Ja smeranili, ayniʼa. ¿Bʼa jakyeʼa? Kilatikta ja Dyosi skʼulan ja anjeliki soka libreʼil bʼa stsajel. Tʼusan tsaʼan ja kʼulaji ja bʼajtan winik soka bʼajtan ixuki, ja Adán soka Eva, june ja anjel bʼa toji mini ya makunuk lek ja libreʼil jawi sok kʼe ya skontraʼuk ja ixuk winik sbʼaja Dyosi. Jelni lek wajyuj, bʼobʼni yuj bʼa oj skontraʼuke ja Dyosi ja Adán soka Eva (Génesis 3:1-7; Apocalipsis [Revelación] 12:9). Ja Biblia mini xyala ja sbʼiʼil ja anjel jawi mini ja yaʼtel yiʼoj ja bʼa satkʼinali bʼajtanto oj skontraʼuk ja Dyosi. Yajni sjomota sbʼaji, ja Biblia wa xya sbʼiʼiluk Satanás, wa stojolan «Kontraʼanum», sok Dyablo, wa stojolan «Abʼaltanum» (Mateo 4:8-11).

Tristeni yabʼjel, pe ti kʼejan ja skontraʼajel ja Dyosi. Ja bʼa styempo ja Noé, jun nole anjelik «sjipa kan ja snaje‘i» ja spamilya yiʼoj ja Dyos bʼa satkʼinali, koyekon bʼa luʼum sok yiʼaje jun skwerpoʼe jastal bʼa winik bʼa oj yiʼe jun sakʼanile kistal sok bʼa kux. Jachuk, spila sbʼaje juntiro soka bʼa cholal kʼulajiye (Judas 6, Ja yajkʼachil sju‘unil ja dyosi [YD]; Génesis 6:1-4; 1 Pedro 3:19, 20).

¿Jasa ekʼ soka anjelik mi lekuki? Yajni ja Dyos sjekakon ja niwan Bʼutʼ Jaʼ bʼa xchʼaya snajel ja jasa mi lekuk ja bʼa Luʼumi, yaʼawekan ja skwerpoʼeʼi sok kumxiye bʼa satkʼinal. Pe ja Dyos, mixani yaʼakan ja anjelik ma pukujik kʼoka abʼalik ojto skʼuluke «ja yatelei», mixani ya makunuk sok xchʼika «bʼa yoj kʼikʼil kʼe‘en» sbʼiʼil Tártaro (Judas 6; 2 Pedro 2:4, YD). Ja pukujiki jani aye bʼa yibʼ smandar ja Satanás, ja «sepeil ja tantic pucuji», ja maʼ wa «see sbaj jastal jun ángel ba jex lijpi» (Mateo 12:24; 2 Corintios 11:14).

Ja Biblia wa sjeʼa, ja bʼa 1914, ja Dyos ya kujlajuk jun Gobyerno ja bʼa satkʼinali. * Tsaʼan ja ya kujlajuk ja Gobyerno jawi, ja Satanás soka spukujiki aji eluke ja bʼa satkʼinali sok jipjiyekon man Luʼum, bʼa mixa xbʼobʼ skʼuluke yibʼanal ja jas wa skʼanawe. Ja jastal jelxa ipaxel ja smaloʼili soka skʼulajel ja bʼa kuxi jani jun modoʼal wa x-ilxi ja skorajaʼe sokajastal wa xchʼakwaniye ja pukujiki (Apocalipsis 12:9-12).

Pe ja jastal ipaxelxa skʼulajel ja bʼa kistali soka spekʼjel chikʼi wa sjeʼa mojanxa ja xchʼakulabʼil ja xiwel smandaranel ja pukujiki. Mojanxta, ja sGobyerno ja Dyos yeʼnani oj xchʼak-el, oj ya paxuk ja Luʼum jun kʼachinubʼ sok ojni yaʼ ja smandar mil jabʼil. Stsʼikwi ja tyempo jaw, ja pukujiki oj sijpajuke tʼusan tyempo bʼa oj yawe och probar ja ixuk winiki. Anto, tixa oj chʼayjuk snajele bʼa tolabida (Mateo 25:41; Apocalipsis 20:1-3, 7-10).