YOLOMAJEL JA BʼA SPATIKI | ¿MERAN MAʼ AY JA ANJELIK?
¿Wan maʼ xkoltaniye ja anjelik ja bʼa jsakʼaniltiki?
Jun och kʼakʼu domingo, ja Kenneth soka Filomena, sbʼaje bʼa Curazao, waj yulataye jun nupanum wane sjejelyi bʼa Biblia.
Ja Kenneth yala: «Yajni kʼotikoni lutan ay ja snajeʼi, sok meyuk ja skarroʼeʼi. Pe ekʼni bʼa jpensar oj jkʼumuk bʼa telepono ja cheʼumal».
Ja ixuki sjakʼa sok yala wajel aʼtel ja statami. Pe yajni snaʼa ti aye bʼa stiʼ snaj ja Kenneth soka Filomena, sjama ja pwerta sok ya ochuke.
Wegoxta yilawe wan okʼel ajyi ja ixuki. Yajni ja Kenneth skʼulan ja orasyon bʼa oj kʼe stul-e yi ja estudio, cha jamxini yokʼel. Anto ja Kenneth soka Filomena sjobʼoweyi jas yuj ja wan okʼeli.
Ja ixuki xcholo wani spensarajel oj smil sbʼaj ja och kʼakʼu jawi sok wan stsʼijbʼajelkanyi jun juʼun ja statami, pe yuja kʼumani och ja Kenneth jayuj mi skʼulan. Xcholo tolabida tristeʼay, ja yuj skʼumaneyi jujuntik tekstoʼik bʼa jel xtulwani. Ja jastik aljiyabʼi jel koltajiyuj ja bʼa sakʼanil.
Ja Kenneth yala: «Katikonyi tsʼakatal ja Jyoba yuja yaʼakan oj jkoltaytikon ja ixuk jaw mi snaʼa jas oj skʼuluki sok yuja snikawotikon bʼa oj jkʼuluktikon, bʼobʼta ya makunuk ja yipi ma jun anjel bʼa skʼumajel bʼa telepono ja ixuki». *
¿Meran maʼ ja jas ekʼ skʼujol ja Kenneth soka Filomena bʼa yeʼn ja Dyos ja ay jas skʼulan ja ekʼele jaw, bʼa yajel makunuk jun anjel ma ja yipi? ¿Ma yujni ti kʼumani ja Kenneth?
Mi xnaʼatik ja jasa mero ekʼi, pe wani xnaʼatik ja Dyos wa xya makunuk ja yanjeliki bʼa skoltajel ja ixuk winik bʼa oj najuk sbʼaj. Jun sjejel, ja Biblia wa xyala ja Dyosi ya makunuk jun anjel bʼa stojel ja Felipe bʼa oj waj skoltay jun winik jel chaʼan xchol ja bʼa Etiopía wan slejel skoltajel bʼa Dyos (Hechos 8:26-31).
Jitsan relijyonik wa sjeʼawe ayni anjelik mi xkilatik sok ayni bʼi anjelik jel leke bʼa wa skʼulane ja jas wa skʼana ja Dyosi ma wa stalnaye ja ixuk winiki. Jitsan ixuk winik mi kechan wa skʼuʼane ayni anjelik, wani skʼuʼane wa xkoltajiye ja bʼa sakʼanileʼi. Pe cha ayni mi skʼuʼane ay anjelik.
¿Meran maʼ ay ja anjelik? Ta aykʼa, ¿bʼa jakyeʼa? ¿Jas wa xyala ja Biblia sbʼaja yeʼnle? ¿Wan maʼ skoltayotike? La kiltik ja prebaʼiki.
^ par. 8 Ja Biblia wa xyala ja Dyosi sbʼiʼil Jyoba (Salmo 83:18).
