1, 2. ¿Jas yuj oj bʼobʼ kabʼtik ke ja Jyoba mi sjakʼa ja korasyontiki?

 «TAʼA tsamal gustoʼil bʼa Jyoba, sok ja yeʼn oj yawi ja jastik wa skʼana jawa kʼujol» (Sal. 37:4). ¡Juni tsamal smajlajel! Pe ¿wan maʼ stojolan ke ja Jyoba wegoxta oj sjakʼ kitik ja jastik wa xkʼanatikyiʼi? Jelni lek ja oj kaʼ jbʼajtik ja sjobʼjel jaw. ¿Jas yuj? Pensaraʼan sbʼaja jas ti nochani. Jun hermana soltera wa xyala yabʼ ja Jyoba ke wa skʼana oj wajuk ja bʼa Eskuela bʼa Cholumanik sbʼaja sGobyerno ja Dyosi, pe wa x-ekʼ ja jabʼiliki sok mi xjul ja slokjelali. Jun kerem bʼa jel maloʼay wa skʼanayi ja Jyoba ke atojbʼuk bʼa jachuk oj bʼobʼ koltanuk mas ja bʼa kongregasyoni; pe mini xtojbʼi. Jun nantatal wa xyaweyi orasyon ja Jyoba bʼa jachuk ja skeremi mi oj yakan ja smeranili, pe ja yeʼn stsaʼa oj yakan.

² Bʼobʼta ay jas akʼanunejyi ja Jyoba pe me x-ajiwi. Bʼobʼta ja jaw wa xya pensaraʼuk ke ja Jyoba wa sjakʼayi ja yorasyon ja tuki, pe miyuk jawa bʼaj, ma ja yeʼn me xyawi ja jasa kʼanayi yuj ay jas mi lek akʼulunej. Jun hermana sbʼiʼil Janice jachni yabʼ jastal jaw. b Ja yeʼn sok ja statami skʼanaweyi ja Jyoba ke oj wajuke bʼa Betel. Ja Janice wa xyala: «Jkʼuʼani lek ke mini oj albʼuk bʼa oj payjukotikon». Pe ekʼ ja ixawiki sok ja jabʼiliki sok mini jul ja lokjelal jaw. Ja yeʼn wa xcholo: «Tristeni ajyiyon sok jel tuk ajyiyon kabʼi. Wa xjobʼo jbʼaj jasa mi lek jkʼulunejyi ja Jyoba. Ja bʼa korasyoni kalni yabʼ ja jasa mero wa xkʼanaʼi, sok mini xkabʼ stojol jas yuj mi sjakʼaki».

3. ¿Jasa oj paklaytik ja bʼa artikulo it?

 ³ Bʼobʼta ayni ekʼele oj jobʼ jbʼajtik ta ja Jyoba wa smaklay ja korasyontiki. Jujuntik tojil yaʼtijumik ja bʼa najate sjobʼo sbʼaje junxta jastal jaw (Job 30:20; Sal. 22:2; Hab. 1:2). ¿Jas oj bʼobʼ yaʼa kʼuʼuk ke ja Jyoba wa sjakʼa jawa worasyoniki? (Sal. 65:2). Bʼa sjakʼjel ja sjobʼjel jaw, bʼajtan la jpaklaytik ja jastik it: 1) jasa oj bʼobʼ jmajlaytik bʼa Jyoba, 2) jasa wa smajlay bʼa keʼntik ja Jyoba sok 3) jas yuj bʼobʼta tʼilani oj tukbʼestik jujuntik ja bʼa jastik wa xkʼanatiki.

4. Jastalni wa xyala ja Jeremías 29:​12, ¿jasa skʼapunejkitik ja Jyoba?

⁴ Ja Jyoba wa skʼapa ke oj smaklay ja korasyontiki (kʼuman ja Jeremías 29:12). Ja jDyostiki wa syajtay ja yaʼtijumik sok tolabida wa smaklay ja yorasyone (Sal. 10:17; 37:28). Pe ja jaw mi wa stojolan ke oj yakitik spetsanil ja jas wa xkʼanatiki. Bʼobʼta tʼilani oj majlaytik man bʼa yajkʼachil luʼum bʼa jachuk ja Jyoba oj yakitik jujuntik ja jastik wa xkʼanatiki.

5. ¿Jasa wa xyila ja Jyoba ja yajni wa smaklay ja korasyontiki?

