Ja Biblia mi oj slaj ja tuk libroʼiki. Yujni ti wa xtax ja srasonik ja jKʼulumantiki (2 Timoteo 3:16). Ja rason yiʼoji wani syama jawa sakʼanili. Sok jachni wa xyala ja Biblia: «Yuj ja sakʼan ay ja yabʼal ja dyosi. ay yip» (Hebreos 4:12, Ja yajkʼachil sju‘unil ja dyosi). Ja libro it ayiʼoj ja ipal bʼa stojbʼesel jawa sakʼanil bʼa chabʼ modo: yajelyi stojelal kʼakʼu kʼakʼu sok wa xkoltani bʼa snajel sbʼaj ja Dyos soka jastik skʼapunej (1 Timoteo 4:8; Santiago 4:8).

Wa stojbʼes jawa sakʼanil. Ja Biblia wa xyaʼa rasonik bʼa wa sakʼanil weʼna sok bʼa tuk jastik junuk.

•   Jastal yiljela bʼaj soka tuki (Efesios 4:31, 32; 5:22, 25, 28, 33).

• Ja jastal waxa wabʼ aya sok bʼa lek ajyel jawa kwerpo (Salmo 37:8; Proverbios 17:22).

• Modoʼalik bʼa toj (1 Corintios 6:9, 10).

• Jastal yajel makunuk ja takʼini (Proverbios 10:4; 28:19; Efesios 4:28). *

Jun nupanum bʼa Asia bʼa mito ay skʼujole yilawe ja jastal jel xkoltani ja rasonik bʼa Biblia. Jastalni ja tuk ajkʼach nupanumik, ja yeʼnle wokolni yabʼye kʼajyele xchawanile sok yijel sbʼaje abʼal. Pe kʼe yawe makunuk ja jas wa skʼumane bʼa Biblia. ¿Jasa slekilal yilawe? Ja Vicent, ja tatamali, wa xcholo: «Ja jas jkʼuman ja bʼa Biblia skoltayon stojbʼesel sok yajtanel ja wokolik ja bʼa jnupanel. Yajel makunuk ja rasonik jaw jel yaʼunej gustoʼaxukotikon». Ja xcheʼumi, ja Annalou, jachni wa xyala: «Skʼumajel ja sjejelik bʼa Biblia jel skoltayotikon juntiro. Ja wego jel gustoʼayon sok cha jachni ja bʼa jnupaneli sok jachuk ja bʼa jkʼelsatikoni».

Wa xkoltani snajel sbʼaj ja Dyos. Mi kechanuk wa xkoltaji ja Vicent sbʼaja snupaneli, pes wa xcha yala: «Stsʼakatal ja skʼumajel ja Biblia, wa xkabʼ masxa jel mojan ayon soka Jyoba yuja ajyi». Ja yaljel it wa sjeʼa jun jasunuk jel tʼilan: ja Biblia wani xbʼobʼ skoltaya bʼa snajel sbʼaj lek ja Dyosi. Jachuk mi kechan oj wa el slekilal ja srasoniki, cha ojni bʼobʼa wamigoʼuk. Sok oja wil ja bʼa Yabʼali wa staʼa tiʼal bʼa jun lekil tyempo, bʼa oja wabʼ stsamalil tolabida ja meran sakʼanili (1 Timoteo 6:19). Ja jaw mini oj skʼapawi ja tuk libroʼik.

Ta kʼe akʼumuk ja Biblia sok kʼajyiya, ojni cha stojbʼes jawa sakʼanil ja wego sok snajel sbʼaj mas ja Dyosi. Pe bʼobʼta oj kʼe ajyukawuj sjobʼjelik yajni xa kʼumani. Yajni x-ekʼa bʼaj jachuki, ajuluka kʼujol ja lekil sjejel ja bʼa kʼakʼanum bʼa Etiopía bʼa ekʼelxa mas ja chabʼ mil jabʼil. Ja winik it jel yiʼoj sjobʼjelik sbʼaja Yabʼal ja Dyosi. Yajni ja Felipe, jun nebʼuman bʼa Jesús, sjobʼoyi ta wa xyabʼ stojolil ja jas wan skʼumajeli, ja yeʼn sjakʼa: «Miyuc, como mi ni maʼ huas sea qui». * Tixa yaʼakan ajejukyi yuja Felipe, bʼa kʼotel jun lekil jeʼuman (Hechos 8:30, 31, 34). Junxta soka it, yujkʼa waxa kʼana yabʼjel mas stojolil ja Biblia, wa xlokowatikon skʼanjel bʼa Internet bʼa jw.org ma stsʼijbʼajel ja direksyon mas mojan awiʼoj wa xtax ja bʼa rebista it. Cha ojni bʼobʼa leʼ ja taʼumantiʼik bʼa Jyoba ja bʼa wa komoni ma wajel ja bʼa Naʼits bʼa Tsomjelal. Wa xlokowatikon leʼaxa juna Biblia sok aʼakan a-stojbʼes jawa sakʼanili.