1. ¿Jastal yila ja jekabʼanum Pablo ja siervo ministerialik?

 JA SIERVO ministerialik wani skʼulane jun aʼtel jel tʼilan ja bʼa kongregasyoni. Chikani lek ke ja jekabʼanum Pablo jelni chʼaʼanyabʼal yila ja tojil winike it. Ja yuj, yajni stsʼijbʼanyi ja nochumanik Kristo bʼa Filipos, jatani sjekayi skoltanel ja siervo ministerialik sok ja ansyanoʼik (Filip. 1:1).

2. ¿Jastal wa xyabʼ ja Luis sbʼaja cholal yiʼoj jastal siervo ministerial?

² Jitsan hermanoʼik bʼa yiʼunejexa jaʼ wa xyabʼye stsamalil ja aʼtel bʼa siervo ministerial. Ama keremeto ma ayxa skʼujole. Jun sjejel, ja Devan ayiʼoj 18 jabʼil yajni och sievo ministerial. Pe jaxa Luis ayxa yiʼoj mas ja 50. Ja hermano it wa xcholo jastal wa xyabʼye: «Bʼa keʼna juni chaʼan cholal aʼtel jastal siervo ministerial, pe mastoni ja yajni wa xpensaraʼan ja bʼa yajtanel sjeʼunejki ja kongregasyon».

3. ¿Jastik sjobʼjelik oj katikyi sjakʼjel ja bʼa artikulo it?

³ Ta kʼotela jun hermano bʼa awiʼunejxa jaʼ sok mito siervo ministerialuka, ¿oj maʼ bʼobʼ ajyukawuj jastal akʼelsat? ¿Jasa oj snika bʼa oj wa ajyuk jastal akʼelsat? Sok ¿jastik rekisitoʼik bʼa Biblia tʼilan oj wa kʼotuk? Ja bʼa artikulo it oj katikyi sjakʼjel ja sjobʼjelik it. Pe bʼajtan oj paklaytik jasa wa skʼulan jun siervo ministerial.

¿JASA WA SKʼULAN JUN SIERVO MINISTERIAL?

4. ¿Jasa wa skʼulan jun siervo ministerial? (Cha kʼela ja poto).

⁴ Ja siervo ministerialik kʼotele winike bʼa yiʼunejexa jaʼ,  bʼa tsaʼubʼale yuja yip ja Dyos bʼa oj skoltaye ja ansyanoʼik bʼa oj skʼuluke tuktukil aʼtel jel tʼilan ja bʼa kongregasyon. Jujuntik yeʼnani wa xyilawe ke ja cholumanik oj ajyukyujile territorioʼik sok juʼunik ja bʼa xcholjeli. Jitsan wa xkoltaniye bʼa yajel ajyuk asyado sok stalnejel ja Naʼitsik bʼa Tsomjelal. Tuk wa xkoltaniye jastal akomodadorik ma ti wa x-ajyiye bʼa sonido ja bʼa reunionik. Jitsan ja bʼa aʼtelik it jel tʼilan, ja siervo ministerialik kʼoteleni winike bʼa lek wa xyila sbʼaje soka Dyos. Wa syajtaye ja Jyoba sok wa xyawe makunuk ja bʼa sakʼanile ja jastik yaʼunej kujlajuk ja Dyosi. Chomajkil, jelni syajtaye ja hermanoʼiki (Mat. 22:​37-39). ¿Jasa tʼilan oj skʼuluk jun hermano bʼa yiʼunejxa jaʼ bʼa oj kʼot siervo ministerial?

5. ¿Jastal oj bʼobʼa taʼ ja kʼelsat bʼa kʼotel siervo ministerial?

⁵ Ja Biblia wa xyala jasa rekisitoʼik bʼa oj kʼotan siervo ministerial (1 Tim. 3:​8-10, 12, 13). ¿Jastal oj bʼobʼa taʼ ja kʼelsat it? Skʼulajel estudiar ja rekisitoʼik jaw sok skʼujolajel bʼa oj wa kʼotuk. Pe tʼilani bʼajtan oja paklay jasa wa snikawa.

¿JASA OJ SNIKA BʼA OJ KʼOTAN SIERVO MINISTERIAL?

6. ¿Jasa oj snika bʼa oja waʼteltay ja hermanoʼiki? (Mateo 20:28; cha kʼela ja dibujo bʼa skʼeʼulabʼil).

