Ja slekilal snajel sbʼaj ja Dyos
Pes ja wego jnebʼatikta jujuntik jasunuk wa skoltayotik snajel machunkiluk ja Dyos. Jnebʼatikta ja Biblia wa xyala ja Dyos sbʼiʼil Jyoba sok ja mero lekil smodo wa sjeʼa jani ja syajal skʼujol. Cha jnebʼatikta ja jas skʼulunej sok oj skʼuluk bʼa slekilal ja ixuk winik. Pe snajel sbʼaj ja Dyos ayto jas mas chʼikan, ja yuj bʼobʼta oja jobʼabʼaj ta ojni skoltaya.
Ja Biblia wa xyalawabʼ ta leʼa ja Jyoba, ja yeʼn ‹ojni yaʼ sbʼaj tajela› (1 Crónicas 28:9). Ta akʼujolan snajel sbʼaj, oja wabʼ ja stsamalil ajyel kʼubʼan soka yeʼn (Salmo 25:14). ¿Jasa slekilal oja taʼ ajyel kʼubʼan soka yeʼn?
Oj ajyan meran gusto. Ja Biblia wa xyala ja Jyoba yeʼnani ja ‹Dyos jel gusto x-ajyi› (1 Timoteo 1:11, TNM). Ta akʼujolan mojxel soka yeʼn sok yijel ja smodo, oj ajyan meran gusto, sok ja it oj skoltaya bʼa lek oj taxuk jawa pensari, jawa kʼujoli sok jawa kwerpo (Salmo 33:12). Chomajkil, ja Dyos oj skoltaya bʼa oj kʼajyan yijel jun alekil asakʼanil, yajelkan ja jas mi lekuki sok yiljelabʼaj lek soka tuk. Sok ojni kʼota wil smeranil ja jas yala ja tsʼebʼanum: «Pe jbʼaja keʼn, mojxel soka Jyoba jelni leka» (Salmo 73:28).
Oja wabʼ ja tsamal stalnanel ja Dyos. Ja Jyoba wa skʼapayi ja yamigoʼik: «Ojni kaʼa jsata bʼa oj kawi rasonik» (Salmo 32:8). Ja it wa stojolan ja Jyoba wa stalnay jujune ja yaʼtijumiki sok wa xyayile ja jas mero wa xmakuniyujileʼi (Salmo 139:1, 2). Yajni xkʼota wamigoʼuk ja Jyoba, oja wil ja yeʼn tolabida oj skoltaya.
Jun tsamal asakʼanil ja bʼa tyempo jakumi. Mi kechanta oj skoltaya bʼa gusto oj ajyan ja wego, cha wa skʼapawi jun tsamal asakʼanil ja bʼa tyempo jakumi (Isaías 48:17, 18). Ja Biblia wa xyala: «Wa stojolan sakʼanil bʼa tolabida, ja oj najukabʼaj ja weʼn, ja kechanta Dyos smeranili, sok ja maʼ ajekakon, ja Jesukristo» (Juan 17:3, TNM). Yuja jas skʼapunejkitik ja Dyos, wa skoltayotik bʼa oj jkʼuʼuktik lek sok bʼa mi oj axwukotik ja bʼa tyempoʼik it jel wokoli (Romanos 4:20).
Ja it kechanta jujuntik sjejel sbʼaja slekilal wa xtaʼatik snajel sbʼaj ja Dyos sok kʼotel yamigoʼajel. Ta waxa kʼana oja naʼ mas, wa xlokowatikon bʼa sjobʼjelyi jun taʼumantiʼ bʼa Jyoba ma ochel bʼa jsitiotikon bʼa Internet jw.org.
Bʼobʼta cha ojni akʼul gusto
SJEJELIK JEL TʼILAN BʼA BIBLIA
¿Oj maʼ bʼobʼ kamigoʼuktik ja Dyos?
Bʼa jitsanxa siglo, ja kristyano yiluneje ja stʼilanil bʼa snajel sbʼaj ja sKʼulumane. Ja Biblia ojni bʼobʼ skoltayotik bʼa oj kamigoʼuktik ja Dyos. Bʼa yamigoʼajel jani bʼajtan tʼilan oj natik ja sbʼiʼili.
