Pojkiyon bʼa 1954, bʼa chonabʼ estadounidense bʼa Saint Paul (Minnesota), bʼa jun pamilya católica romana bʼa mi jel rikoʼuk sok mi jel pobreʼuk. Ajyi joʼe yuntikil ja jnantati, keʼnon ja bʼa xchabʼil. Yajni yal keremonto, jkʼulan estudiar bʼa jun eskwela católica sok wala koltaniyon ja bʼa iglesya, pe mini jel xnaʼa ja bʼa Biblia. Ama wani xkʼuʼan tʼilani ay jun Dyos bʼa skʼulan spetsanil ja jastik junuki, pe chʼaykuj ja skʼuʼajel ja bʼa iglesya.

Yajni teyon ja bʼa sbʼajtanil jabʼil ja bʼa Facultad de Derecho William Mitchell, jun nupanum taʼumantiʼik bʼa Jyoba skʼojtsine ja jnaji. Yuja wanon chukʼulej, tsamalxta yalawe kabʼ oj kumxuke mas tsaʼan. Yajni kumxiye, kayile chabʼ sjobʼjel: «¿Jas yuj mas lek wa xwaj yujile ja matik malo yuja matik leki?» sok «¿Jasunkiluk oj makunuk bʼa oj ajyukotik gusto?». Kiʼajkan ja libro La verdad que lleva a vida eterna sok ja Traducción del Nuevo Mundo de las Santas Escrituras, bʼa yaʼax ja spatiki. Cha kiʼaj jun estudio bʼa Biblia. Jelni jas jnebʼa. Jelni cham kabʼ ja jnebʼa ja sGobyerno ja Dyosi, juni Gobyerno bʼa  oj yayi ja jas oj makunuk yuj ja kristyanoʼik. Kabʼ stojol ja gobyernoʼik mini jas bʼobʼelyuj sok kechanta sbʼutʼuneje wokol ja bʼa luʼumkʼinali, jastik mi tojuk sok desgrasyaʼik.

Kayi ja jsakʼanil ja Jyoba bʼa skʼeʼulabʼil bʼa 1982 sok kiʼaj jaʼ ja bʼa jabʼil jaw ja bʼa asamblea «Verdad del Reino» ja bʼa estadio St. Paul Civic Center. Ja bʼa semana snochoyi, kumxiyon ja bʼa tiw bʼa oj jkʼuluk ja examen bʼa ochel abogado. Sok bʼa skʼeʼulabʼil bʼa octubre aljikabʼ ekʼyon soka examen.

Ja bʼa asamblea jaw, jnaʼa sbʼaj ja Mike Richardson, bʼa ti wan aʼtel bʼa Betel bʼa Brooklyn (Nueva York) sok xcholo kabʼ jabʼi ja bʼa yechalil wa xkʼelxi ja kaʼteltiki kujlaji tabʼi jun opisina bʼa jastik ti chʼikan soka leyiki. Juljkʼujol ja yaljelik yala ja eunuco etíope ja bʼa Hechos 8:36 sok jobʼo jbʼaj: «¿Mi maʼ oj bʼobʼ jkʼap jbʼaj bʼa oj aʼtijukon ja bʼa opisina jaw?». Ja yuj jbʼutʼu ja solicitud bʼa oj aʼtijukon bʼa Betel.

Ja jnantati mi skʼulane gusto ja yajni ochyon taʼumantiʼ bʼa Jyoba. Ja jtati sjobʼoki janekʼ oj tupjukon yuja abogadoʼon ta aʼtijiyon sbʼaja Watchtower. Ja keʼn jakʼayi juni aʼtel bʼa kʼebʼubʼal sok oj ajuki 75 dólar kada ixaw, jani jaw ja janekʼ wa ajiyile ja betelitaʼik ja tyempo jaw.

Yajni chʼak jkʼul ja kaʼtel bʼa jun tribunal, ja bʼa 1984 kʼe aʼtijukon ja bʼa Betel bʼa Brooklyn. Ti jekjiyon bʼa Opisina bʼa Jastik ti chʼikan soka Leyiki. Ja janekʼ jnebʼa ja aʼtijiyon ja bʼa tribunal jaw jelni skoltayon.