⁶ La jpensaraʼuktik ja bʼa lekil sjejel kiʼojtik, ja Jesukristo. Ja yeʼn jani nikji yuja yajalkʼujol: ja yajalkʼujol yiʼoj sbʼaja stati sok sbʼaja kristyano. Sok ja yajalkʼujol jaw nikji bʼa jel oj skʼujoluk sok skʼulajel aʼtelik bʼa mi jel chaʼanyabʼaliluk sbʼaja tuki (kʼuman ja Mateo 20:28; Juan 13:​5, 14, 15). Ta ja weʼn cha wa snikawa ja yajalkʼujoli, ja Jyoba ojni ya koʼuka lekilal sok oj skoltaya bʼa oja taʼ jawa kʼelsat bʼa oj kʼotan siervo ministerial (1 Cor. 16:14; 1 Ped. 5:5).

7. ¿Jas yuj mini lekuk ke jun hermano oj skʼan oj kʼot siervo ministerial kechanta bʼa oj toyjuk?

⁷ Ja bʼa luʼumkʼinal it, jelni chaʼanyabʼal x-iljiye ja kristyanoʼik bʼa jel tʼilan xyaʼa sbʼaje. Pe ja bʼa xchonabʼil ja Jyoba mini jach wa x-ekʼi. Ja hermano bʼa jachni jastal Jesús, bʼa jani nikubʼal yuja yajalkʼujol, mini wa xkʼankʼuniyuj ajyelyuj ipal, cholal sbʼaja tuki ma jel tʼilan oj iljuk. Ta jun kristyano wa skʼana oj ajyukyuj jun  cholal ja bʼa kongregasyon, kechanta bʼa jel oj toyjuk, bʼobʼta mini oj skʼan oj skʼuluk jujuntik atʼelik mi jel chaʼanyabʼaliluk ke wa xmakuni bʼa stalnajel ja yal xchejik ja Jyoba. Bʼobʼta ojni spensaraʼuk ke jelni skoʼelal oj iljuk (Juan 10:12). Ja Jyoba mini oj ya koyi slekilal ja janekʼto wa skʼujolane ja kristyanoʼik bʼa jel niwan xyaʼa sbʼaje ma wa sleʼa slekilal bʼa yeʼna (1 Cor. 10:​24, 33; 13:​4, 5).

8. ¿Jasa yala yabʼ ja Jesús ja snebʼumaniki?

⁸ Bʼa jujuntik ekʼele, asta ja yamigoʼik ja Jesús skʼujolane bʼa stajel jujuntik cholal pe ja jasa wa xnikjiyeyuj mini stojoluk. Jani jaw ja jas ekʼ sbʼaje chawane ja bʼa snebʼumanik ja Jesús: ja Santiago sok ja Juan. Ja yeʼnle skʼanaweyi ja Jesús ke oj ajukyile jun cholal jel chaʼanyabʼal ja bʼa sGobyerno. Jaʼuktoma oj skʼul felicitar yuja jas wane skʼanjeli, ja Jesús yala yabʼ ja it ja 12 sjekabʼanumik: «Ja maʼ wa skʼana oj kʼotuk mas niwan bʼa weʼnlex tʼilan oj yaʼteltay ja tuki sok ja maʼ wa skʼana bʼajtan oj ajyuk bʼa weʼnlex tʼilan oj kʼot mosoʼal sbʼaja tuki» (Mar. 10:​35-37, 43, 44). Ja hermanoʼik bʼa wa skʼujolane bʼa oj ajyukyujile cholalik bʼa oj skoltaye ja tuki, jelni oj koltanuke ja bʼa kongregasyon (1 Tes. 2:8).

¿JASA OJ SKOLTAYA BʼA OJ WA TSATSBʼUK JA KʼANKʼUNELA WIʼOJ BʼA SKOLTAJEL JA TUKI?

9. ¿Jasa oj skoltaya bʼa oj wa tsatsbʼuk ja kʼankʼunela wiʼoj bʼa skoltajel ja tuki?

⁹ Seguro ke ja weʼn wani xa yajtay ja Jyoba sok waxa kʼana oja koltay ja hermanoʼik. Ama jachuk bʼobʼta mini ayuka wiʼoj ja kʼankʼunel bʼa skʼulajel ja aʼtel wa skʼulan jun siervo ministerial. ¿Jastal oj wa tsatsbʼuk ja kʼankʼunela wiʼoj bʼa skʼulajel mas ja bʼa kongregasyon? Ojni bʼobʼa pensaraʼuk ja bʼa gustoʼil wa xyaʼa skoltajel ja hermanoʼik. Jachni jastal yala Jesús: «Masni wa xyaʼa gustoʼil ja yajeli ke yuja oj ajukawiʼi» (Hech. 20:35). Yuja tolabida snocho ja rason it, jelni gusto ajyi yajni skoltay ja tuk. Sok jachni oj cha bʼobʼa wabʼ ja weʼn.

