Ja Biblia ayiʼoj jitsan loʼil bʼa ixuke sok winike bʼa tuktukilni yabʼ jastal aye. Ta jkʼumantik ja yexperienciaʼe, bʼobʼta ayni june bʼa oj la jbʼajtiksoke.

Jpetsaniltik wa xkʼana oj abʼjukotik stojol, mas ja yajni wantik skʼulajelsok luchar jun wokol bʼa jpensartik. Bʼobʼta yajni xkʼumantik ja jastal ay xyabʼye sok ja jastal wa spensarane jujuntik ja matik wa staʼa tiʼal ja Biblia ojni kiltik wa xlaja jbʼajtiksoke. Ja it ojni skoltayotik bʼa oj kiltik mini kechan keʼntik oj kʼultiksok luchar ja chamkʼujol, ja wokol sok ja pensarik bʼa wa xyixtalanotik.

• Ja Biblia wa xcholo kabʼtik ja jas yalawe jujuntik winik bʼa mixa snaʼa jas oj skʼuluke sok yabʼye mixa ayipe. ¿Ayma bʼa apensaraʼunej: «Mixa xkuchkuj, mixa xkʼana jach oj ajyukon»? Jachni mero yabʼye ja Moisés, ja Elías sok ja David (Números 11:14; 1 Reyes 19:4; Salmo 55:4).

• Ja Biblia wa staʼa tiʼal bʼa Ana, jun ixuk bʼa jelni chamkʼujol ajyi yujni mi xbʼobʼ ajyuk yuntikil sok jaxa pilan ixuk, bʼa jani skontra, jelni piero ja jastal wa xkʼulaji burlari (1 Samuel 1:6, 10).

• Bʼobʼta ja weʼn ojni cha alaj jastal ja Job, jun winik wa staʼa tiʼal ja Biblia. Ama jel yiʼoj skʼuʼajel, cha ajyiniyuj chamkʼujol bʼa yala: «Wa xkilkʼujolan ja jsakʼanili; mixa xkʼana oj ajyukon sakʼan» (Job 7:16).

Spetsanil ja kristyano it bʼobʼ skʼuluke ganar ja pensarik mi stojoluk. Ja keʼntik cha ojni ajyukujtik ja ipal bʼa jach oj kʼuluktik ta wa xkʼumantik ja sjejelik it.