Yajni wa xchapa jbʼajtik bʼa skʼulajel estudiar, bʼobʼta oj jobʼ jbʼajtik: «¿Jasa wa xkʼana oj nebʼi?». Ama ay jas wa xkʼana oj nebʼtik, jelni tʼilan oj nebʼtik jastik ajkʼach bʼa wa skʼana oj sjekitik ja Jyoba. ¿Jastal oj bʼobʼ jkʼuluktik?

Kʼanayi ayawi biboʼil ja Jyoba. Mok malanta awabʼ ja jas wanxa xa naʼa (Prov. 3:​5, 6). Kʼanayi ja Jyoba a-skoltaya bʼa oja wil ja jas wa skʼana oja nebʼ ja bʼa ekʼele it (Sant. 1:5).

Aʼakan ke ja yip ja Yabʼal ja Dyos a-stoj jawa sakʼanili. «Ja yabʼal ja Dyosi sakʼan ay» (Heb. 4:12). Yajni wa xkʼumantik ja Biblia, bʼobʼta ay jas ajkʼach oj sjeʼkitik sok oj skoltayotik bʼa tuktukil modoʼik, pe kechantani oj lajxuk ja it ta wa xkʼanatik oj nebʼtik jastik ajkʼach.

Ayi tsʼakatal ja Jyoba yibʼanal ja waʼelalik wa xyawiʼi. Ja waʼelal wa xjak bʼa yeʼn jach jastal «waʼelalik bʼa jel x-ajbʼani» (Is. 25:6). Moka pilkan ja «waʼelalik» bʼa waxa pensaran mi x-ajbʼani. Mi kechan oj kʼot lek bʼa weʼna, jelni oj ajbʼanuk oja wabʼi.