Ja bʼa noviembre bʼa 1983, ja taʼumantiʼik bʼa Jyoba smanawe ja Teatro Stanley, ja bʼa Jersey City (Nueva Jersey). Ja hermanoʼik skʼanawe ja permiso bʼa stojbʼesel yajkʼachil ekʼele ja lus soka jaʼ ja bʼa naʼits. Yajni stsomo sbʼaje soka matik ay xchol ja bʼa Lugari, xcholowe yabʼ ja taʼumantiʼik bʼa Jyoba wa skʼanawe oj yawe makunuk ja teatro bʼa skʼulajel asambleaʼik. Pe anto ajyi jun wokol. Jastalni bʼi kulan ja leyik ja bʼa yoj chonabʼik mas chapani, ja lugarik bʼa yajel stoyjel ja Dyos mini bʼi oj bʼobʼ ajyuk ja bʼa lugarik bʼa negosyo. Yuja teatro tey bʼa lugar bʼa negosyoʼik bʼa yoj snalan ja chonabʼi, mini ajikitikon permiso. Pe ja hermanoʼik sleʼa modo yajel kʼumbʼuk skʼujol ja matik ay xcholi, pe mini jas bʼobʼyujile.

Ja bʼa bʼajtan semana ajyiyon ja bʼa Betel, ja hermanoʼik wajye bʼa tribunal federal de distrito bʼa skʼanjel ja permiso. Yuja aʼtijiyon chabʼ jabʼil ja bʼa tribunal federal de distrito  Saint Paul (Minnesota), wani xnaʼa lek sbʼaja tikʼe loʼil jaw. June ja bʼa abogado yala ja bʼi ja Teatro Stanley akʼubʼal makunuk bʼa tuktukil modo yajel ekʼ gusto, bʼa skʼeljel pelikulaʼik cha kʼinik bʼa rock. Anto, ¿jas yuj yaljel wan kʼokxel ja ley ja oj axuk makunuk bʼa stoyjel ja Dyos? Ja tribunal spaklay lek ja jas wan ekʼeli, yala ja bʼi ja bʼa Jersey City wani skʼokjel jderechotik bʼa yajelyi stoyjel ja Dyos sok yayi mandar ja matik ay xcholi ayaʼe ja permiso. Jach och kile ja Jyoba wani xya koʼ slekilal ja jastal wa xya makunuk ja xchonabʼi ja leyiki bʼa jachuk ja aʼteli mini oj kan timan. Jelni gustoʼaxiyon yuja koltaniyoni.

Ja hermanoʼik kʼe stojbʼese lek ja naʼitsi, bʼa mini yiʼaj jun jabʼil ja chʼak tojbʼuki. Ja 8 bʼa septiembre bʼa 1985, ti ajyi ja graduación bʼa Eskwela bʼa Biblia bʼa Galaad ja número 79 bʼa naxi sbʼaj jastal jun niwan Naʼits bʼa Taʼumantiʼik bʼa wa tsomo sbʼaje ja bʼa Jersey City. Juni niwan cholal bʼa keʼn yuja bʼobʼ aʼtijukon sbʼaja sGobyerno ja Dyosi jastal june ja bʼa tsome abogadoʼik, sok ja it mastoni jel ya gustoʼaxukon yuj tuk aʼtelik oj jkʼul ajyi jastal abogado bʼajtanto oj kʼe aʼtijukon ja bʼa Betel. Mini ekʼ bʼa jpensar ja Jyoba spilunejtoki mas cholalik jastal it.

Ja bʼa jabʼilik jan ochenta, jitsan loktorik sok hospitalik mi skisawe ja taʼumantiʼik bʼa Jyoba bʼa ayxa skʼujole, yuja wa skʼanawe oj yiʼe aʼanik mey yiʼoj chikʼ. Pe mastoni wa xjak sbʼaje wokolik ja matik tuk satkʼinal aye, yujni ja jwesik wa spensarane mey yiʼoje derecho oj yal mi oj yiʼe chikʼ, yujni ta chamye ja yal alatsi oj kan mebʼaʼil.

Ja 29 bʼa diciembre bʼa 1988, ja hermana Denise Nicoleau yajni pojkita ja yal yalatsi jel el juntiro ja xchikʼeli. Jas hemoglobina jelni koʼel juntiro, koʼel mas ja 5.0, sok ja loktori yala yabʼ a-skʼan oj yi chikʼ. Pe ja yeʼn mini skʼana. Jaxa bʼa saʼan sakbʼeli, ja hospital skʼanayi jun jwes aya permiso bʼa oj yaweyi chikʼ. Ja jwesi yaʼa ja ordeni, bʼa mixani xchapawe, mini yalawe yabʼ ja hermana Nicoleau cha mini ja statami.