⁵ Ja Jyoba jani wa xyila ja bʼa jas wa skʼana ja yajni wa sjakʼa ja korasyontiki (Is. 55:​8, 9). Ja jas wa skʼana jani ke ja Luʼumi oj bʼutʼ kristyanoʼik ke oj skʼuluke aseptar ja sgobyerno sok gusto oj yaʼteltaye sok tsoman. Pe ja Satanás yalunej ke ja kristyano masni lek oj wajyujile ta yeʼn yaʼa sbʼaje mandar (Gén. 3:​1-5). Bʼa sjejel ke ja jas yala ja Dyablo juni abʼal, ja Jyoba yaʼakan ke ja kristyano yeʼn oj yaʼ sbʼaje mandar, sok ja jaw kechantani yiʼunejan ja wokolik wa xkilatik ja bʼa jtyempotiki (Ecl. 8:9). Wa xnaʼatik ke ja Jyoba mini spetsanil oj chʼak stojbʼes ja wokolik jaw ja bʼa jtyempotiki. Lekbʼi skʼulan, jujuntik bʼobʼta oj spensaraʼuke ke ja kristyano lekni oj wajyujile ja oj yaʼ sbʼaje mandar sok stojbʼesel ja wokolik ja bʼa luʼumkʼinali.

6. ¿Jas yuj tʼilan oj kʼuʼuktik ke ja Jyoba tolabida ja wa xnikji bʼa ay jas oj skʼuluk yuja yajalkʼujol sok ja bʼa toji?

⁶ Ja Jyoba wani xbʼobʼ sjakʼ ja junxta orasyon bʼa tuktukil modo. Jun sjejel, yajni ja rey Ezequías jel ipaxi ja xchameli, spatayi skʼujol ja Jyoba ke atojbʼesjuk, sok ja Jyoba skʼulaniʼa (2 Rey. 20:​1-6). Pe yajni ja jekabʼanum Pablo spatayi skʼujol ja Jyoba ke aʼajuk elyi ‹jun kʼiʼix ja bʼa sbʼakʼteli›, bʼa bʼobʼta jun chamel yiʼoj, ja Jyoba mini ya elyi (2 Cor. 12:​7-9). La juljkʼujoltik ja jas ekʼ sbʼaj ja Santiago sok ja Pedro. Ja rey Herodes wa skʼana oj smil ja yeʼnle. Ama ja kongregasyon skʼanawe bʼa orasyon yuja Pedro sok bʼobʼta cha jachuk ja bʼa Santiago, pe ja Santiago milji, jaxa Pedro kan sakʼan yuj jun milagro bʼa Jyoba (Hech. 12:​1-11). Bʼobʼta wa xjobʼo jbʼajtik jas yuj ja Jyoba skoltay june sok miyuk ja pilani. Ama ja Biblia mini wa xcholo, wani xbʼobʼ ajyukotik seguro ke ja Jyoba «nunka wa skʼulan bʼa jas mi tojuk», jastalni wa syajtay ja Pedro cha jachni ja Santiago (Deut. 32:4; Apoc. 21:14). c Bʼobʼta ja korasyontiki mini wa xjakʼji ja jastal wa xmajlaytik. Pe mini xkalatik abʼal ja bʼa jastal wa sjakʼa ja Jyoba yujni wa xkʼuʼantik lek ke tolabida ja wa xnikjiyuj ja yajalkʼujoli bʼa ay jas oj skʼuluk sok ja bʼa toji (Job 33:13).

7. ¿Bʼa jasa mi xkʼulantik sok jas yuj?

⁷ Mini wa xkatik slaj sbʼaj ja jas wa x-ekʼ jbʼajtik soka tuk. Jun sjejel, bʼobʼta ay  jkʼanatikyi jun jasunuk ja bʼa mero wa xkʼanatikyi ja Jyoba sok mini yakitik. Mas tsaʼan, kabʼtik ke ayni maʼ skʼana ja jas jkʼanatiki sok ja yeʼn ajiniyi. Jani jaw ja jas ekʼ sbʼaj jun hermana sbʼiʼil Anna. Ja statami, ja Matthew, ayiʼoj cáncer, sok skʼana bʼa orasyon bʼa oj tojbʼuk. Jaxa bʼa tyempo jaw, chabʼ hermana ke ayxa skʼujole cha ayiʼoje cáncer, ja Anna jelni skʼana bʼa orasyon bʼa yoxwanile. Ja chabʼ hermana tojbʼiye, pe cham ja Matthew. Ja sbʼajtanili, ja Anna wa sjobʼo sbʼaj ta ja Jyoba ayni jas skʼulan bʼa oj tojbʼuke ja hermanaʼik jaw, sok ta jachuk, jas yuj mi cha jach ekʼ sbʼaj ja statami. Mini xnaʼatik jas yuj ja hermanaʼiki tojbʼiye, pe ayni jas wa xnaʼatik: ke ja Jyoba ojni ya el spetsanil ja jas wa xya wokolanukotiki sok wani skʼana oj ya sakʼwuk ja matik chamelkujtiki (Job 14:15).

