1, 2. ¿Jas yuj gusto wala ajyitik ja yaʼtijumotik ja Jyoba? (Santiago 1:​22-25).

 JA JYOBA sok ja Yunini wa skʼanawe ke gusto oj ajyukotik. Ja tsʼijbʼanum bʼa Salmo 119:2 yala: «Gusto wa x-ajyiye ja matik wa skisawe ja jas wa xya juljkʼujoltiki, ja matik wa sleʼawe sok spetsanil skʼujole». Sok ja Jesús cha yala: «¡Lekxtayuj ja matik wa xyabʼye ja yabʼal ja Dyosi sok wa skʼulane!» (Luc. 11:28).

² Ja yaʼtijumik ja Jyoba gusto wala ajyitik. ¿Jas yuj? Yujni ay kiʼojtik jitsan rason, sok june jel tʼilan jani yuja tikʼan wa xkʼumantik ja Yabʼal ja Dyos sok wa xkʼujolantik bʼa yajel makunuk ja jas wa xnebʼatiki (kʼuman ja Santiago 1:​22-25).

3. ¿Jas slekilal oj kiltik ta wa xkatik makunuk ja Yabʼal ja Dyosi?

³ ¿Jas slekilal oj kiltik ta ‹wa xkatik makunuk ja Yabʼal ja Dyosi›? Ojni katik gustoʼaxuk ja Jyoba sok snajel ja jaw wani la gustoʼaxitik (Ecl. 12:13). Pilan yuja it, yajel makunuk ja rasonik ja bʼa Yabʼal ja Dyosi wa skoltayotik bʼa mas lek oj kil jbʼajtik soka jpamilyatik sok oj kʼotkotik lekil yamigoʼik ja hermanoʼiki. Bʼobʼta ja weʼn awilunejxani ke meran ja it. Chomajkil, mini x-ekʼ jbʼajtik ja jitsan wokolik wa x-ekʼ sbʼaje ja matik mi skʼuʼane ja jastik yaʼunej kujlajuk ja Jyoba. Jachni jastal yala ja rey David bʼa jun tsʼebʼoj tsaʼan yajni yala ja sley, ja smandarik sok ja  skastigoʼik ja Jyoba: «Sbʼaja maʼ wa skʼuʼani ayni jun chaʼan stsʼakol» (Sal. 19:​7-11).

4. ¿Jas yuj mi tolabida pasiluk yajel makunuk ja Yabʼal ja Dyosi?

⁴ Ama jachuk, tʼilani oj natik ke mi tolabida pasiluk yajel makunuk ja Yabʼal ja Dyosi. Ama jel latsan aytik, tʼilani oj piltik tyempo bʼa skʼumajel sok spaklajel ja Biblia, jachuk oj kabʼtik stojol ja jas wa skʼana oj kʼuluktik ja Jyoba. Ja yuj, ja bʼa artikulo it oj paklaytik jujuntik modoʼik bʼa oj skoltayotik skʼumajel tikʼan. Cha oj kiltik jasa oj skoltayotik spensarajel ja jas wa xkʼumantik sok slejel modoʼik bʼa yajel makunuk ja jas wa xnebʼatiki.

PILA TYEMPO BʼA SKʼUMAJEL JA YABʼAL JA DYOSI

5. ¿Jastik cholalik wa xya ajyukotik latsan?

⁵ Jitsan ja bʼa yaʼtijumotik ja Jyoba jelni latsan la ajyitik. Wa xpilatik tyempo bʼa skʼulajel tuktukil cholalik. Jun sjejel, jitsan bʼa keʼntik wala aʼtijitik bʼa smakʼlajel jbʼajtik sok smakʼlajel ja jpamilyatiki (1 Tim. 5:8). Jitsan hermanoʼik wa stalnaye ja spamilyaʼe bʼa malo aye ma ayxa skʼujole. Sok jpetsaniltik tʼilani oj piltik tyempo bʼa oj talnay jbʼajtik. Cha tini ay ja cholalik bʼa kongregasyon. June jel tʼilan jani elel tikʼan ja bʼa xcholjeli. Yuja jel jitsan jas wa xkʼulantik, bʼobʼta oja jobʼ abʼaj: «¿Jas oj bʼobʼ jkʼuluk bʼa oj pil tyempo bʼa oj kʼumuk tikʼan ja Biblia, spensarajel sok yajel makunuk?».

6. ¿Jas oj bʼobʼa kʼuluk bʼa mi oja wakan skʼumajel ja Biblia? (Cha kʼela ja poto).

