PENSARAʼAN wajuma bʼejyel bʼa yoj akwal. Ama waʼxatik mukxi ja Kʼaʼuji, mini chʼayeluka xa wabʼ aya yujni aya wiʼoj juna lekil joko. Yajni waxa chʼutu bʼa koʼel, wani xa wila jasun ay ja bʼa stiʼ asati. Sok yajni waxa wa kʼeʼuki, ja lekil xojobʼi wa xya awil jun makʼe lek jawa bʼeji.

Bʼa tuktukil modo, ja Biblia jach jastal jun joko. Jastalni kilatik ja bʼa artikuloʼik ekʼta, ja Yabʼal ja Dyos wa skoltayotik bʼa kuchelkujtik ja jas wa xtʼaspuntiki: ja wokolik wa x-ekʼ jbʼajtik ja bʼa jsakʼaniltik ja bʼa luʼumkʼinal it wanxta ipaxel. Pe mi kechan wa skoltayotik sbʼaja jaw. Cha wa stojowotik ja bʼa jsakʼaniltik, pes wa xya kiltik ja sbʼejlalil wa xyiʼajotik och sbʼaja gustoʼil bʼa tolabida sok wa skoltayotik bʼa oj jnochtik (Salmo 119:105). ¿Jastal wa skʼulan?

La kiltik chabʼ modo jel xmakuni bʼa jastal wa skoltayotik ja Biblia bʼa oj wajkujtik lek: 1 Wa xyayi stojolil ja jsakʼaniltiki sok 2 wa sjeʼakitik jastal oj kamigoʼuktik tolabida ja jKʼulumantiki, ja Jyoba.

Ja Biblia wa xyaʼakitik lekil rasonik bʼa oj kuchkujtik ja wokolik, pe mi kechanuk kʼotel jun libro bʼa koltanel. Wa sjeʼakitik bʼa oj waj jkʼujoltik ja swokolik ja tuki, sok mi kechanuk ja jbʼajtiki. Ta jach wa xkʼulantik, ojni ajyuk stojolil ja jsakʼaniltiki.

Jun sjejel, pensaraʼan sbʼaja rasoni it bʼa Biblia: «Mas ni jel lec huax yila ja maʼ huax yaa que yuj ja maʼ huas scʼulan recibiri» (Hechos 20:35). ¿Ay maʼ bʼa jun ekʼele akoltay june maʼ wan yijel wokol yuja takʼini? ¿Ma amaklay juna wamigo bʼa wa skʼana oj xcholawabʼ ja jastal ay wa xyabʼi? ¿Anke jelni lek awabʼi ja yajni ay maʼ akoltayi?

Masni gusto wala ajyitik yajni wa xkaʼatik jun jasunuk bʼa mi xmajlatik slokʼol. Jun tsʼijbʼanum yala: «Tʼusan mi tolabidaʼuk masni wa x-aji kumxukitik yajni ay jas wa xkaʼatiki, pe jaʼita ta wa xkaʼatik jun jasunuk bʼa mi wa xmajlaytik slokʼol». Pe  yajni wa xchʼaka jbʼajtik sbʼaja tuki, jastal ja matik mi xbʼobʼ yawe kumxukitik slokʼol, ayni jas wa x-ajikitik. Ay kiʼojtik ja cholal bʼa skoltajel ja jKʼulumantiki, bʼa wani xyabʼ jelal ay jmoktik yuja slekil jkʼujoltiki (Proverbios 19:17). Ja Dyos jel chaʼanyabʼalil xyila ja jas wa xkʼulantikyi ja tuki. Ja yuj wa skʼapa oj stupkitik sok jun jasunuk jel tsamal jastal ja jsakʼaniltik bʼa tolabida bʼa jun kʼachinubʼ ja bʼa Luʼum. ¡Juni tsamal smajlajel! (Salmo 37:29; Lucas 14:12-14). *