8. a) Jastalni wa xyala ja Isaías 43:​2, ¿jasa wa skʼulan ja Jyoba bʼa oj skoltayotik? b) ¿Jastal wa skoltayotik ja orasyon ja yajni wan ekʼel jbʼajtik tsatsal wokolik? (Kʼela ja bideo Ja orasyoni wa skoltayotik bʼa mi oj el jganatik).

⁸ Ja Jyoba tolabida oj skoltayotik. Ja jTatik Jyoba wa syajtayotik sok mini lek wa xyila ja wa xkiʼajtik wokoli (Is. 63:9). Pe mini wa xya elkotik libre bʼa spetsanil wokolik, bʼa wa xya slaj ja Biblia yok jaʼik sok kʼakʼ (kʼuman ja Isaías 43:2). Ja jas wa skʼapakitiki ojni skoltayotik bʼa oj ekujtik chikan jas prueba sok mini oj yakan bʼa ay jas oj yixtalaʼukotik bʼa tolabida. Chomajkil, ja Jyoba wa xyaʼakitik ja yipi bʼa oj skoltayotik oj kuchkujtik (Luc. 11:13; Filip. 4:13). Ja yuj wani xbʼobʼ ajyukotik seguro ke tolabida oj ajyukujtik ja jas wa xmakunikujtik bʼa oj kuchkujtik sok ajyel toj. d

9. ¿Jastal wa xchiktes ja Santiago 1:​6, 7 ja stʼilanil sjipjel jkʼujoltik ke ja Jyoba oj skoltayotik?

⁹ Ja Jyoba wa smajlay ke oj jipjkʼujoltik bʼa yeʼna (Heb. 11:6). Bʼobʼta ayni ekʼele oj kiltik ke ja pruebaʼiki jelni wokol ke oj kʼe jkʼultik dudar ta ja Jyoba oj skoltayotik. Pe ja Biblia wa xyalakabʼtik ke soka yip ja Dyosi ‹wa xbʼobʼ kʼekotik bʼa jun barda› (Sal. 18:29). Ja yuj mokni katikan oj skʼulukotik ganar ja dudaʼiki. Jaʼuktoma, la katikyi orasyon sok spetsanil jkʼujoltik bʼa sjejel ay kiʼojtik skʼuʼajel sok sjipjel jkʼujoltik ke ja Jyoba ojni sjakʼ ja korasyontiki (kʼuman ja Santiago 1:​6, 7).

10. Aʼa jun sjejel bʼa wa xchiktes jasa oj kʼuluktik ja keʼntik tsaʼan yajni katiktayi orasyon.

¹⁰ Ja Jyoba wa smajlay ke yajni katiktayi orasyon oj kʼuluktik ja jas wa xkan bʼa keʼntik. La jpensaraʼuktik bʼa jun hermano ke wa skʼana oj wajuk ja bʼa asamblea bʼa oxe kʼakʼu sok skʼanayi ja Jyoba ke akoltajuk bʼa oj ajukyi permiso yuja spatroni. ¿Jasa oj bʼobʼ skʼuluk ja Jyoba bʼa oj sjakʼ ja orasyon jaw? Bʼobʼta ojni skoltay ja hermano bʼa mi oj xiwuk bʼa oj loʼilanuksok ja spatroni. Pe ja hermano tʼilani oj waj loʼilanuksok, sok bʼobʼta tʼilani jitsan ekʼele oj skʼuluk. Bʼobʼta cha tʼilani oj stukbʼes ja sturno sok jun smoj aʼtel. Sok ta yila stʼilanil, ojni bʼobʼ yalyabʼ ja spatron ke ti mi xtupji ja bʼa kʼakʼujik jawi.

11. ¿Jas yuj tʼilan tikʼan oj katikyi orasyon?