Ja viernes 30 bʼa diciembre, ja hospitali yayi chikʼ ja hermana ama mi skʼana ja statami sok ja tuk spamilya bʼa teye. Chomajkil, ja bʼa och kʼakʼu yamjiye jujuntik ja spamilya sok ja ansyanoʼik. Leji smule bʼa sleʼawe modo smakjel ja sbʼej ja matik wa x-aʼtijiye ja bʼa hospitali bʼa mi oj kʼotuke ja bʼay ja hermana sok yajel ochyi ja chikʼi. Ja sábado 31 bʼa diciembre ja bʼa saʼan sakbʼeli, ja jas ekʼi el ja bʼa notisyaʼik ja bʼa chonabʼ Nueva York sok ja bʼa sjoyanali.

Jleʼa jkoltajeltikon sok jun tribunal mas chaʼan xchol, sok ja lunes bʼa saʼan sakbʼeli  loʼilaniyon soka Jwes ja maʼ oj skʼel ja loʼil, ja Milton Mollen. Jcholo yabʼ ja jas ekʼeli sok kala yabʼ ja pilan jwesi skʼulan pirmar ja juʼuni bʼa mixani maʼ xchapasok. Ja Mollen yalakabʼ oj ekon ja bʼa yopisina ja bʼa ochkʼakʼu jaw bʼa yiljel ja jas ekʼeli sok ja leyik wa sbʼajini. Smojtayon ja jsuperintendente, ja Philip Brumley. Ja jwes cha sloko ja abogado bʼa hospitali. Ja loʼili jelni tsats waji. Bʼa jujuntik ekʼele, ja hermano Brumley stsʼijbʼanki bʼa jun nota ja bʼa skwaderno bʼa wa xyala: «Leʼa modo jastal oj kʼumanan». Wajni jun lekil rason, yujni ja bʼa slejel modo xchiktesel mini stojoluk ja jas wa xyala ja abogado jel wa xkʼan ya tajkukon.

Bʼa jujuntik ora tsatsal loʼil, ja jwes Mollen yalakabʼ jato bʼi bʼajtan oj yil-e ja loʼiltikon ja x-el kʼakʼu. Yajni elumotikon ja bʼa opisina, ja jwesi yala ja bʼi abogado bʼa hospitali «mini pasiluk oj koyuj luʼum», ja jas wa xkʼan yali mini pasil oj bʼobʼyuj ja jas wa xkʼana oj skʼuluki. Kabʼ lajansok ja Jyoba wani yaljel kabʼ ojni jkʼuluktikon ganar. Jelni chamyiljel ja Dyosi wan yajel makunukotikon bʼa skʼulajel ja jas wa skʼana.

Jelni kʼe kakwaltikon xchapjel ja jas oj kaltikoni. Ja tribunali mini jel najatuk yiʼoj ja Betel bʼa Brooklyn, ja yuj tʼusan mi spetsaniluk ja jmojtikon ja bʼa chʼin Opisina bʼa Jastik ti chʼikan soka Leyiki bʼejyel wajye man tiw. Yajni smaklaye ja jas kalatikoni, ja chane jwes wane yiljel ja jloʼilitikoni skʼutsuwe ja jas yala ja bʼajtan jwesi. Ja tribunali jani skoltay ja hermana Nicoleau sok yala ja skʼulajel pirmar jun juʼun bʼa mi xmaklaxi ja jas wa skʼana ja maʼ maloʼayi wani bʼi kʼokxel ja sderecho yiʼoj ja bʼa leyi.

Mi ekʼ mas tyempo, ja tribunal mas chaʼan xchol ja bʼa estado bʼa Nueva York yala jaman lek ja derecho yiʼoj ja hermana Nicoleau bʼa oj yi aʼanik mey yiʼoj chikʼ. Jani waj ja sbʼajtanil ja bʼa xchanil ekʼele kʼulaxi ganar ja bʼa tribunalik mas chaʼanik xchol ja bʼa estadoʼik ja bʼa Estados Unidos bʼa ti chʼikan soka chikʼi, ja bʼa koltaniyon (kʼela ja rekwagro « Loʼilik kʼulaxi ganar ja bʼa tribunalik mas chaʼan xchol»). Cha aʼtijiyon soke tuk abogado ja bʼa Betel bʼa ti chʼikan sok yiljel maʼ oj yikan ja yal untik, skʼutsjel nupanel, bienes raíces sok planificación urbana.

