Ja Rosi wa xyala: «Jel xkaʼa jkʼujol jujuntik wokol yujni mi xkaʼakan spensarajel ja jas mi lek oj ekʼuki». ¿Jastik teksto bʼa Biblia koltajiyuj? June jani ja Mateo 6:34: «Mix cham acʼujolex. Mi sbejuc najtil tiempo ja hua pensarexi. Cʼacʼu cʼacʼu huan eqʼuel ahuocolexi». Ja Rosi wa xyala ja yaljelik it bʼa Jesusi jel koltaji bʼa mok jel chamskʼujol ja jas ojto ekʼuk ja jecheli. Sok cha yala: «Bʼutʼelonxa wokol bʼa tito oj jchamkʼujol jastik bʼa mito ekʼeluk sok bʼobʼta mini oj kʼot ekʼuk».

Ja Yasmín cha jelni x-och spensar. Wa xcholo: «Jel la okʼyon ajyi sok jujuntik akwal mini x-och jwayel. Ja pensarik bʼa mi lekuki wanxta sjomjel ajyi ja jsakʼanili». ¿Jas teksto koltajiyuj? Jani ja 1 Pedro 5:7, bʼa wa xyala: «Spetzanil ja hua huocolexi soc ja hua pensarexi, ti xa huaahuex can ja ba scʼab ja Diosi porque ja Diosi, huan nix yaahuex sata». Ja Yasmín cha wa xyala: «Mini kaʼakan yajelyi orasyon ja Jyoba, sok ja tyempo sjakʼaki ja korasyoniki. Xlikiki kabʼ kanyon. Ayni ekʼele wantoni xpensaraʼan jastik bʼa mi lekuk, pe wanxa xnaʼa jas oj jkʼuluk».

Jun akʼix sbʼiʼil Isabella wa xyala: «Ja kʼajyel yajelkan skʼulajel ja jastik junuk bʼa tsaʼan wa xnebʼxi, pes jachni wa skʼulan ja jtati. Ayni ekʼele wa xkaʼakan tsaʼan skʼulajel ja jastik tʼilani yuj kechanta bʼa skʼeljel telebisyon ma jijlel. Mini lekuk kʼajyel skʼulajel jachuk, pes mas wa xchamakʼujol, sok mixa xa kʼulan lek ja jastik junuki». Jun rason bʼa Biblia bʼa jel koltaji jani ja 2 Timoteo 2:15, bʼa wa xyala: «Cʼulan fuerza ba oj ecʼan jastal jun atjum probado ay lec. Scʼan to Dios mi oj qʼuixhuan ja cʼacʼu jahui». Ja Isabella wa xyala: «Mi xkʼana oj ka kʼixwuk ja Jyoba yuja kaʼteli yuj smul yajelkan tsaʼan».

Bʼa pilan, ja Kelly wa xcholo: «Yajni ay kiʼoj jun aʼtel oj jkʼuluk, tsaʼanto wa xkʼulan. Tixa jel xchamjkʼujola, wala okʼyon sok wa xtekʼa wayel. Ja jaw mini tʼun skoltayona». Ja rason bʼa Proverbios 13:16 jel koltajiyuj: «Ja maʼ wa spensaraʼan leki wa snaʼa lek jas oj skʼuluk, pe ja maʼ sonso wa xchiktes ja sonsoʼili». Ja yeʼn wa xcholokabʼtik ja jas snebʼa sbʼaja teksto jaw: «Jelni lek oj jpensaraʼuktik sok xchapjel lek bʼajtantoyuj jas oj jkʼuluktik. Ja wego jtsʼijbʼunej bʼa jun juʼun bʼa ti wa xyala ja jastik oj jkʼuluki; wa skoltayon bʼa oj chʼak jkʼuluk ja jas wa xkʼana sok mi yajelkan tsaʼan».

«Ja jtatami sjipawonkan sok ja chane yal kuntikil», wa xcholo ja Cristina. ¿Jas teksto koltajiyuj? Ja Proverbios 17:17 wa xyala: «Jun mero amigo wa xkʼanwani spetsanil tyempo, sok wa sjeʼa sbʼaj lajansok jun amoj-alijel ja yajni wan ekʼel wokoli». Ja yeʼn sleʼa skoltajel bʼa tuk yaʼtijumik Dyos. ¿Jastal wajyuj? «Ja kamigoʼik skoltayone bʼa tuktukil modo. Jujuntik yiʼawejan jwaʼeltikon sok nichimik. Ja oxe ekʼele jtukbʼes jbʼajtikon naʼits, ja jitsan kamigotikoni jel skoltayotikon ja keʼn sok ja kuntikili. Chomajkil, ayni maʼ skoltayon bʼa stajel kaʼtel. Ja kamigoʼik mini yaʼawonekan».

Ja Diana, jtaʼatikta tiʼal bʼajtani, cha yabʼni jel stuchʼil ay. Ja yeʼn wa xjul skʼujol jastal yabʼ yuja jastik mi lekuk ekʼ sbʼaji: «Ja jsakʼanili jach jastal jun pelikula bʼa wan ekʼel sok ja keʼn kechanta wa xkan jkʼele. Jel jtuchʼil xkabʼ ayon». Jun teksto jel koltajiyuj jaʼa Salmo 68:6: «Ja Dyos wan snoljel bʼa naʼits ja matik stuchʼil aye». Ja Diana wa xcholo: «Wani xnaʼa ja bersikulo it mi jaʼukta wan yaljel ja Dyos wa xyakitik jun meran jnajtik. Kabʼ stojol ja Dyos wan skʼapjelkitik bʼa oj ajyukotik kʼubʼansok, jun lugar bʼa mi jas oj ekʼ jbʼajtik, bʼa mi jas oj skʼulkitik palta sok ajyel tsoman soka matik wa syajtaye ja Jyoba. Pe wani xnaʼa bʼa ajyel mojan soka tuk, tʼilani oj cha jleʼ ja Dyos. Ja Salmo 37:4 skoltayon bʼa oj kil ja jaw. Ja tiw wa xyala: ‹Taʼa tsamal gustoʼil bʼa Jyoba, sok ja yeʼn oj yawi ja jastik wa skʼana jawa kʼujol›».

Ja Diana wa xyalakan ja it: «Kila ja stʼilanil oj ajyukon mas kʼubʼan sok ja Jyoba. Mini maʼ oj slaj ja yeʼn. Jkʼulan jun lista sbʼaja jastik oj jkʼuluk soka kamigoʼiki bʼa junxta spensare yiʼoje bʼa Dyos jastal keʼna. Jnebʼa ja oj waj jkʼujol yiljel ja jastik lek wa skʼulan ja tuk sok mi skisjel ja mi lek wa skʼulane».

Pe ja matik wa xyaʼteltaye ja Dyos nake mulanume. Ja taʼumantiʼik bʼa Jyoba ayni jwokoltikon, jastalni ja tuki. Pe ja matik wa skʼuʼane ja jas wa xyala ja Biblia wa skʼujolane bʼa skoltajel ja janekʼ wa xbʼobʼyujile ja tuki. Ja yuj, ajyel kamigotik bʼa jach smodoʼe jastal jaw jani ja mas leki. Pe ja wego, ¿wan maʼ xbʼobʼ skoltayotik ja Biblia bʼa oj kuchkujtik ja wokolik mi xbʼobʼ tojbʼuki, jastal jun chamel mey yajnal ma wa xcham jun jpamilyatik?