Ja jas oja kʼuluk bʼa mi oja chʼay jawa westudioʼi
¿WOKOL maʼ xa wabʼ oja kʼul estudiar kada semana? ¿Jel maʼ axwela sbʼaj? Jitsan bʼa keʼntik jachni wa x-ekʼ jbʼajtik. Ayni jitsan jastik bʼa tikʼan wa xkʼulantik ama wani skʼanakujtik tyempo sok skʼujolajel, jastal ja oj atnukotik. ¡Pe jelni xlikiki xkabʼtik tsaʼan! Skʼulajel estudiar ja Biblia cha jelni oj bʼobʼ ya likikel, jastal ‹sakʼjel jbʼajtik soka jaʼ bʼa yabʼal ja Dyosi› (Efes. 5:26). Ja sugerensyaʼik nochani ojni bʼobʼ skoltaya:
Kʼulan juna programa. Ja skʼulajel estudiar atuchʼil jani kʼotel june ja bʼa jasunuk ‹mas tʼilan› oj skʼuluk jun yaʼtijum Dyos (Filip. 1:10). Bʼa mi oj chʼayuka kʼujol snochjel ja programa, ¿jas yuj mixa tsʼijbʼan ja kʼakʼu sok ja ora bʼa jun juʼun sok yajel bʼa jun lugar bʼa oj bʼobʼa wile? Ma bʼobʼta ojni skoltaya yajelkan jun alarma tʼusan bʼajtanto ja bʼa ora achapuneji.
Kʼajyan ja bʼa jas wa xbʼobʼ skoltaya. Jujuntik masni wa xbʼobʼ waj skʼujole yajni wa skʼulane estudiar mas albʼel, jaxa tuk masni lek xyilawe bʼa tʼusan tyempo. ¿Jastal waxa kʼana oja kʼul estudiar? Ja yuj, yajni xa chapa jastal oja kʼul estudiar aʼa tʼabʼan akʼujol ja it. Sok ta mi jelxa kʼana oja kʼul estudiar yajni xkʼot ja ora, ¿jas yuj mixa kʼulan probar ama kechan 10 minuto? Bʼobʼta lajansok tʼusan tyempo, pe masni lek yuja mi oja kʼuluki. Mi xnaʼatik, pe bʼobʼta yajni kʼeyata masni ojxa akʼan oja nochyi (Filip. 2:13).
Tsaʼa bʼajtan jastik tema oja kʼul estudiar. Ta jato waxa tsaʼa ja tema oja paklay yajni ojxa akʼul estudiar, mini wanuka «yajel makunuk lek ja tyempo ja janekʼ wa xbʼobʼi» (Efes. 5:16). ¿Jas yuj mixa kʼulan jun lista bʼa artikuloʼik sok temaʼik bʼa waxa kʼana oja kʼul estudiar? Yajni wa x-ajyiwuj jun sjobʼjel, aʼoch juʼun. Sok ta wa xjak bʼa wa pensar tuk jastik bʼa waxa kʼana oja paklay, aʼoch juʼun ja bʼa wa lista.
Tukbʼes ta ay stʼilanili. Ja jas wa xmajlaxi jani oja kʼul estudiar kada semana. Ja yuj, ta ay stʼilanil, tukbʼes ja skʼakʼujil, ja ora, ja janekʼ wa x-albʼi sok ja temaʼik.
Ta mixa chʼaya jawa westudio ojni yijanawi jitsan slekilal: masni mojan oj ajyan soka Jyoba, oja tsaʼ lek ja jas oja kʼuluki sok oj likikuk oja wabʼi (Jos. 1:8).