⁶ Skʼumajel ja Biblia jani june ja bʼa jas «mas tʼilani» sbʼaja yaʼtijumik Dyosi, ja yuj, tʼilani oj kʼumuktik (Filip. 1:10). Ja libro bʼa Salmos wa xkʼe stulyi yaljel ke ja winik gusto ayi «wani xyabʼ stsamalil ja bʼa sley ja Jyoba, kʼakʼu akwal wa skʼuman ja sleyi sok wa spensaran» (Sal. 1:​1, 2). Chikani lek ke tʼilan oj piltik tyempo bʼa skʼumajel. Anto, ¿jas jutsʼinil mas lek bʼa oj kʼumuktik ja Biblia? Keʼnxani oj kiltik  kada jujune. Pe ja mas tʼilani jani oj piltik jun tyempo bʼa oj bʼobʼ jkʼumuktik tikʼan. Jun hermano sbʼiʼil Víctor wa xyala: «Jel xkiʼaj gusto skʼumajel ja Biblia ja bʼa saʼan sakbʼeli. Ama mi xkʼana sajto oj kʼekon, pe wani xkila masni mi jas sjomo kolom yuja bʼa sat kʼakʼuji. Wa xkila masni wa xwaj jkʼujol ja bʼa jas wa xkʼumani». ¿Jach maʼ waxa wabʼ jastal ja Victori? Jobʼo abʼaj: «Bʼa keʼna, ¿jas jutsʼinil mas lek bʼa skʼumajel ja Biblia?».

PENSARAN JA JAS WAXA KʼUMANI

7, 8. Cholo sok jun sjejel jasa tʼilan mi oj kʼuluktik yajni wa xkʼumantik ja Biblia.

⁷ Yajni wanxa xnaʼatik ja sjutsʼinil oj kʼumuktik ja Biblia, cha tʼilani oj talnay jbʼajtik bʼa mi oj kokotik ja bʼa trampa bʼa kechanta oj kʼumuktik sok mi oj katik el slekilal. Ja bʼa jsakʼaniltiki wani xkʼumantik jitsan jastik bʼa bʼobʼta jkʼumunejtikxa jitsan ekʼele sok tsaʼan mixa jas xjul jkʼujoltik. ¡Jelni maʼ triste ja jach oj ekʼ jbʼajtik soka skʼumajel ja Biblia! Bʼobʼta ayni kiʼojtik ja jkʼelsatik bʼa skʼumajel jujuntik kapitulo kada kʼakʼu. Jelni lek ja oj katik ajyuk jkʼelsatik sok oj kʼujoluktik bʼa yajel kʼotuk (1 Cor. 9:26). Pe skʼumajel ja Biblia jatoni ja skʼeʼulabʼil. Ta wa xkʼanatik oj katik el slekilal, tʼilani ay jas mas oj kʼuluktik.

⁸ La jpensaraʼuktik ja bʼa sjejel nochani. Ja jaʼi jelni tʼilan ja bʼa yal kʼulik jumasaʼ. Pe ta jelxi ja jaʼi bʼa tʼusanta tyempo, ojni jomuk ja luʼumi. Ta jach ekʼi, ja jaʼi mini jel oj koltanuk. Masni lek ja takal takal oj koʼuki bʼa jachuk ja luʼumi oj ajyukyuj tyempo bʼa oj yuʼe sok jachuk oj kʼiʼuk ja yal kʼuliki. Junxtani jastal jaw, tʼilani mi oj kʼumuktik ajnel jomol ja Biblia bʼa mixa oj katik el slekilal ja jas wa xkʼumantik, mixa oj juljkʼujoltik sok mi oj katik makunuk (Sant. 1:24).

9. ¿Jasa tʼilan oj kʼuluktik ta ajnel jomolxta wa xkʼumantik ja Biblia?