10. ¿Jastal xchiktes ja Jesús ke wa x-aji gustoʼaxuk skoltajel ja tuk? (Marcos 6:​31-34).

¹⁰ La ka juljkʼujoltik jun sjejel bʼa wa sjeʼa janekʼto gustoʼil yabʼ ja Jesús skoltajel ja tuk (kʼuman ja Marcos 6:​31-34). Bʼa jun ekʼele, yajni ja Jesús sok ja snebʼumanik jelxa yajtike, wajye bʼa jun najat lugar bʼa oj jijluke. Pe jun nole kristyano bʼajtanxani kʼotye bʼa oj smaklaye ja jas wa sjeʼa ja Jesús. Ja Jesús mixa oj bʼobʼ skiskan ajyi. Pes ja yeʼn sok ja smojiki ‹mixani x-ajyiyujile tyempo bʼa oj waʼuke›. Ja Jesús ojni bʼobʼ sjeyi june ma chabʼ smeranilik sok tsaʼan oj yakan bʼa ojxa wajuke. Pe yuja wa xnikji yuja yajalkʼujol «kʼe sjeyile jitsan jastik junuk». Sok yajni yaʼa sbʼaj kuenta, «ochta ja kʼaʼuji» (Mar. 6:35). Mini obligadoʼuk skʼulan, pes jani yuja «jelni snaʼa syajulal juntiro». Wani skʼana oj sjeyile jas yuj wa syajtaye. Jaʼi, jelni x-aji gustoʼaxuk skoltajel ja tuk.

11. ¿Bʼa jas modo skoltay ja Jesús ja matik wa xmaklajiyuji? (Cha kʼela ja dibujo).

¹¹ Yajni xcholo ja Jesús mini kechan waj skʼujol oj sjeyi ja kristyano. Cha skoltay ja bʼa jas wa xmakuniyujile. Yuj jun milagro ya jitsanbʼuk ja waʼelali sok tsaʼan yaʼakan ke ja snebʼumanik a-spile (Mar. 6:41). Jachuk sjeʼayile ja jas wa stojolan skoltajel ja tuki. Chomajkil, sjeʼayile ke koltanel ja bʼa jas wa xmakuniyujile, jastalni wa skʼulane ja siervo ministerialik, jelni tʼilan. ¡Pensaraʼan janekʼto gustoʼaxiye ja nebʼumanik! Bʼobʼni skoltaye ja Jesús spiljel ja waʼelalik «spetsanile chʼak  waʼuke sok bʼutʼel lek kanye» (Mar. 6:42). Ja smeranili, mini kechanuk ja ekʼele it ke ja Jesús yaʼa bʼajtan bʼej ja jas wa xmakuniyuj ja tuk. Snajtil ja janekʼ tyempo ajyi ja bʼa Luʼumi jani skoltay ja tuki (Mat. 4:23; 8:16). Ja Jesús jelni x-aji gustoʼaxuk sjejelyi ja tuki sok skoltajel ja bʼa jas wa xmakuniyujile. Cha jachni wa xbʼobʼa wabʼ ja weʼn: jelni oj gustoʼaxan ta puesto aya bʼa oja koltay ja tuk jastal siervo ministerial.

12. ¿Jas yuj mok jpensaraʼuktik ke mi jas wa xbʼobʼ jkʼuluktik ja bʼa kongregasyon?

¹² Pe ¿jaxa ta waxa wabʼ mi jel jas xa naʼa skʼulajel? Moka kʼulabʼaj desanimar. Seguro ke ayni awiʼoj modoʼalik bʼa jelni oj makunuk ja bʼa kongregasyon. Jun jasunuk oj skoltaya jani yajelyi orsayon sok skʼumajel ja 1 Corintios 12:​12-30. Ja tiw ja Pablo xchiktes lek ke ja weʼn, jastalni ja tuk yaʼtijumik ja Jyoba, jelni chaʼana wabʼal kʼotela ja bʼa kongregasyon. Ja yuj mok eluka gana ta mito xa bʼutʼu ja rekisitoʼik bʼa oj kʼotan siervo ministerial. Awajuka kʼujol bʼa skʼulajel ja janekʼ wa xbʼobʼawuj sbʼaja Jyoba sok sbʼaja hermanoʼik. Ja ansyanoʼik ojni ya tʼabʼan skʼujole ja jastik wa xlajxi awuj bʼajtanto oj ajukawi chikan jas aʼtel (Rom. 12:​4-8).

