Jitsan mil jabʼil mi maʼ wa snaʼa jastal wa spuku sbʼaj, sok jitsan miyon kristyano chamye yuja chamelik jel wego spuku sbʼaji. Soka tyempo, ja científico snaʼawe ja smeranil sbʼaja jaw. Sjeʼawe ja chamelik jani wa xyaʼa malo ja xchajnuliki, jastal ja microbio ma virus. Slejel ja smeranil sbʼaja jawi koltanel bʼa snajel jas oj kʼulaxuk bʼa yajnajel ja chameliki, sok jachuk miyonik kristyano aʼajyuke sakʼan mas tyempo sok bʼa mi jel oj yamjuke chamel.

¿Pe jas wa xbʼobʼ kaltik sbʼaja tuk sjobʼjelik mas tʼilaniki? ¿Oj maʼ bʼobʼ stukbʼes jawa sakʼanil snajel ja smeranil sbʼaja sjobʼjelik it?

• ¿Machunkiluk ja Dyos?

• ¿Machunkiluk ja Jesukristo?

• ¿Jasunkiluk ja sGobyerno ja Dyos?

• ¿Jas oj ekʼ jbʼajtik ja bʼa tyempo jakumto?

Miyonik kristyano staʼaweta sjakʼjel ja bʼa sjobʼjelik jaw, sok masxa lek ay ja sakʼanile. Ja sjakʼjeli ojni cha bʼobʼ skoltaya ja weʼn.

Bʼobʼta oja jobʼabʼaj ta ojni anaʼ ja smeranil bʼa jun jasunuk. Pes kʼakʼu kʼakʼu masxani wokol snajel bʼay ja bʼa smeranili soka bʼa mi meranuki. ¿Jas yujil?

Jitsan kristyano mixa sjipa skʼujole ja jas wa xyala ja gobyernoʼik, ja empresaʼik soka matik wa xyawe el notisyaʼik. Ja kristyano wokolni xyabʼye snajel ta ja tuki wane yaljel ja smeranil bʼa jun jasunuk ekʼel, ma kechanta wane yaljel ja spensare sok mi xyalawe spetsanil ma wane slejel abʼal. Yuja jitsan kristyano mixa sjipa skʼujol sbʼaje sok jitsan ja bʼa jasa wa x-alxi mixa meranuk, ja kristyano mixa snaʼawe bʼay ja mero smeranil.

Ama wan ekʼel ja jaw, ja weʼn oj bʼobʼa taʼ ja meran sjakʼjel ja bʼa sjobʼjelik mas tʼilan ja bʼa sakʼanili. ¿Jastal? Jani oja kʼuluk junxta jastal waxa leʼa sjakʼjel ja tuk sjobʼjeliki.

Bʼa jun modo wantik slejel ja smeranil. Jun sjejel, ja Jessica tʼilani wa skʼela ta mey yiʼoj kanchenekʼ ja waʼelal wa smana. Ja yeʼn wa xyala: «Ja kakʼixi jel x-ajiyi malo, anima kechan tʼun yajbʼal yiʼoj wa xbʼobʼ miljukyuj. Ja yuj, bʼajtanto chikan jas oj jmane, wa xkʼela ja spatiki bʼa yiljel ja jas yiʼoj ja waʼelali. Tsaʼan wa xpaklay mas sok ayni wa xkʼuman ja empresa bʼa sjobʼjel ta mi staʼunejuk kanchenekʼ ja yajni stojbʼese. Chomajkil, wa xpaklay ja jastik yaʼuneje eluk ja empresa bʼa snajel ta lek ja waʼelal wa stojbʼese».

Bʼobʼta ja weʼn mi spetsanil kʼakʼu oja leʼ ja smeranil sbʼaja jastik jel tʼilaniki, pe ojni cha bʼobʼa kʼuluk jastal ja Jessica:

• Skʼeljel ja jastik elelxa.

• Spaklajel mas.

• Yiljel ta meran ja jas wa xyala.

Ja modoʼik it oj bʼobʼ skoltaya bʼa stajel ja sjakʼjel ja sjobʼjelik mas tʼilanik ja bʼa sakʼanili. La kiltik jastal.

Bʼa stajel ja smeranil sbʼaja sjobʼjelik mas tʼilan ja bʼa jsakʼaniltiki, ja Jessica ya makunuk jun modoʼal jastaltik ja wa sleʼa waʼelal bʼa mey yiʼoj kanchenekʼ. Ja yeʼn wa xyala: «Skʼumajel bʼa yabʼjel stojol sok spaklajel lek jelni skoltunejon bʼa stajel ja smeranil wa sjeʼa ja Biblia». Miyonik kristyano jachni cha skʼuluneje jastal ja Jessica sok yiluneje jasa wa xyala ja Biblia sbʼaja sjobʼjelik it:

• ¿Jas yuj sakʼanotik?

• ¿Jasa wa x-ekʼ ja wala chamtiki?

• ¿Jas yuj jel ja wokoli?

• ¿Jas wan skʼulajel ja Dyos bʼa oj xchʼaysnajel ja wokoli?

• ¿Jastal oj ajyuk jun jpamilyatik bʼa gusto?

Ja weʼn oj cha bʼobʼa ta ja sjakʼjelik sbʼaja it sok tuk sjobʼjelik yajni xa kʼuman ja Biblia sok spaklajel mas ja bʼa www.pr418.com.