Ja Jyoba wa slokowotik bʼa oj kaltikyabʼ chikan ja swokol ma chamkʼujol kiʼojtik (Salmo 55:22). Ama jel jitsan ma tʼusan ja jwokoltik ojni bʼobʼ jcholtikyabʼ. Ta ja keʼntik wa xcham jkʼujoltik, ja Jyoba cha wani xcham skʼujol. Ja yajelyi orasyon jani bʼajtan modo bʼa oj katik ajyuk ja lamanil ja bʼa jpensartik (Filipenses 4:6, 7).

Yajni mi lek ay ja jastal wa xtax ja spensartik, bʼobʼta oj kabʼtik jel jtuchʼil aytik. Sok ja tuk mini tolabida oj yabʼye stojol ja jas wan ekʼel jbʼajtik (Proverbios 14:10). Pe yuja Dyos wa xyabʼyotik stojol sok wa smaklayotik, ojni bʼobʼ kaltikyabʼ jaman lek jastal wa xkabʼ aytik. Ja Jyoba wa xyilawotik, sok altanto wa x-ajyi ja bʼa syajal kiʼojtik, wa snaʼa ja jas wa xya wokolanukotik, ja yuj wa skʼana oj katikyi orasyon bʼa chikan jas wa xcham jkʼujoltik (2 Crónicas 6:29, 30).

Yajni wa xkatikyi orasyon ja Jyoba, ja jastal wa xjipa jkʼujoltik ke wa skʼana oj stalnayotik wani stsatsbʼi. Cha wani xbʼobʼ ajyukotik seguro jastalni jun tsʼijbʼanum bʼa Biblia bʼa yala yabʼ ja Dyos: «Awilunej ja jwokoli, tixta waxa kʼela ja jchamkʼujolik mas nakʼani» (Salmo 31:7). Snajel ke ja Jyoba wa xyila ja jas wa x-ekʼ jbʼajtik, ojni ya kiptik bʼa mi oj el jganatik. Pe mini kechanta wa xyila ja jwokoltik. Ja yeʼn wani xyabʼ lek stojol ja jas wan ekʼel jbʼajtik sok wa skoltayotik oj tatik lamanil sok ja tsatsankʼujolil wa xmakunikujtik bʼa Biblia.