13. ¿Jasa tʼilan oj ka juljkʼujoltik sbʼaja rekisitoʼik bʼa stajel jun cholal?

¹³ Pilan jas oj skoltaya bʼa oja kʼujoluk bʼa oj kʼotan siervo ministerial jani yajel juluka kʼujol ke spetsanil ja snochumanik Kristo tʼilani oj skʼuluke tʼusan mi yibʼanaluk ja rekisitoʼik wa xkʼanxi. Jachniʼa, spetsanil ja snochumanik Kristo tʼilan oj mojxuke soka Jyoba, yabʼjel ja gustoʼil bʼa yajelyi ja tuk sok kʼotele lekil sjejel jastal yaʼtijumik Dyos. Pe ¿bʼa jastik tʼilan oj waj skʼujol jun hermano bʼa wa skʼana oj ajyukyuj mas cholalik?

JA BʼA JASTIK TʼILAN OJ AʼTIJANAN

14. ¿Jas wa stojolan ja «oj yil-e stʼilanil ja jastik junuki»? (1 Timoteo 3:​8-10, 12).

¹⁴ Ja wego la kiltik jujuntik rekisitoʼik wa staʼa tiʼal ja 1 Timoteo 3:​8-10, 12 (kʼuman). Ja siervo ministerialiki tʼilan «oj yil-e stʼilanil ja jastik junuki». Ja yaljel it cha wani xbʼobʼ sutxuk «oj kiswanuke». Meran, ja it mi wa stojolan ke mixa oj bʼobʼ tsenuke ma mixa gusto oj ajyuke (Ecl. 3:​1, 4). Pe tʼilani oj yaweyi lek stʼilanil ja cholalik yiʼojeʼi sok oj iljuke ke wa xbʼob jip jkʼujoltike. Jachuk ojni kʼulajuke respetar yuja kongregasyoni.

15. ¿Jas wa stojolan «tʼilan akʼumanuke toj» sok ‹mokni skʼuluke ganar bʼa jun modo mi sbʼejuk›?

 ¹⁵ «Tʼilan akʼumanuke toj». Ja it wa stojolan ke tʼilani oj yale ja smeranili, mi oj elkʼanuke sok oj bʼobʼ jip jkʼujoltike. Tʼilan oj yawe kʼotuk ja jas wa xyalawe sok mi maʼ oj sloʼlaye (Prov. 3:32). ‹Mokni [ ...] skʼuluke ganar bʼa jun modo mi sbʼejuk›. Wa xkʼan alxuk, tʼilani oj yale ja smeranil ja bʼa temaʼik bʼa negosyo sok sbʼaja takʼin bʼa kongregasyon. Sok mi oj yawe el slekilal ja jastal wa xyila sbʼaje soka hermanoʼiki bʼa skʼulajel ganar takʼin.

16. a) ¿Jas wa stojolan ja «mi jel oj yuʼe vino»? b) ¿Jasa ti chʼikan ja ajyel jun ‹jconcienciatik bʼa sak›?

¹⁶ «Mi jel oj yuʼe vino». Bʼa tuk yaljel, mokni jelxuke yajni wa xyuʼaje cha mok najuk sbʼaje ke jel xyuʼaje. Chomajkil, tʼilani oj ajyukyujile «jun sconcienciaʼe bʼa sak», yujni wa xyiʼaj ja sakʼanile jastalni wa xyala ja bʼa jastik yaʼunej kujlajuk ja Jyoba. Ama mini maʼ toj, pe wani xbʼobʼ abʼxuk stsamalil ja lamanil wa xyaʼa ja lek oj kil jbʼajtik soka Dyosi.

17. ¿Jastal wa x-aji och probar ta chapanxa ay jun hermano? (1 Timoteo 3:10; cha kʼela ja poto).