¹¹ Ja Jyoba wa smajlay ke la katikyi orasyon tikʼanxta sbʼaja jas wa xcham jkʼujoltiki (1 Tes. 5:17). Ja Jesús yala ke jujuntik ja bʼa jas wa xkʼanatiki mini wego oj jakʼjukitik (Luc. 11:9). ¡Ja yuj mokni el jganatik! La jpatikyi skʼujol ja  Dyos sok tikʼanxta (Luc. 18:​1-7). Yajni tikʼanxta wa xkatikyi orasyon sbʼa jun jasunuk, wanotik sjejelyi ja Jyoba ke ja jasa wa xkʼanatiki mini ekʼum bʼej ita sok wani xkʼuʼantik ke ja yeʼn ojni bʼobʼ skoltayotik.

12. a) ¿Jas oj bʼobʼ jobʼ jbʼajtik, sok jas yuj? b) ¿Jasa tʼilan oj kaʼ tʼabʼan jkʼujoltik bʼa oj sjeʼ ke ja korasyontik wala kiswanitik? (Cha kʼela ja recuadro « ¿Wan maʼ xchiktes ja jastik wa xkʼana ke wa xkisa ja Jyoba?»).

¹² Ta mi x-ajikitik ja jas jkʼanunejtikyi ja Jyoba, ojni bʼobʼ kaʼ jbʼajtik oxe sjobʼjel. Ja bʼajtani ja it «Ja jas wanon skʼanjeli, ¿jani maʼ ja mas leka?». Ja keʼntiki wani xkʼuʼantik ke wa xnaʼatik ja jas mas lek bʼa keʼntik. Pe bʼobʼta ja jasa wa xkʼanatiki mini jaʼuk ja mas lek ja yajni x-ekʼ ja tyempo. Bʼobʼta wantik yajelyi orasyon bʼa oj tojbʼuk jun wokol ja bʼa jastal wa xkʼanatik ja keʼntik, pe bʼobʼta ayni jun modo bʼa mas lek oj tojbʼuk. Sok bʼobʼta jujuntik ja bʼa jas wa xkʼanatiki mini akuerdoʼayuk soka jas wa skʼana ja Jyoba (1 Juan 5:14). Jun sjejel, la jpensaraʼuktik ja nantatalik jtaʼatik tiʼal ja bʼa parrapo 1. Skʼanaweyi ja Jyoba ke ayakan ke ja skereme ti oj ajyuk ja bʼa smeranil. Ja jaw lajansok lekniʼa. Pe ja smeranili, ja Jyoba mini maʼ wa stʼena bʼa oj aʼteltajuk. Ja yeʼn wa skʼana, cha jachuk ja kuntikiltiki, la katikyi stoyjel yujni keʼn jach jtsaʼunejtik (Deut. 10:​12, 13; 30:​19, 20). Anto, ¿jasa oj bʼobʼ skʼaneyi ja Jyoba ja nantatalik jaw? Ke akoltajuke bʼa oj kʼot man bʼa skʼujol ja skereme bʼa jachuk oj syajtay ja Jyoba sok oj skʼan oj yamigoʼuk (Prov. 22:6; Efes. 6:4).

13. Jastalni wa xyala ja Hebreos 4:​16, ¿bʼa jas tyempoʼil wa skoltayotik ja Jyoba?

 ¹³ Ja xchabʼil sjobʼjeli ja it «¿Wan maʼ xyila ke ja Jyoba jani ja styempoʼil bʼa oj yaki ja jas wa xkʼanayi?». Bʼobʼta wa xpensarantik ke wa xkʼanatik wego oj jakʼjukitik ja korasyontiki. Pe ja smeranili, ja Jyoba wa snaʼa ja bʼa styempoʼil mas lek oj skoltayotik (kʼuman ja Hebreos 4:16). Ta ja Jyoba mi wegoxta yakitik ja jas wa xkʼanatikyi, bʼobʼta wa xpensarantik ke ja sjakʼjeli «Miyuk». Pe bʼobʼta ja sjakʼjeli «Mitotʼan». La cha kumxukotik ja sjejel ja bʼa kerem ke wa xyayi orasyon bʼa oj tojbʼuk. Ta ja Jyoba ya makunuk jun milagro bʼa stojbʼesel, ja Satanás ojni bʼobʼ yal wanto yaʼteltajel ja Jyoba kechanta yuja tojbʼi (Job 1:​9-11; 2:4). Pe ja smeranili, ja Jyoba spilunejxa ja styempoʼil bʼa oj xchʼay spetsanil ja chameliki (Is. 33:24; Apoc. 21:​3, 4). Ja yuj ja wego mokni jmajlaytik ke ja Jyoba oj ya makunuk milagroʼik bʼa stojbʼesel ja chameliki. Anto, ¿jas oj bʼobʼ skʼanyi ja Jyoba ja kerem it? Ke aʼajukyi ja ipal sok ja lamanil ke wa xmakuniyuj bʼa oj yaʼteltay toj lek ja Dyos anima yuja xchameli (Sal. 29:11).

