Ja smeranil sbʼaja tyempo jakumi
¿Ay maʼ bʼa ajobʼunej abʼaj jasa oj ekʼ jbʼajtik ja bʼa tyempo jakumi? Ja Biblia wa xyala jelxa mojan oj kiltik jastik jel chamyabʼjel bʼa oj syam-otik jpetsaniltik.
Ja Jesús xcholo jastal oj jnatik jelxa mojan ay «ja sGobyerno ja Dyos» (Lucas 21:31, TNM). Bʼa tuk jastik, yala oj ajyuk niwak guerraʼik, tsatsal terremotoʼik, waʼin sok tsatsal chamelik. Jani it ja jasa wan ekʼel ja bʼa jtyempotik (Lucas 21:10-17).
Ja Biblia wa xcha yala jastal oj jnatik ayotikxa ‹ja bʼa tsaʼanikxta kʼakʼu› wa xkanyuj ja gobyernoʼik bʼa luʼumkʼinali. Jani oj sjeʼ ja smodoʼik ja kristyano, wa xkʼan kaltik ja mal smodoʼe. Kʼuman ja jas kanel tsʼijbʼunubʼal ja bʼa 2 Timoteo 3:1-5. ¿Anke ja yaljelik it wa xcholo jaman lek ja smodo ja kristyanoʼik sjoybʼunejotiki?
¿Jas wa stojolan ja it? Pes jani ja sGobyerno ja Dyos ojxta yijan jastik jel tsamal sok ja sakʼanil ja bʼa Luʼumi mas lekxa oj ajyuk (Lucas 21:36). Ja bʼa Biblia, ja Dyos skʼapunej oj skʼuluk jastik lek ja bʼa Luʼumi sok ja bʼa swinkili. La kiltik jujuntik.
JUN LEKIL GOBYERNO
Ja Jesús «ajiyi mandar, toyjelal sok jun gobyerno, bʼa jachuk ja chonabʼik, ja tsome chonabʼik sok kʼumalik spetsanil ja yeʼnleʼi oj yaʼteltaye kechan yeʼna. Ja smandaranel jun mandaranel bʼa tolabida bʼa mey stikʼanil, sok ja sgobyerno mini oj chʼaysnajel» (DANIEL 7:14).
Jas wa stojolan. Wani xbʼobʼ ajyukotik gusto sakʼan ja bʼa yibʼ skʼabʼ ja smandaranel stsaʼunej ja Dyos soka it yeʼn ja Jesús ja mandaranumi.
MIXA OJ AJYUK CHAMEL
«Mini jun swinkil oj yale: ‹Maloʼayon›» (ISAÍAS 33:24).
Jas wa stojolan. Mixato oj maloʼaxan ma mi tsʼikanuk oj ajyuk jawa kwerpo. Ojni ajyukotik sakʼan bʼa tolabida.
OJ AJYUK LAMANIL TSʼIKAN LEK
«Ja Yeʼn wan yajel kʼot tikʼan ja kʼakʼaneli bʼa yibʼanal ja luʼumi» (SALMO 46:9).
Jas wa stojolan. Mixato ay jas oj sjom ja lamanil sok mixa oj kitik wokol yuja jastik wa xyaʼakan ja guerra.
JA LUʼUMI OJ AJYUK BʼUTʼEL KRISTYANO BʼA LEK
«Ja matik jel malo mixa oj ajyuk; [...] ja matik chʼin wa xyaʼa sbʼaji oj sbʼajuke ja luʼumi» (SALMO 37:10, 11).
Jas wa stojolan. Mixa oj ajyuk mal kristyano, kechanxta oj ajyuk kristyano bʼa kʼuʼabʼal ajyuke soka Dyos.
JA LUʼUMI OJ PAX JUN TSAMAL LUGAR
«Oj yawe kʼeʼuk naʼitsik sok tini oj ajyuke tiw, soka yeʼnle oj stsʼun-e yalajil stsʼusubʼe sok oj sloʼe ja sati» (ISAÍAS 65:21, 22).
Jas wa stojolan. Spetsanil ja luʼumi oj pax jun tsamal lugar. Ja Dyos oj ya kʼot smeranil ja jas jkʼanunejtiki: akʼulaxuk ja jas wa skʼana ja «bʼa luʼum» (Mateo 6:10, TNM).
