¿Wan maʼ smaklay ja Dyos ja korasyontiki?
¿Ay maʼ bʼa ajobʼunej abʼaj ta ja Dyos wa smaklaya yajni waxa wayi orasyon? Yujkʼa jachuk, mini kechan weʼnuk. Jitsan ixuk winik skʼanuneje yi skoltajele ja Dyos yajni wa x-ajyiyujile wokol. Pe anima jachuk, ja swokole mini wa xchʼayi. ¿Yuj maʼ wa stojolan ja jaw ja Dyosi mi skisa ja korasyontiki? Mini tʼusan. Ja Biblia wa xyalkabʼtik meran lek ja Dyos wa smaklayotik yajni wa xkʼulantik orasyon bʼa jun modo stojol. La kiltik ja jas wa xyala.
JA DYOSI WANI SMAKLAYOTIKA
«Bʼa weʼn, ja maʼ wa smaklay ja orasyonik, ojni jakuke ja bʼa weʼn tuktukil tikʼe ixuk winik» (Salmo 65:2).
Jujuntik kristyano wa skʼulane orasyon yujni masxa lek xyabʼ wa x-ajyiye, anima ja smeranili wani skʼuʼane mini maʼ wa xmaklajiye yuj. Pe ja orasyoni mini kechanukta jastal jun terapia bʼa oj kuchkujtik ja wokoliki. Ja Biblia wa xyala meran lek «ja Jyoba * tini ay mojan sok spetsanil ja matik wa xleji yuji, bʼa spetsanil ja matik wa xlejiyuj soka smeranili [...]; wa smaklay ja matik wa skʼanaweyi skoltajeleʼi» (Salmo 145:18, 19).
Ja yuj, ojni bʼobʼ ajyukotik seguro ja Jyoba wani smaklay ja yorasyon ja matik wa x-aʼteltajiyuji. Ja yeʼn, tsamalxta wa xyala kabʼtik: «Sok ja weʼnlexi oja kʼumukonex sok oj jakanik sok oja waʼexki orasyon, sok ja keʼn ojni jmaklayex» (Jeremías 29:12).
JA DYOSI WA SKʼANA JA WEʼN OJA WAYI ORASYON
«Cʼumanic tola vida ja Diosi» (Romanos 12:12).
Ja Biblia wa stsatsankʼujolanotik yajelyi orasyon tikʼan sok la jkʼuluktik tolabida. Chikani lek, ja Jyoba wa skʼana oj katikyi orasyon (Mateo 26:41; Efesios 6:18).
¿Jas yuj wa skʼana ja Dyos ja weʼn oja wayi orasyon? Pensaraʼan ja it: ¿maʼ tatalil mi skʼulan gusto ja wa xkʼanjiyi ja skoltanel yuj jun yal skerem? Bʼobʼta ja tatali wanxa snaʼa ja jas wa skʼana ja yal skeremi ma ja jastal ay xyabʼi, pe yajni wa xyabʼ ja jas wa xyala, ja tatali wa xkʼot snaʼ wani xjipji skʼujol sok wa xkʼanji. Jach junxta jastal jaw, yajni wa xkatikyi orasyon ja Jyoba, wa xjeʼatikyi wa xjipa jkʼujoltik bʼa yeʼn sok wa xkʼanatik oj moxukotisok (Proverbios 15:8; Santiago 4:8).
JA DYOSI WANI XCHAM SKʼUJOL BʼA WEʼNA
Awik ekʼyi ja Dyos «ja hua hucolexi soc ja hua pensarexi, [...] porque ja Diosi, hua nix yaahuex sata» (1 Pedro 5:7).
Ja Dyosi wa skʼana oj katikyi orasyon yujni ja yeʼn wa syajtayotik sok wa xcham skʼujol bʼa keʼntik. Altantoxta ay soka jwokoltiki sok wa skʼana oj skoltayotik.
Ja bʼa sakʼanili, ja mandaranum David skʼanayi ja skoltanel ja Jyoba sok xcholo yabʼ ja jas wa spensaraʼani sok ja jastal wa xyabʼ ayi (Salmo 23:1-6). ¿Jasa yabʼ yuja David? Jelni wa skʼana sok wani smaklayi spetsanil ja yorasyoniki (Hechos 13:22). Junxta jastal jaw, ja Dyosi cha wani smaklayotik yujni wa xcham skʼujol bʼa keʼntik.
«WA XYAJTAY JA JYOBA YUJNI JA YEʼN WA SMAKLAY JA JKʼUMALI»
Wa xtaʼatik ja yaljelik it bʼa jun salmo ja bʼa Biblia. Ja maʼ stsʼijbʼani seguroni lek ajyi ja Jyoba wani smaklay ja yorasyoniki, sok ja jaw jelni koltajiyuj. Wa xyabʼ masni mojan ajyi soka Dyos sok ajyiyuj yip bʼa oj kuchyuj ja wokolik jel yaj ekʼ ja bʼa sakʼanil (Salmo 116:1-9).
Ta wa xkʼuʼantik lek ja Dyos wa smaklayotik, mini oj katikan yajelyi orasyon. La kiltik ja jas ekʼ sbʼaj jun winik sbʼiʼil Pedro, bʼa ti kulan bʼa norte bʼa España. Ja skerem bʼa ayiʼoj 19 sjabʼil cham bʼa jun desgrasya sok karro. Ja bʼa ekʼeleʼik jaw jel wokoli, ja Pedro yala yabʼ ja Dyos ja jastal ay xyabʼi sok tikʼanxta skʼanayi aʼajuk kulanyi skʼujol sok akoltajuk. ¿Jasa ekʼi? Ja Pedro wa xyala: «Ja Jyoba sjakʼaki ja korasyoniki. Ja Dyosi yaʼa kulan jkʼujoltikon sok skoltayotikon bʼa jani ya makunuk ja tuk yaʼtijumiki».
Ja sjakʼjel ja korasyontik jitsan ekʼeleʼik wa xjak bʼa skoltanel sok ja bʼa syajtanel ja kamigotik.
Anima ja orasyonik mi ya kumxuk ja skereme, pe jelni koltaji ja Pedro soka spamilya. Ja xcheʼumi, ja María del Carmen, wa xjul skʼujol: «Ja orasyoniki jel skoltayon bʼa oj kuchkuj ja chamkʼujoliki. Wa xnaʼa ja Jyoba wa xyabʼyon stojolil, yajni wa xkʼuman ja yeʼn wani xkabʼ lamanil».
Ja Biblia soka jitsan kristyanoʼik wa staʼa tiʼal ja bʼa jas ekʼ ja bʼa sakʼanile wa sjeʼakitik ja Dyosi wani smaklay ja orasyoniki. Pe ja yeʼn mini wa xchʼak sjakʼ spetsanil ja orasyoniki. Anto, ¿jas yuj ja Dyos wa sjakʼa jujuntik orasyon sok tuk miyuk?
^ par. 5 Ja Jyoba jani ja sbʼiʼil ja Dyos (Salmo 83:18).
