Ja bʼa María, Raúl, Arne sok bʼa tuk jitsan, ja orasyoni jun majtanal jel chaʼanyabʼal. Yajni wa skʼulan ja yorasyone, wa xyabʼye wa xbʼobʼ loʼilanuke soka Dyosi, yajelyi tsʼakatal sok slejel ja skoltanel. Skʼuʼunejeni lek ja jas wa xyala ja Biblia sbʼaja yajelyi orasyon ja Dyos: «Huax bob jcʼuuctic ja Diosi que huan ni smaclayotica, chican jasuncʼa huax cʼanatic yii. Ta jach cʼa huas scʼana ja yen, oj ni yaa quitica» (1 Juan 5:14).

Pe jitsan kristyano wokol xyabʼye skʼuʼajel ja jas wa xyala ja Biblia sbʼaja orasyon. Ja Steve wa xcholo ja jas wa spensaraʼan: «Ja yajni ayto kiʼoj 17 jabʼil, oxe ja bʼa kamigo chamye: june bʼa jun desgrasya bʼa karro sok ja chawaneʼi sjikʼawe jaʼ bʼa mar». ¿Jasa skʼulan ja Steve? «Kayi orasyon ja Dyos bʼa sjobʼjelyi jas yuj ekʼ ja jaw, pe mini sjakʼaki. Ja yuj ti jobʼo jbʼaj:  ‹¿Wan maʼ xmakuni skʼulajel orasyon?›». Jitsani jach wa xyabʼye jastal jaw sok cha wa sjobʼo sbʼaje ta wani xmakuni skʼulajel orasyon.

Pe ay pilan rasonik yuja jujuntik kristyano wa spensaraʼane mini tʼun xmakuni skʼulajel orasyon. Jujuntik wa xyalawe, yuja Dyos wanxa xchʼak snaʼ spetsanil, altantoxani ay soka jwokoltiki sok ja jas wa xmakunikujtiki. Ja yuj, ¿jasto sbʼej ja oj kaltik yabʼ ja jas wa x-ekʼ jbʼajtiki?

Tuk wa skʼuʼane ja Dyosi mini skʼana oj smaklay ja yorasyone yuja mulalik skʼuluneje ja bʼa tyempo ekʼta. Ja Jenny wa xyala: «Ja niwan jwokoli yujni wa xkabʼ mixa jas la makuniyon. Jkʼulunej jastik junuk bʼa jelto xnaʼa malaya, ja yuj wani xkʼuʼan mixani sbʼejuk ja ojto smaklayon ja Dyosi».

Jaxa weʼn, ¿jas waxa pensaraʼan? ¿Ay maʼ bʼa jun ekʼele ajyelawuj ja junxta dudaʼik sbʼaja orasyoni? Yujkʼa jachuk, jel oj gustoʼaxan snajel ja Biblia ojni bʼobʼ yawi ja sjakʼjel waxa kʼana. Oj bʼobʼa jipa kʼujol ja jas wa xyala ja Biblia sbʼaja orasyoni. * Oj skoltaya sjakʼjel ja sjobʼjelik it:

• ¿Meran maʼ lek wa smaklay ja Dyos ja orasyoniki?

• ¿Jas yuj mi sjakʼa jujuntik orasyonik?

• ¿Jastal tʼilan oj jkʼuluktik ja orasyon bʼa oj smaklay?

• ¿Jastal oj bʼobʼ skoltaya ja weʼn ja orasyon?