Bʼobʼta yajni ay maʼ wa xkʼanatik snajel sbʼaj, wa xjobʼotik: «¿Jasa bʼiʼil?». Ta katikyi ja sjobʼjel it ja Dyos, ¿jasa maʼ oj yalkabʼtik?

«Keʼna Jyoba. Jani jaw ja jbʼiʼili» (Isaías 42:8).

Jel tʼilan sbʼaja Dyos. Mini maʼ sleʼayi ja sbʼiʼil ja Dyos; yeʼnani stsaʼa. Ja Jyoba yala: «Ja it ja jbʼiʼil bʼa tolabida, sok jach oj julskʼujole ja tuktukil lame ixuk winiki» (Éxodo 3:15). Ja bʼa Biblia, ja sbʼiʼil ja Dyos wa xtax mas ekʼeleʼik yuja yaljelik jastal, ja maʼ jel juntiro ja yipi, Tatal, Ajwalal ma Dyos sok mastoni yuja tuk bʼiʼilalik, jastal Abrahán, Moisés, David ma Jesús. Pe mi kechanuk ja jaw, ja Jyoba wa skʼana oj jnatik ja sbʼiʼili, pes ja Biblia wa xyala: «Bʼa oj snaʼ ja ixuk winiki ja weʼn, wa bʼiʼil Jyoba, kechan weʼn ja Mas Niwana bʼa spetsanil ja luʼumkʼinali» (Salmo 83:18).

Jel tʼilan sbʼaja Jesús. Ja orasyon bʼa wa xnaji sbʼaj jastal jtatik Dyos, ja Jesús sjeʼayi ja snebʼumanik jastal oj yaweyi orasyon ja Dyos soka yaljelik it: «Asakbʼuk jawa bʼiʼili» (Mateo 6:9, TNM). Ja Jesús yalani yabʼ bʼa orasyon ja Dyos: «Tatey. toyo ja wabʼi‘ili» (Juan 12:28, Ja yajkʼachil sju‘unil ja dyosi). Bʼa Jesús jani mas tʼilan stoyjel ja sbʼiʼil ja Dyos, ja yuj bʼobʼni yal: «Caa ta snae mach ayaa y oj to ca snae mas» (Juan 17:26).

Jel tʼilan sbʼaja matik wa snaʼawe sbʼaj ja Dyos. Ja yaʼtijumik Dyos bʼa najate snaʼawe ja talnanel sok ja koltanel ajiyile tini chʼikan ja sbʼiʼil ja Dyos. June bʼa yeʼnle yala: «Ja sbʼiʼil ja Jyoba jach jastal jun yijil naʼits. Ja maʼ toji ti wa xwaj ajnel tiw sok wa x-ajiyi skoltajel». Sok pilan cha yala: «Spetsanil ja maʼ wa xyala ja sbʼiʼil ja Jyoba oj kanuk sakʼan» (Proverbios 18:10; Joel 2:32). Ja Biblia wa sjeʼa ja  sbʼiʼil ja Dyos ojni xchiktes ja yaʼtijumik. «Spetsanil ja chonabʼi, jujune ja yeʼnle jani oj wajukesok bʼa sbʼiʼil ja sdyoseʼi, pe ja keʼntikoni, jani oj wajkotikonsok bʼa sbʼiʼil ja jDyostikon Jyoba masan bʼa tolabida» (Miqueas 4:5; Hechos 15:14).

Wa sjeʼa kechanta yeʼn Dyos. Jitsan paklanumik jel chapane akwerdoniʼaye ja bʼiʼilal Jyoba wa stojolan «Yeʼn wa sKʼulan bʼa Akʼotuk». Ja modo jastal yala sbʼaj ja Jyoba yajni loʼilani soka Moisés wa skoltayotik bʼa yabʼjel stojol ja sbʼiʼili. Ja Dyos yala: «Keʼn oj Kʼotkon ja Jastalni wa xKʼana» (Éxodo 3:14). Ja yuj, ja sbʼiʼili wa sjeʼa yeʼn ja Kʼulumani, ja maʼ wa skʼulan bʼa oj ajyuk ja jastik junuki. Chomajkil, wa sjeʼakitik ja yeʼn wa xbʼobʼ kʼotuk ma wa xbʼobʼ ya makunuk ja skʼulbʼeni bʼa skʼulajel chikan jasa bʼa akʼotuk ja jas wa skʼana. Ama ja tuk yal sbʼiʼilik yiʼoji wa xyala sbʼaja yaʼteli, ja xcholi ma ja yipi, pe kechanta ja mero sbʼiʼili, Jyoba, wa xyala spetsanil jastal kʼotel ja yeʼn soka jastik oj bʼobʼ skʼuluki.

Wa sjeʼakitik ja Dyos wa xchamskʼujol jmoktik. Ja jas wa stojolan ja sbʼiʼil ja Dyos wa sjeʼakitik janekʼto wa syajtay yibʼanal ja skʼulbʼeni, cha tini ay ja keʼntiki. Yuja wa xyalakabʼtik ja sbʼiʼili wa sjeʼa wani skʼana oj jnatik sbʼaj, pes yeʼnani sjeʼakitik bʼajtan ja sbʼiʼili bʼajtantoyuj oj bʼobʼ jobʼtik jbʼajtik. Chikani lek ja Dyos mini skʼana oj jpensaraʼuktik jel najat ay, wa skʼana la kiltik meran sakʼan ay bʼa wani xbʼobʼ mojxukotiksok (Salmo 73:28).

Yajel makunuk ja sbʼiʼili, wa xjeʼatik wa xkisatik ja yeʼn. Pensaraʼan ay maʼ waxa kʼana oja wamigoʼuk sok waxa walayabʼ a-skʼumuka bʼa wa bʼiʼil. ¿Jastal maʼ oja wabʼ lek xyalawabʼ miyuk? Bʼobʼta ja weʼn oja pensaraʼuk mi skʼana oj yamigoʼuka. Junxtani soka Jyoba. Ja yeʼn yalunejkabʼtik ja sbʼiʼili sok wa skʼana oj katik makunuk. Yajni wa xkʼulantik, wa xjeʼatik wa xkʼanatik oj mojxukotiksok. Ja Biblia wa xyala ja Dyosi wani snaʼa machʼa wan spensarajel sbʼaja sbʼiʼili (Malaquías 3:16).

Snajel ja sbʼiʼil ja Dyos jelni tʼilan bʼa oj kʼe jnatik sbʼaj. Pe mi malanuk ita soka jaw. Tʼilan oj jnatik sbʼaj ja maʼ yiʼoj ja bʼiʼilal jaw sok snajel ja smodo.