¿Jas yuj ja Dyos mi sjakʼa spetsanil ja orasyoniki?
Ja Jyoba, ja jTatik tey bʼa satkʼinal, jel xyiʼaj gusto smaklajel ja korasyontik jaman lek wa xkatikyi. Pe ja Dyosi mi sjakʼa spetsanil ja orasyoniki. ¿Jas yuj? ¿Jasa tʼilan oj ajyuk tʼabʼan jkʼujoltik ja yajni wa xkatikyi orasyon? Kʼela ja jas wa xyala ja Biblia.
«Yajni xa kʼulan orasyon, moka wal ja junxta yaljelik kada ekʼele» (Mateo 6:7, TNM).
Ja Jyoba mini skʼana jaxta oj kaltik ja orasyonik bʼa jnebʼunejtikxa cha mini oj jkʼumuktik bʼa jun libro. Ja yeʼn wa skʼana oj el man jkʼujoltik ja jas oj kaltik yabʼi. Pensaraʼan juna wamigo bʼa junxta ja jas wa xyalawabʼ kada kʼakʼu. ¡Jelni triste! Ja lekil amigoʼik tini wa x-el man bʼa skʼujole ja jas wa xyala sbʼaje sok wa staʼawe tiʼal bʼa jitsan jastik junuk. Yajni ti wa x-el man bʼa jkʼujoltik ja orasyon wa xkatikyi ja Dyosi, wa xjeʼatikyi wa xkilatik jastal jun kamigotik.
«Yajni waxa kʼanawex, mi x-aji awilex, yujni mi stojoluk waxa kʼanawex, kechantani bʼa skʼulajel ja jas waxa kʼanawex ja bʼa bʼakʼtelali» (Santiago 4:3, TNM).
Mini oj bʼobʼ jmajlaytik oj sjakʼ ja Dyos ja korasyontik yujkʼa wa xkʼanatikyi jastik junuk bʼa mi lek xyila. Jun sjejel, pensaraʼan bʼa june oj tajnuk yuj takʼin sok wa skʼanayi ja Dyos aʼajukyi lekil swerte. ¿Oj maʼ sjakʼ ja Jyoba ja orasyon jaw yajni ja yeʼn yalunej jaman lek mok jel kʼankʼunukujtik jastik junuk cha mok jkʼuʼuktik ja bʼa swerte? (Isaías 65:11; Lucas 12:15). Mini xbʼobʼ jmajlaytik ja Jyoba oj sjakʼ ja tikʼe orasyonik jaw. Bʼa oj sjakʼkitik ja Dyosi, tʼilan oj natik lek ja korasyontiki wani slaja sbʼajsok ja jas wa xyala ja yeʼn ja bʼa Biblia.
«Ta june mi skʼana oj skʼuʼuk ja leyi, man ja bʼa yorasyoni kistalni» (Proverbios 28:9).
Ja bʼa najate, ja Dyosi mini smaklay ja yorasyon ja matik wa skʼoko ja sleyiki, sok ja bʼa jtyempotiki jachtoni wa spensaraʼan (Isaías 1:15, 16; Malaquías 3:6). Yujkʼa wa xkʼanatik ja Dyos oj sjakʼkitik tʼilan oj jkʼujoluktik skʼuʼajel ja sleyiki. ¿Jaxa ta yuj jkʼulunejtik jas mi lekuk ja bʼa tyempo ekʼta? ¿Wan maʼ stojolan ja jaw mixa oj smaklayotik? Miyuk. Ja yeʼn pwesto ay oj yaʼotik perdon ta wa xjeʼatik jnaʼunejtik malaya sok wa xkʼulantik ja janekʼ wa xbʼobʼ kujtik ja jas wa skʼana ja yeʼn (Hechos 3:19).
