Ja Biblia ayiʼoj rasonik bʼa wa xya kulan jkʼujoltik, wa skoltayotik bʼa oj kuchkujtik sok wa xyaʼa kiptik bʼa oj kʼultiksok luchar ja pensarik mi stojoluki. Cha wani skʼapakitik ke ja syajal ja jastal ay xkabʼtik ojxta chʼayuk.

Mini cham yabʼjeluk ja ay ekʼele triste aytik ma chamkʼujol aytik, pe ja matik ayiʼoje wokol bʼa chamkʼujolil ma jelxelxa tristeʼil bʼobʼta kada kʼakʼu wa skʼulanesok luchar. ¿Jastal oj bʼobʼ koltajuke yuja Biblia?

• Ja Biblia ayiʼoj rasonik bʼa pensarik stojol ke wa xbʼobʼ slokʼoluk chikan jas pensar mi stojoluk ay kiʼojtik (Filipenses 4:8). Stsʼakatal ja jaw, ojni bʼobʼ katik ajyuk ja bʼa jpensartik jastik bʼa oj yakitik lamanil sok oj skoltayotik skomjel ja jastal wa xkabʼ aytik (Salmo 94:18, 19).

• Ja Biblia oj skoltayotik bʼa oj kʼultiksok luchar ja pensarik bʼa jel skoʼelalotik ma mila makunitik (Lucas 12:6, 7).

• Ja bʼa Biblia ayiʼoj jitsan loʼil bʼa wa xya ajyukotik seguro ke mini jtuchʼil ayotik, sok ja Dyos, ja jKʼulumantik, wani xyabʼyotik lek stojol ja jastal wa xkabʼ aytik (Salmo 34:18; 1 Juan 3:19, 20).

• Ja Biblia wa skʼapa ke ja Dyos oj xchʼay ja jas wa xjul jkʼujoltik bʼa wa xya kabʼtik syajal (Isaías 65:17: Apocalipsis 21:4). Ta tʼilan oj kʼultiksok luchar ja pensarik bʼa jel xyixtalanotik, ja kʼapjelal it ojni bʼobʼ yakitik ja ipal wa xmakunikujtik bʼa mi oj el jganatik.