Yajni jnaʼa sbʼaj ja Dawn, ja yeʼn jun ixuk bʼa skʼutsunej ja snupaneli sok ayiʼoj oxe yuntikil. Wa x-aʼtiji sok precursora. Yuja jel ekʼel sbʼaj wokol ja bʼa sakʼanili, jelni cham kila yuja kongana lek wan yaʼteltajel ja Jyoba. Ja bʼa 1992, wajtikon ja bʼa Asamblea bʼa Distrito «Portadores de Luz» ja bʼa chonabʼ Nueva York sok kala yabʼ wa xkʼana oj jnaʼ sbʼaj mas. Kechan jun jabʼil ekʼi nupanitikon, sok ja keʼn koltaniyontoni bʼa Betel. Bʼa keʼna, ajyelkuj jun jcheʼum bʼa jel lek xyila sbʼaj soka Dyosi sok jel gusto x-ajyi, juni majtanal bʼa Jyoba. Jastalni wa xyala ja Proverbios 31:12, ja Dawn yaʼunejki jitsan jlekilal spetsanil ja bʼa jsakʼaniltikon ajyelotikon lajani.

Yajni nupanitikon, ja yuntikili ayiʼoje 11, 13 sok 16 jabʼil. Yuja wa xkʼana oj kʼotkon jun lekil tatal bʼa yeʼnle, jkʼuman sok kaʼ makunuk spetsanil ja jas jtaʼa ja bʼa juʼuntik sbʼaja majan tatalik. Ja bʼa jabʼilik ekʼeljani jtʼaspunejtikon wokol, pe wa xyaki gusto ja keremtiki yuja kʼot yil-one jastal jun tatal jel xyajtani sok jun amigo bʼa wa xbʼobʼ sjip skʼujole. Jelni xyakitikon gusto ja yamigoʼe ja wa xwajye ja bʼa naʼitsi sok yuja wa xbʼutʼ toj keremtik.

Ja bʼa 2013, ja Dawn sok ja keʼn wajtikon kulan bʼa Wisconsin bʼa stalnajel ja jnantatikoni. Bʼa keʼna, xkala ta tixa oj chʼakuk ja kaʼteltikon bʼa Betel. Lokjiyonto bʼa sjejelyile jas oj skʼuluke ja abogadoʼik bʼa jach ayta styempoʼil.

Ja septiembre bʼa 2018, kʼot jnaʼ tʼilani oj sukʼ ja jnukʼ jitsan ekʼele bʼajtanto oj kʼumanikon. Ja loktori mini snaʼa jas yuj jach wan ekʼel jbʼaj. Tsaʼan, pilan loktor yalakabʼ la wajkonsok jun loktor bʼa chijnakʼal. Ja enero bʼa 2019, pilan loktor cha yalakabʼ bʼobʼta ay kiʼoj jun chamelal bʼa mi jel naʼubʼaluk sbʼaj, pe yajni bʼi x-ekʼ ja tyempo oj yixtalaʼuk yibʼanal ja jkwerpo.

Oxe kʼakʼu tsaʼan, mokʼyon ja yajni wanon skʼulajel patinar bʼa hielo sok kʼok ja snukʼ jkʼabʼ, ja bʼa stojol jkʼabʼi. Kʼajyelni lek wa xkʼulan patinar. Kʼot jnaʼ jelxani wokol xkabʼ skʼulajel controlar ja jkwerpo. Jelni cham kabʼ yuja wego ipaxi ja jchameli. Jelxani och wokolanukon ja kʼumanel, snikjel jbʼaj sok waʼel.

Jelni chaʼanyabʼalil bʼa keʼna ja yajel makunuk ja jas jnebʼunej ja bʼa abogadoʼil bʼa skoltajel ja sGobyerno ja Dyos. Cha jelni chaʼanyabʼal bʼa keʼna stsʼijbʼajel jitsan artikulo bʼa jel chaʼanik yabʼjel sok yajel ekʼ loʼilik bʼa sutanal ja luʼumi ja bʼa tsomjelik wa skʼulane ja loktorik jel chapan sok ja bʼa leyik. Spetsanil ja jaw skoltunejon bʼa skoltajel ja sderecho yiʼoje ja yaʼtijumik ja Jyoba bʼa stsajel yijel aʼanik sok operasyonik bʼa mi oj yiʼe chikʼ. Pes jastalni wa xyala ja Lucas 17:10, kechantani kʼotelon jun moso sok mini jas wa xbʼajin; kechantani jkʼulunej ja jasa tʼilan oj jkʼuluki.