʼyon bʼa yajel tsʼakatal yuja jas yalunejkabʼ ja Granville jabʼilik bʼajtanto: «Bʼa jun kʼakʼu ojni wa ekʼuk juna loʼil bʼa spetsanil ixuk winik. Ti oja wila».

Stsʼakatal yuja programaʼik ja JW Broadcasting^®, jnaʼunej sbʼaj hermanoʼik bʼa juntikxtani ja sakʼanile jastal ja keʼn. Ama mini lek ayuke, konganani wane yaʼteltajel ja Jyoba sok gustoʼaye. Pe ja keʼn, cha wani xbʼobʼ jkʼul jujuntik jasunuk. Ja skʼanjel kiʼoj bʼa yajelyi ja Jyoba spetsanil ja kip ja janekʼni wa xbʼobʼkuji skoltayon bʼa oj ochkon precursor regular. Mini ja wa xmajlay ja bʼa septiembre bʼa 2019 tʼojiyon ansyano ja bʼa jkongregasyontikon, bʼa kechan ay junuk 40 cholumanik.

Jelni wa xkayile tsʼakatal ja hermanoʼik sok hermanaʼik bʼa sjeʼaweki ja smeranil sok skoltayone bʼa yaʼteltajel ja Jyoba. Pe bʼa spetsanil wani xkayile tsʼakatal yujni ja Jyoba mi chʼayeluk skʼujol bʼa keʼna.