⁹ La jpensaraʼuktik wana skʼumajel ja Biblia sok waxa waʼabʼaj kuenta ajnel jomol wana skʼumajel. ¿Jas oj bʼobʼa  kʼuluk? Leʼa modo skʼumajel mas jaʼankʼujol sok kʼuman bʼa jun modo oj skoltaya spensarajel ja jas wana skʼumajeli. Ta wokol waxa wabʼ spensarajel, mok xiwan. Kechantani oja pensaraʼuk ja jas wana skʼumajeli. 1) Ojni bʼobʼa pil mas tyempo ja bʼa wa westudio bʼa jachuk oja pensaraʼuk ja jas waxa kʼumani ma 2) mi jel jitsan bersikuloʼik oja kʼumuk sok ja tyempo wa xkani oj wa makunuk bʼa spensarajel ja jas akʼumani. Ja Víctor, bʼa tax tiʼal ja bʼa parrapo 6, yala: «Jleʼa modo mi jel jitsan bersikuloʼik oj kʼumuk, bʼobʼta jun ita kapitulo. Yuja wa xkʼuman ja Biblia bʼa saʼan sakbʼel, ayni kiʼoj snajtil ja kʼakʼu bʼa spensarajel ja jas jkʼumani». Ja mas tʼilani mini jaʼuk ja janekʼ waxa kʼumani, jani oja kʼumuk jaʼankʼujol bʼa oj wa el slekilal ja jas waxa kʼumani (Sal. 119:97; kʼela ja recuadro « Sjobʼjelik bʼa oj skoltaya spensarajel»).

10. Cholo sok jun sjejel jastal oj wa makunuk ja jas waxa kʼuman bʼa Biblia (1 Tesalonicenses 5:​17, 18).

¹⁰ Chikan jas jutsʼinil sok janekʼ tyempo waxa kʼuman ja Biblia, leʼa modo bʼa yajel makunuk ja jas waxa kʼumani. Yajni wana skʼumajel jun parte ja bʼa Yabʼal ja Dyosi, jobʼo abʼaj: «¿Jastal oj ka makunuk ja rason it ja wego ma ja bʼa tyempo jakumi?». Jun sjejel, la jpensaraʼuktik ke jkʼumantikta ja 1 Tesalonicenses 5:​17, 18 (kʼuman). Tsaʼan kʼotan tekʼan sok pensaraʼan ja bʼa wa worasyoniki. ¿Ti maʼ wa x-el man jkʼujol? ¿Tikʼan maʼ wa xkayi orasyon? ¿Bʼa jastik wa xkʼana oj ka tsʼakatal? Bʼobʼta oj ekʼ bʼa wa pensar oxe jasunuk bʼa oja wayi tsʼakatal ja Jyoba. Ta waxa pila tʼun tyempo bʼa spensarajel ja bʼa jastik it, ama kechanta jutsʼin, mini kechan oja maklay ja Yabʼal ja Dyosi, cha ojni wa makunuk. Ta jach waxa kʼulan kada kʼakʼu soka jas waxa kʼuman ja bʼa Biblia, ojni kʼotan jun lekil yaʼtijum ja Jyoba. Pe ¿jaxa ta ay jitsan jas oja tukbʼes?

AʼAJYUKA KʼELSATIK BʼA OJ LAJXUKAWUJ

11. ¿Jas yuj ay ekʼele oja kʼulabʼaj desanimar yajni xa kʼuman ja Biblia? Aʼa jun sjejel.

¹¹ Yajni xa kʼuman ja Biblia, bʼobʼta ay ekʼele oja wabʼ desanimado aya ta waxa waʼabʼaj kuenta tʼilan oja tukbʼes jitsan jastik. Pensaraʼan ja bʼa jas ti nochani. Ja bʼajtan kʼakʼu wa kʼuman jujuntik bersikulo bʼa wa xyala ke mi lekuk ja oj tsawanani (Sant. 2:​1-8). Yuja waxa wila ke tʼilan oj wa tukbʼuk ja jastal waxa wila ja tuk, wani xa tsaʼa stukbʼesel jujuntik jasunuk. ¡Jelni lek ja jaw! Anto ja bʼa pilan kʼakʼu waxa kʼuman jun teksto bʼa wa  xchiktes ja stʼilanil bʼa skomjel ja jas waxa wala (Sant. 3:​1-12). Ja tiw waxa waʼabʼaj kuenta ke ay ekʼele awalunej jastik mi lekuk, ja yuj, wa xwa ajyuk wa kʼelsat bʼa oja wal jastik lek sok oj tsatsankʼujolanan. Ja bʼa yoxil kʼakʼu waxa kʼuman ke mini lekuk yamigoʼajel ja luʼumkʼinali (Sant. 4:​4-12). Wa xkʼota wil ke tʼilan oja talnabʼaj soka pelikulaʼik waxa kʼela sok ja kʼin waxa maklay. Jaxa bʼa xchanil kʼakʼu bʼobʼta waxa wabʼ desanimado aya yuj spetsanil ja jastik oja tukbʼes.

12. ¿Jas yuj moka kʼulukabʼaj desanimar ta yajni waxa kʼuman ja Biblia waxa wila ay jas tʼilan oja tukbʼes? (Cha kʼela ja nota).

