¿Jastal oj bʼobʼa wabʼ stsamalil skʼumajel ja Biblia sok yajel eluk mas slekilal? Paklay joʼe modo bʼa koltubʼale jitsan kʼumumanik.

Tsaʼa jun lekil lugar. Leʼa jun lugar bʼa laman. Mok jas jel sjoma wolom, aʼajyuk ijlabʼ sok jun lugar presko bʼa jachuk masni oj wajuka kʼujol ja skʼumajel.

Aʼajyuk jaman jawa pensari. Ja Biblia juni majtanal bʼa jTatik Dyos. Ojni wa eluk mas slekilal ja skʼumajel ta jachuk jawa modo jastal bʼa jun yal untik yajni ay jas wa xjeʼjiyi yuja stati. Yujkʼa waxa kʼenay ma aya wiʼoj pensarik bʼa mi tojuk sbʼaja Biblia, moka kis ja jaw sok mas lek aʼakan a-sjeʼawi ja Dyosi (Salmo 25:4).

Ayi orasyon bʼajtanto oja kʼumuk. Ja Biblia ayiʼoj ja spensar ja Dyosi, ja yuj wani xkʼanatik ja skoltanel bʼa yabʼjel stojolil. Ja yeʼn wa skʼapa «oj yaa yi ja Espíritu Santo ja maʼ huan scʼanjeli» (Lucas 11:13). Ja «Espíritu Santo» oj bʼobʼ skoltaya yabʼjel stojolil jastal wa spensaraʼan ja Dyosi. Soka tyempo, ojni jamxuk jawa pensar bʼa yabʼjel stojolil ja jastik wa snaʼa ja Dyos bʼa nakʼan ay (1 Corintios 2:10).

Abʼan stojolil. Mi kechanta lom skʼumajel. Pensaraʼan ja bʼa jas wana skʼumajel. Jobʼo abʼaj: «¿Jastik modoʼal wa xkila sbʼaja ixuk ma winik ja bʼa loʼil it? ¿Jastal oj ka makunuk ja it ja bʼa jsakʼanil?».

Aʼajyuka kʼelsat. Bʼa yabʼjel stsamalil skʼumajel, leʼa modo snebʼjel jun jasunuk bʼa oj skoltaya ja bʼa wa sakʼanil. Ojni bʼobʼ ajyuka kʼelsat bʼa snajel sbʼaj mas ja Dyosi, kʼotel jun lekil ixuk winik, jun lekil tatamal ma cheʼumal, sok tuk jastik. Tsaʼan, tixa leʼa xetʼanik bʼa Biblia bʼa oj skoltaya stajel jawa kʼelsatiki. *

Ja joʼe modoʼik it oj skoltaya jastal kʼeʼel skʼumajel. Pe ¿jastal oja kʼuluk bʼa oj spaya mas yajni xa kʼuman ja Biblia? Ja bʼa artikulo jakumi ayiʼojan jujuntik modo.