¿Ay maʼ bʼa ekʼele bʼaj jachuk jastal alxita bʼa kʼeʼel? Bʼobʼta akʼana skʼumajel ja Biblia, pe ayni jas stimawa. Jitsan ixuk winik, jel axwela sbʼaj xyilawe ja skʼumajeli. Pe ¿lekbʼi wanukxta xa naʼa ja jas yiʼoji wa xbʼobʼ ya gustoʼaxuk sok yajelyi stojolil jawa sakʼanili? ¿Sok jaxa ta wa taʼa tuktukil modo bʼa mas oj spaya skʼumajel? ¿Oj maʼ akʼan skʼulajel probar bʼa oja wil ja jas wa skʼapawi ja Biblia?

La jpaklaytik ja jas wa xyalawe jujuntik bʼa yilawe ja slekilal yajni kʼe skʼumuke ja Biblia.

Ja Ezekiel, bʼa ayiʼoj tʼusan mas ja 20 jabʼil, yala: «Ja ajyi jachukon jastal ja maʼ wajum bʼa jun bʼej sok mi snaʼa lek bʼa wajuma, pe skʼumajel ja Biblia stojunej ja jsakʼanili. Ayiʼojan rasonik jel xmakuni bʼa kʼakʼu kʼakʼu».

Ja Frieda, bʼa ayiʼoj tʼusan mas ja 20 jabʼil, cha yala: «Jel wego la tajkiyon, pe stsʼakatal ja wanon skʼumajel ja Biblia, jnebʼata skomjel jbʼaj. Jtojbʼesta ja jmodo sok ayxa mas kamigoʼik».

Jun ixuk bʼa masxa ja 50 sjabʼil sbʼiʼil Eunice yala sbʼaja Biblia: «Wa skoltayon bʼa kʼotel jun lekil ixuk, bʼa stukbʼesel ja jastik junuk mi jel lek wanon skʼulajel».

Skʼumajel ja Biblia ojni skoltaya bʼa yabʼjel mas stsamalil jawa sakʼanili, jastal ekʼ sbʼaje ja matik jtaʼatikta tiʼali sok tuk jitsan miyon ixuk winik (Isaías 48:17, 18). Bʼa tuktukil jasunuk, ojni bʼobʼ skoltaya snajel stsajel jas oja kʼuluk, ajyel lekil awamigoʼik, snajel jas skʼulajel soka jitsan chamkʼujolik sok snebʼjel ja smeranil sbʼaja Dyos, bʼa jani mas tʼilan bʼa yibʼanal. Ja rasonik wa xyaʼa ja Biblia tini jakel bʼa Dyos, ja yuj lekni oj wajukawuj ta wa makunuki. Ja Dyosi mini tʼun xyaʼa mal rasonik.

Ja mas tʼilani jani kʼeʼel skʼumajel. Ja bʼa artikuloʼik jakumi oja taʼ modoʼalik jel xmakuni bʼa oj snika skʼumajel ja Biblia sok yabʼjel mas stsamalil.