14. ¿Jas wa sjeʼakitik ja sjejel bʼa Janice?

¹⁴ ¿Wan maʼ xjula kʼujol ja Janice, ja hermana ke yayi orasyon bʼa oj wajuk bʼa Betel? Yiʼajyuj joʼe jabʼil yabʼjel stojol jasa skʼulunej ja Jyoba bʼa sjakʼjel ja yorasyoni. Ja yeʼn wa xcholo: «Ja bʼa tyempo jaw, ja Jyoba xchapawon sok skoltayon bʼa stojbʼesel mas ja jmodoʼiki. Jun sjejel, wani xmakunikuj oj jipjkʼujol mas bʼa Jyoba, stojbʼesel mas ja jastal wa xkʼulan estudiar sok yabʼjel stojol ke ja gustoʼili mini jaʼuk ti chʼikan ja bʼa jas wa x-ekʼ jbʼajtik». Mas tsaʼan, ja Janice sok ja statami lokjiye jastal biajante. Ja yeʼn wa  xjul skʼujol: «Ja smeranili ja Jyoba sjakʼani ja korasyoniki, pe mini jaʼuk ja jastal wa xmajlay. Yiʼajnikuj tyempo yiljel ke ja sjakʼjel jastal yakiʼi jelni tsamal. Jelni xkayi tsʼakatal yuja yaʼakan ke oj kabʼ ja syajal kʼujol sok ja lekil skʼujoli».

15. ¿Jas yuj ayni ekʼele lekni ke ja korasyontik mi bʼa junta jasunuk oj kʼantik? (Cha kʼela ja potoʼik).

¹⁵ Ja yoxil sjobʼjeli ja it «¿Mi maʼ kechanta bʼa jun jasunuk ja jas wanon skʼanjeli?». Ama lekni kechanta oj kʼantik bʼa jun jasunuk ja bʼa korasyontiki, pe ayni ekʼele masni lek mok jkʼuluktik, bʼa jachuk oj bʼobʼ kiltik jasa wa skʼana oj skʼuluk ja Jyoba bʼa keʼntik. La jpensaraʼuktik ja bʼa hermana soltera ke yayi orasyon bʼa oj wajuk ja bʼa Eskuela bʼa Cholumanik sbʼaja sGobyerno ja Dyosi. Ja yeʼn wa skʼana oj wajuk ja bʼa eskuela it bʼa oj koltanuk ja bʼa ay mas nesesida. Ama mi xyaʼakan yajelyi orasyon sbʼaja it, ¿jasa oj cha bʼobʼ skʼanyi ja Jyoba? Ke akoltajuk bʼa oj staʼ tuktukil modoʼik bʼa oj ya kʼiʼuk mas ja bʼa yaʼteltajel ja Dyosi (Hech. 16:​9, 10). Tsaʼan yajni yatayi orasyon, ojni bʼobʼ sjobʼyi ja biajante ta ay bʼa wa xkʼanji mas precursorik bʼa jun kongregasyon bʼa mojan. Cha ojni bʼobʼ stsʼijbʼukyi jun karta ja Naʼits Betel bʼa oj snaʼ ta ay bʼa jun lugar wa xkʼanxi mas koltanel. e

16. ¿Jasa wa xbʼobʼ jkʼuʼuktik lek?

¹⁶ Jastalni jnebʼatik, wani xbʼobʼ jkʼuʼuktik lek ke ja Jyoba jani oj nikjukyuj ja yajalkʼujol bʼa oj sjakʼ ja korasyontik sok bʼa jun modo toj (Sal. 4:3; Is. 30:18). Bʼobʼta ayni ekʼele ja sjakʼjeli mini jaʼuk ja jastal wa xmajlaytik, pe ja yeʼn tolabida wa smaklay ja korasyontiki. Jel syajtayotik, sok nunka oj yaʼotikan (Sal. 9:10). Ja yuj «tolabida» la jipjkʼujoltik bʼa Jyoba sok sjamjelyi ja jkʼujoltik ja bʼa korasyontik (Sal. 62:8).