Ja Hulda staʼa ja jas jel skʼana
LEKBʼI wajukaxta ja bʼa chʼin isla bʼa Sangir Besar (Indonesia) jujuntik jabʼil bʼajtanto, bʼobʼta ojni ataʼ oxe kermanatik ja bʼa playa. Ama wa xnaji sbʼaje ja bʼa isla yuja wa skoltaye ja kristyano bʼa yabʼjel stojol ja Biblia, pe ja jas wa skʼulane ja bʼa playa mini jaʼuk ja xcholjeli. Anto, ¿jasa wa skʼulane?
Isla bʼa Sangir Besar (ja bʼa norte bʼa Indonesia)
Bʼajtan, wa xwajye bʼa mar bʼa slejel niwak tonik, tʼusan meyuk ja sniwanil jun pelota bʼa fútbol, sok tixa wa stsomoweʼa. Tsaʼan, tixa wa xkulaniye sok wa x-och spoje sok jun martillo man wa xkan ja xchʼinil jastal jun nolobʼ. Tixa wa xcha yawe ochuk ja yal toniki bʼa jun balde sok wa xyiʼaje och bʼa snaje bʼa wa xkʼeye jujuntik escalera. Ti wa snolowe ja yal toniki bʼa jun niwan bolsa. Sok tsaʼan, jujuntik karro wa x-ekʼ yiʼe ja bolsaʼik jaw, sok wa xyawe makunuk ja toniki bʼa stojbʼesel karreterraʼik.
Ja Hulda, wan stsomjel ton
June ja hermanaʼik jaw sbʼiʼil Hulda. Ja yeʼn wani xbʼobʼ aʼtijuk mas yuja tuki. Ja janekʼ wa xtupji soka toniki wa skoltay ja spamilya soka jastik wa xmakuniyujile. Pe ja yeʼn wanxani skʼana oj ya makunuk bʼa pilan jasunuk soka stakʼini: jun tablet bʼa oj bʼobʼ ochuk ja bʼa JW Library®. Ja Hulda wa snaʼa ke ja bideoʼik sok ja impormasyonik yiʼoj ja aplikasyoni ojni koltajuk bʼa mas oj snaʼ jastal oj xchole sok yabʼjel mas stojol ja Biblia.
Jun ixaw sok snalan, ja Hulda aʼtiji chabʼ ora ja bʼa saʼan sakbʼeli. Soka tonik spojo bʼobʼ sbʼut jun chʼin karro. ¡Man tsomxiyuj ja takʼin bʼa oj bʼobʼ sman jun tablet!
Ja Hulda ti yiʼoj ja stableti
Ja Hulda xcholo: «Ja smeranili jelni yajtik kanyon yuja spojel ja toniki. Pe yajni jmana ja tableti sok kila ke ojni bʼobʼ ka makunuk lek ja bʼa xcholjeli sok mas wego xchapjel jbʼaj ja bʼa reunioniki, wegoni chʼay jkʼujol ja syajal ja jkuerpo». Cha yala ke ja tableti koltajiyuj ja yajni kʼe ja covid, yajni ja aʼtelik bʼa kongregasyoni ti wa xkʼulaxi bʼa bideollamadaʼik. ¡Jelni wa xya gustoʼaxukotik ke ja Hulda bʼobʼ staʼ ja jas jel skʼana!