Pe ja Biblia wa sjeʼa bʼa ajyel stojolil ja jsakʼaniltiki tʼilani oj kaʼteltaytik ja Dyos smeranili, ja Jyoba. Ja Yabʼali wa slokowotik bʼa stsʼebʼantajel, stoyjel sok skʼuʼajelyi jastalni wa sbʼajin ja yeʼn (Eclesiastés 12:13; Apocalipsis [Revelación] 4:11). Yajni jach wa xkʼulantik, ayni jas wa xlajxikujtik bʼa jel chaʼanyabʼal: wa xkatik gustoʼaxuk ja skʼujol ja Dyos. Sok yeʼnani wa skʼanakitik: «Bibo ajyan, kala kunin kerem, agustoʼaxuk ja jkʼujoli» (Proverbios 27:11). ¿Ay maʼ bʼa jun ekʼele apensaraʼunej jachuk? Yajni wa xnochotik ja rasonik bʼa Biblia sbʼaja jastik lek wa stsaʼatik skʼulajel, wani xkatik gustoʼaxuk ja jTatik Dyosi. ¿Jas yuj? Yujni ja yeʼn wa xcham skʼujol jmoktik sok wa skʼana oj jnochtik ja srasonik bʼa oj wajkujtik lek (Isaías 48:17, 18). Sbʼaja yaʼteltajel ja Kajwaltik bʼa sutsatkʼinali sok ja yajel gustoʼaxuk ja skʼujoli, ¿ay maʼ pilan jasunuk bʼa oj bʼobʼ yayi mas stojolil ja jsakʼaniltiki?

Ja Biblia cha wa sjeʼakitik jastal oj kamigoʼuktik ja jKʼulumantiki. Jun sjejel, wa xyala: «Ajyanic cʼuban soc ja Diosi, jach ni ja yeni, mojan ni oj ajyuc amoquexa» (Santiago 4:8). Bʼobʼta wokol wa xkabʼtik skʼuʼajel ja wa xbʼobʼ kamigoʼuktik ja jKʼulumantik maʼ jel yipi. Pe ja Biblia wa skʼapakitik ta wa xleʼatik ja Dyos, ojni jtatik, yujni «mi ni najatuc ay jmoctica» (Hechos 17:27). Snochjel ja rason bʼa Biblia bʼa yamigoʼajel ja Dyosi juni modo jel xkoltani bʼa xchapjel ja jsakʼaniltiki. ¿Jas yuj?

Pensaraʼan sbʼaja it: ama xleʼatik jitsan modo, mini xbʼobʼ elkotik libre ja bʼa skʼabʼ ja chamel chʼakeli, ja niwan jkontratiki (1 Corintios 15:26). Pe ja Dyosi tolabida sakʼan ay. Mini oj chamuk ja yeʼn sok wa skʼana ja yamigoʼiki oj cha ajyuke sakʼan bʼa tolabida. Ja Jyoba wa xyala ja jas wa skʼana sbʼaja matik wa xlejiyuji soka tsamal yaljelik it: «Abʼan stsamalil jawa sakʼanil bʼa tolabida» (Salmo 22:26).

¿Pe jastal oj bʼobʼa wamigoʼuk tolabida ja Dyosi? Moka wakan snebʼjel sbʼaja yeʼn ja bʼa yojol ja Yabʼali, ja Biblia (Juan 17:3; 2 Timoteo 3:16). Kʼanayi ja skoltajel bʼa oja wabʼ stojolil. Ja Biblia wa skʼapakitik, ta mi xkatikan skʼanjelyi biboʼil ja Dyosi sok spetsanil jkʼujoltik, ojni yakitik * (Santiago 1:5). Sok cha kʼujolan yajel makunuk ja jas waxa nebʼa; jachuk, ja Yabʼal ja Dyosi oj kʼot ‹jun lámpara sbʼaja wa woki sok jun ijlabʼ ja bʼa wa bʼeji› ja bʼa wego sok bʼa tolabida (Salmo 119:105).