¹⁷ Pilan rekisito jani ke «aʼochuke probar bʼajtan ta chapan aye». Ja it wa stojolan ke sjeʼunejxa ke wa xbʼobʼ jip jkʼujoltik bʼa oj ajukyi cholalik. Ja yuj, yajni ja ansyanoʼik wa xyaʼawekan bʼa oj skʼuluke jun aʼtel, tʼilani oj skʼujoluke bʼa oj snoche lek ja tojelalik sok ja pautaʼik wa xyaʼa ja xchonabʼil ja Dyosi. Tʼilani oj snaʼe jasa ti chʼikan bʼa skʼulajel ja aʼtel jaw, sok jas tyempo oj chʼak skʼuluke. Ta wa skʼujolane bʼa oj skʼuluke lek ja aʼteliki, ja tuk hermanoʼik bʼa kongregasyon ojni yile ke wan skʼujolajel. Ansyanoʼik, ilawik ja hermanoʼik bʼa yiʼojexa jaʼ bʼa oj bʼobʼa chapex (kʼuman ja 1 Timoteo 3:10). Jun sjejel, ¿ay maʼ ja bʼa wa kongregasyon hermanoʼik bʼa wane solteroʼaxel ma mas chʼineto? ¿Ay maʼ yiʼoje ja kostumbre bʼa spaklajel ja Biblia jach stuchʼile? ¿Wan maʼ xyaʼawe skomentaryoʼe ja bʼa reunioniki sok wa x-elye tikʼan ja bʼa xcholjeli? Ta jachkʼa, ojni bʼobʼa wawexyi aʼtelik bʼa wa xkʼot sbʼaj ja bʼa jabʼil yiʼoji sok ja bʼa jastal wa xtaxi. Jachuk wanex yajel och probar ja jas wa xbʼobʼ skʼuluke ja keremtik jawi. Jachuk yajni ja yeʼnle solteroʼexa, bʼobʼta wanxa sbʼutʼuwe ja rekisitoʼik bʼa oj bʼobʼ ochuke siervo ministerial.

18. ¿Jas wa stojolan ja ‹mini jun smul oj taxuk›?

 ¹⁸ Ja siervo ministerialiki cha tʼilan ‹mini jun smul oj taxuk›. Bʼa tuk yaljel, mok ajyuk rasonik bʼa lom oj lejuk smule bʼa koʼele bʼa jun chaʼan mulal. Meran, ja yaʼtijumik Dyos ojni bʼobʼ lejuk lom smule. Ja Jesús jachni ekʼ sbʼaj sok yala ke jachni oj ekʼ sbʼaj ja snochumaniki (Juan 15:20). Ama jachuk, ja hermanoʼik bʼa ayiʼoje jun smodoʼe bʼa sak, jastalni ja Jesús, lekni oj tajuke tiʼal ja bʼa kongregasyoni (Mat. 11:19).

19. ¿Jasa ti chʼikan ja «kechanta june aʼajyuk ja xcheʼumeʼi»?

¹⁹ Ja matik wa skʼanawe oj ochuke siervo ministerial sok nupanelexa tʼilani «kechanta june aʼajyuk ja xcheʼumeʼi». Tʼilani oj skise ja jas mero yaʼunej kujlajuk ja Jyoba: ja bʼa nupaneli kechani oj ajyuk jun winik sok jun ixuk (Mat. 19:​3-9). Meran, ja snochuman Kristo tʼilani mi oj koʼ mulal sok ixuk winik (Heb. 13:4). Pe ja tatamal bʼa snochuman Kristo tʼilani ay jas mas oj skʼuluk. Tʼilani oj ajyuk toj soka xcheʼumi sok mok stsak tuk ixuke (Job 31:1).

20. ¿Jastal wa stojo lek ja snaj jun winik?

²⁰ Cha wani xmajlaxi ke ja siervo ministerialik «a-stoje lek ja yuntikileʼi sok ja spamilyaʼeʼi». Ja matik olomale bʼa pamilya tʼilani oj yaweyi stʼilanil ja cholalik yiʼojeʼi. Oj yawe ajyuk ja tsomjelal bʼa pamilya kada semana. Oj eluke tikʼan ja bʼa xcholjel sok ja spamilyaʼe. Sok oj skoltaye ja yuntikile bʼa oj yamigoʼuke ja Jyoba (Efes. 6:4). Ja winik bʼa wa stalnay lek ja spamilya wa sjeʼa ke ojni bʼobʼ stalnay lek ja kongregasyon (cha kʼela ja 1 Timoteo 3:5).

21. ¿Jas oj bʼobʼa kʼuluk ta mito siervo ministerialuka?

²¹ Ta ja weʼn mito siervo ministerialuka, wa stsatsankʼujolanatikon bʼa oja wayi orasyon ja Jyoba sok kʼulan estudiar ja artikulo it. Paklay ja rekisitoʼik sbʼaja siervo ministerialik sok kʼujolan bʼa oja kʼuluk. Pensaraʼan janekʼto waxa yajtay ja Jyoba sok jawa wermanoʼik. Atsatsbʼuk ja kʼankʼunela wiʼoj bʼa oja koltaye (1 Ped. 4:​8, 10). Jachuk oja wabʼ stsamalil yaʼteltajel jawa pamilyaʼik bʼa yaʼtijumik Dyos. ¡Aya koʼuka lekilal ja Jyoba ja janekʼto waxa kʼujolan bʼa oj kʼotan siervo ministerial! (Filip. 2:13).