¹² Moka kʼulukabʼaj desanimar ta waxa wila ke ay jujuntik jastik bʼa tʼilan oja tukbʼes. Ja jaw wa sjeʼa ke waxa kʼuman ja Biblia sok juna modo bʼa stojol sok chʼin waxa waʼabʼaj sok waxa jeʼa ja jastal mero kʼotela. a Ajuluka kʼujol ke yajel ajyuk «ja ajkʼach modoʼal» juni jasunuk bʼa tikʼan wa xkʼulantik (Col. 3:10). ¿Jasa oj skoltaya bʼa mi oja wakan yajel makunuk ja Yabʼal ja Dyosi?

13. ¿Jasa oj bʼobʼ skoltaya? (Cha kʼela ja potoʼik).

¹³ Jun jasunuk oj skoltaya jani mi oj jelxan bʼa junta ekʼele oj wa makunuk ja jas waxa kʼumani (Prov. 11:2). Ja jas nochani oj skoltaya: kʼulan jun lista ja jastik waxa kʼana oja tojbʼes, tsaʼa june ma chabʼe ja jas bʼajtan waxa kʼana oja kʼuluki sok aʼakan tsaʼan ja tuki. ¿Bʼaya waxa kʼana oj kʼeʼansoki?

14. ¿Jastik kʼelsat oj wa ajyuk bʼajtan?

¹⁴ Bʼajtan ojni bʼobʼ wajuka kʼujol jawa kʼelsat bʼa mas pasil oja taʼi ma ja bʼa waxa kʼana oja tojbʼesi. Yajni wanxa xa naʼa bʼa  oj kʼeʼan, leʼa impormasyon ja bʼa juʼuntiki, bʼobʼta oj wa makunuk ja Índice de las publicaciones Watch Tower ma ja Juʼun bʼa koltanel spaklajel. Ayi orasyon ja Jyoba sok kʼanayi ke ayawi «ja kʼankʼunel sok ja ipal bʼa skʼulajel» (Filip. 2:13). Tsaʼan amakunuk ja jas anebʼuneji. Yajni xa wila jastal wan lajxelawuj ojni snika bʼa oja ta pilana kʼelsat. Chomajkil, bʼobʼta ja jas oja tukbʼesi oj skoltaya bʼa oja tojbʼes ja jas nochan ja bʼa wa lista.

AʼAKAN A-STOJA JA YABʼAL JA DYOSI

15. ¿Jasa stukil ja yaʼtijumik ja Jyoba sok ja jitsan matik wa skʼumane ja Biblia? (1 Tesalonicenses 2:13).

¹⁵ Jujuntik kristyano wa xyalawe ke skʼumuneje jitsan ekʼele ja Biblia. Pe ¿meran maʼ lek wa skʼuʼane ja jas wa xyala sok yaʼunejemakan ke ja jas wa sjeʼa oj stukbʼes ja sakʼanile? Tristeni yabʼjel, pe bʼa jitsan ekʼele miyuk. ¡Tukotikni lek ja yaʼtijumotik ja Jyoba! Jastalni ja snochumanik Kristo bʼa bʼajtan siglo, wa xkisatik ja Biblia ja «jastal mero kʼoteli, jastal yabʼal Dyos». Sok ja yuj, wa xkʼujolantik bʼa sjejel ke wa stojo ja jsakʼaniltiki (kʼuman ja 1 Tesalonicenses 2:13).

16. ¿Jasa oj skoltayotik bʼa yajel makunuk ja Yabʼal ja Dyosi?

¹⁶ Mi tolabida pasiluk skʼumajel sok yajel makunuk ja Yabʼal ja Dyosi. Bʼobʼta ay ekʼele mi oj kanukawuj tyempo bʼa skʼumajel. Bʼobʼta ajnel jomol wa xkʼumantik bʼa mixa xkatik el slekilal. Ma bʼobʼta wa xkʼulan jbʼajtik desanimar yajni wa xkilatik ja jastik tʼilan oj tukbʼestiki. Chikan jas wokol xa tʼaspun, ja Jyoba ojni skoltaya bʼa oj kuchukawuj. Kisa ja skoltaneli, mok kechan amaklay ja Yabʼal ja Dyos sok oj chʼayuka kʼujol. Mas lek, amakunuk. Yajni mas waxa kʼuman ja Biblia sok wa xwa makunuk ja bʼa wa sakʼanili, masni gusto oj ajyan (Sant. 1:25).