Ja Diana, ja it jtaʼatik tiʼal ja bʼa bʼajtan artikulo, yabʼ lajansok ja jitsan chamkʼujoli jaʼ wa xtʼenji yuj bʼa oj yuʼ mas. Ja Biblia mi xyala ta malo ja yujel tʼusan ja trago, pe cha wani xyala: «Mokni ajyan soke ja matik jel wa xjelxiye yujel vino» (Proverbios 23:20). Ja jelxel yujel trago wa xyiʼajan tsatsal chamelik, wa sjomo ja jastal wala taxtik soka tuk sok jitsan miyon bʼa mito ay skʼujole wa xchamye spetsanil ja jabʼiliki. Ja lekukxta wanuk skʼuʼane ja rasonik bʼa Biblia, mini oj ekʼ sbʼaje jachuk.

Jach skʼulan ja Diana, bʼa wa xyala: «Kila ja yujel ja trago mini xya lamxuk ja jchamkʼujoliki. Kʼe jkʼuʼuk ja rason bʼa Filipenses 4:6, 7: ‹Mix cham acʼujolex. Cʼumanic ja Diosi. Cʼanahuic yi lec pavor ja Dios ba oj scoltayex›. Snajtil akwal, yajni ja jchamkʼujolik wanxta ipaxel, wa xkayi orasyon ja Jyoba sok wa xkalayabʼ jastal ayon: ja jkoraja, ja syajal xkabʼi, sok ja mixa xnaʼa jas oj jkʼuluki... sok wa xkʼanayi bʼa oj skoltayon spensarajel jastik lek. Ja bʼa pilan kʼakʼu, wa xkʼulan ja janekʼ wa xbʼobʼkuj ajyi bʼa oj kakan ja pensarik mi lekuki. Yajelyi orasyon ja Jyoba skoltayon bʼa jaʼ oj waj jkʼujol ja bʼa jas kiʼoji sok mi jaʼuk ja bʼa  mey kiʼoji. Kaʼakan yujel ja trago yujni jel chaʼanyabʼal xkila ja lamanil jtaʼuneji sok mixani xkʼana oj jchʼaye».

Ja koʼel mulal sok ixuk winik jani june ja bʼa jasunuk jel xyajbʼesniʼi. Pe ja rasonik bʼa Biblia wa skoltayotik bʼa mok ekʼ jbʼajtik ja jasunuk jaw yujni wa xyala jastal wa xkʼejan, jastal ja lom tsakwanel ma ja skʼeljel ixuk winik bʼasan. Jun kerem sbʼiʼil Samuel wa xyala: «Ja lom tsakwanel mini wokoluk... Ayni ekʼele, mini yuj wa xkʼana ja akʼixi, pe ja yeʼn wani xkʼanwani, soka jaw jel tsamal xya wajuk». Sok tsaʼan, yuja jel xlejiyi smul yuja lom wa stsakwani, ama mi jaʼuk ja jas wa skʼana, ja Samuel tixa gana och skʼuluka, pe wani xyajbʼesji yuja skʼujoli. Ja wego wa xyala: «Ja lom tsakwanel wani xyajbʼesni, wa skʼulan bʼa kechanta weʼn oja pensaraʼukabʼaj».

Ja Samuel skʼuman jun artikulo bʼa keremtik akʼixuk wa xtax ja bʼa sitio jw.org. Chomajkil spensaraʼan sbʼaja Proverbios 20:11, bʼa wa xyala: «Sok ja keremi jani wa xnaji sbʼaja yuja jasa wa skʼulani, ta ja smodo sak sok toj». ¿Jastal koltaji yuja rason it? Ja Samuel yila ja lom tsakwanel mini sakuk sok mi tojuk. Cha yala: «Jnaʼa ja maʼ jachʼ wa skʼulani mini oj kʼotuk jun lekil tatamal. Jpensaraʼan jastal maʼ oj yil ja maʼ oj kʼot jcheʼumuk ja lek xyila wanon lom stsakjel jun ixuk. Ja jaw ya jnaʼ kʼinal mini lekuk. Jel wego skʼulajel ja jaw pe mi wa stojolan lek». Ja Samuel stukbʼes sbʼaj sok ja jaw koltajiyuj bʼa mi oj koʼ mulal sok jun ixuk.

Pe ja jastal wa xtax ajyi ja Antonio mastoni xiwela sbʼaj: mixa xyaʼakan skʼeljel bʼasan ixuk winik. Ama jel skʼana ja xcheʼumi, tikʼanxta wa skʼela ajyi ja jasunuk it. Sok wa xjul skʼujol jel koltajiyuj ja rason bʼa 1 Pedro 5:8: «Qʼuelan jacan ajyanic porque ja diablo ti huan ahuanel ecʼ jastal jun tan choj. Jel xa puesto ay ba oj sbuquex coe». Ja Antonio wa xyala: «Chikan bʼaʼa ay dibujoʼik bʼa bʼasan ixuk winik, bʼa wokol wa xchʼay jkʼujoltik. Ja bersikulo jaw ya jpensaraʼuk bʼa wa xjak ja jastik junuk jaw. Tʼilan wego oj kaʼ jul jkʼujol ja jastik kistal jaw tini jakel bʼa Satanás. Ja wego wa xnaʼa kechan yeʼn ja Jyoba wa xbʼobʼ skoltayon bʼa oj ajyukon bibo, kʼelan jakan, stalnajel ja jpensari, ja jkʼujoli sok ja jnupaneli». Ja Antonio koltaji sok yaʼanikan ja jas mi lek wa skʼulani. Stsʼakatal yuja jaw, mini ekʼ sbʼaj tsatsal wokolik.

Tini wa x-ilxi ja Biblia ayiʼoj rasonik jel xkoltani bʼa mok ekʼ jbʼajtik tsatsal wokolik. ¿Pe jaxa ta wa x-ipaxi-el ja wokoliki sok mi xbʼobʼ jtojbʼestik? La kiltik jastal wa xbʼobʼ skoltayotik ja Yabʼal ja Dyos ja bʼa ekʼeleʼik jaw.