Ja Biblia wa sjeʼa, bʼa oj bʼobʼ kʼulaxuk ja jas wa skʼana ja Dyosi, ajyel ekʼeleʼik ja anjeliki yaʼojeyi skoltajel ja yatijumik Dyosi (Salmo 34:7). Jujuntik sjejel:

• Yajni ja Jyoba xchʼaya snajel ja Sodoma soka Gomorra, ja anjeliki skoltaye ja tojil Lot soka spamilya bʼa oj eluke (Génesis 19:1, 15-26).

• Yajni oxwane keremtik jipjiye bʼa jun kʼakʼal orno wan ajlel ja bʼa Babilonia, ja Dyosi ‹sjekakon ja yanjeli sok skoltay ja yaʼtijumiki› (Daniel 3:19-28).

• Tsaʼan ja ajyi jun akwal ja bʼa skʼejnal ja chojik chamele waʼini, bʼa mini jas ekʼ sbʼaj, ja aluman Daniel xcholo ja ‹Dyosi sjekakon ja yanjeli sok slutuyi ja stiʼ ja chojiki› (Daniel 6:16, 22).

Yajni tʼilan oj kʼotuk ja jas wa skʼana ja Jyoba, ja anjeliki ayni jas skʼulane soka aʼtelik ja bʼa kongregasyon ja bʼa bʼajtan siglo. Jujuntik sjejel:

• Jun anjel sjama ja spwertaʼik ja preso, ya eluk ja jekabʼanumiki sok yala yabʼye mok yaʼekan xcholjel ja bʼa templo (Hechos 5:17-21).

• Jun anjel yala yabʼ ja Felipe ti oj wajuk bʼa takin bʼej wa xwaj bʼa Jerusalén man Gaza bʼa oj xcholyabʼ jun winik waj yayi stoyjel ja Dyos man Jerusalén (Hechos 8:26-33).

• Yajni ja Dyos yila ja matik mi judíoʼuki wa xbʼobʼ ochuke kreyenteʼik, jun anjel sjeʼa sbʼaj sok jun kapitan bʼa Roma sbʼiʼil Cornelio sok yala yabʼ a-slok bʼa snaj ja jekabʼanum Pedro (Hechos 10:3-5).

• Yajni ja jekabʼanum Pedro lutji, sjeʼa sbʼaj jun anjel sok ya eluk ja bʼa preso (Hechos 12:1-11).

Ja bʼa jtyempotiki mini ay prebaʼik ta ja Dyosi wani yajel makunuk ja anjelik bʼa skoltajel ja ixuk winik jastal bʼa tyempo najate. Pe ja Jesús, yalani sbʼaja jtyempotiki: «Soka lekil rasonik sbʼaja  sGobyerno ja Dyosi ojni cholxuk ekʼ bʼa yibʼanal ja luʼumkʼinali, bʼa jachuk spetsanil ja ixuk winiki oj yabʼye bʼajtanto yuj oj jakuk ja chʼakelali» (Mateo 24:14, TNM). ¿Wan maʼ xa naʼa yeʼnle ja anjelik ja maʼ wane skʼeljel ja aʼtel jaw?

Ja libro bʼa Apocalipsis wa xyala ja anjeliki jelni latsan oj ajyuke bʼa skoltajel ja ixuk winik bʼa Luʼumi bʼa oj snebʼ-e sbʼaja Jyoba soka jasa wa skʼana sbʼaja ixuk winiki. Ja jekabʼanum Juan stsʼijbʼan: «Huaj to cho quile, ti huan jujpel ecʼ ja ba satqʼuinali otro jun ángel. Jecubal ba oj huaj yal ja yabal ja Diosi. Jaʼ bi oj huaj yal yab spetzanil ja maʼ tey ba mundo, chikan bi ba lugar culane, chican bi jas razaile, chican bi jas cʼumalile ma jas cristianoilei, pero oj bi huaj yal ja abal it mi ni nunca oj chʼacuqui. [...] ti och cʼumanuc tzatz leca, ti yalaa: --¡Xihuanic yuj ja Dios sacʼani! Aahuic yi lec stzʼacatal porque jel xa mojan ja ora jau oja huaex yi cuenta ja hua mulexi. Ja jDiostiqui, yena ni ja maʼ scʼulan ja luumi soc ja satqʼuinali. Cho scʼulan ja mari soc spetzanil ja jaʼ jumasai, jayuj sbej huala coyex mecʼan ja ba sti sat ja yeni, xchi ja ángel jau quila ba satqʼuinali» (Apocalipsis 14:6, 7). Soka jas ekʼel ja bʼa sakʼanil jitsan ixuk winik ja bʼa tyempo aytiki wani sjeʼa ja anjeliki wane koltanel soka aʼtel bʼa xcholjel bʼa sutanal ja luʼumi. Chomajkil, yajni jun mulanum wa sutxi sok wa xkumxi soka Jyoba, jelni xcha xgustoʼaxiye (Lucas 15:10).

¿Jas oj ekʼuk yajni xkʼot tikʼan ja xcholjeli? Ja kʼakʼanumik bʼa satkʼinali oj tiroʼanuke lajan soka Jesukristo, ja Ajwalal bʼa mandaranumiki, «ja bʼa kʼakʼaneli ja bʼa niwan skʼakʼuʼil ja dyosi», sbʼiʼil Armagedón (Ja swayichi [Revelación] 16:14-16, YD; 19:14-16). Ja anjelik jel yipeʼi ojni yiʼekon ja chʼakwanel bʼa nalan chaʼani yajni ja Jesús «oj jac yaa scastigo [...] ja maʼ mi cʼocxi oj scʼuuque ja abal it jel tzamal sbaj ja Cajualtic Jesucristo» (2 Tesalonicenses 1:7, 8).

Ja yujil, jastal kilatikta ja anjeliki wani xcham skʼujole bʼa weʼna, jelni xcham skʼujole sbʼaja slekilal sbʼaja matik wa skʼana oj yaʼteltay ja Dyosi. Jastal kilunejtikone, ja Jyoba yaʼunej makunuk anjelik bʼa tuktukil ekʼele bʼa stsatsankʼujolajel sok stalnajel ja yaʼtijumiki (Hebreos 1:14).

Ja yuj jpetsaniltik tʼilani ay jas oj jtsatik oj jkʼuluktik: ¿oj maʼ jmaklaytik maʼ oj jkʼantik ja lekil rasonik wan pukxel ja bʼa sutanal ja Luʼumi? Ja taʼumantiʼik bʼa Jyoba sgustoʼextani oj skoltaya bʼa oj wa el slekilal ja skoltanel ja yanjelik ja Dyosi.