Ama ja Biblia mi jun libroʼuk bʼa an, pe wani xyaʼa rasonik bʼa jel xmakuniyuj ja maʼ wan skʼuljelsok luchar jun wokol bʼa spensar. La kiltik ja sjejelik ti nochani.

«Ja matik lek ayi mi xmakuniyujile jun loktor, pe ja matik maloʼayi waniʼa» (MATEO 9:12).

Ja Biblia wa xchiktes ke ay ekʼele tʼilan oj leʼ jkoltajeltik sok jun loktor bʼa jel chapan. Jitsan ja matik ayiʼoje chamel bʼa spensare masni lekxa wa xyabʼ wa x-ajyiye tsaʼan yajni choljitayabʼye sbʼaja swokole sok koltajiyeta yuj jun loktor.

«Ja yajelyi ejersisio ayni yiʼoj tʼun slekilal» (1 TIMOTEO 4:8).

Yajel makunuk ja jtyempotik sok ja kiptik bʼa oj kʼultik jastik bʼa lek ojni bʼobʼ skoltay ja bʼa jastik wa xpensarantik. Jujuntik ja bʼa it jani yajelyi ejersisio tikʼan, yabʼjel waʼelik bʼa lek sok oj waykotik lek.

«Jun kʼujolal bʼa gusto ay juni lekil an, pe jun kʼujolal bʼa tʼenan ay wa xchʼaka ja ipali» (PROVERBIOS 17:22).

Skʼumajel tekstoʼik bʼa Biblia bʼa wa stsatsankʼujolanotik sok yajel jun jkʼelsatik, ojni skoltayotik bʼa mas gusto oj ajyukotik. Ta wa xwaj kʼujoltik ja jastik lek ja bʼa jsakʼaniltik sok wa xkʼuʼantik oj tojbʼuk ja bʼa tyempo jakumi, ojni  skoltayotik bʼa oj kuchkujtik ja wokolik bʼa pensar.

«Ja biboʼili tey sbʼaja matik mi xjelxiyeʼi» (PROVERBIOS 11:2).

Bʼobʼta oj makunukawuj ja skoltanel ja tuk bʼa skʼulajel jujuntik jastik, ja yuj kisa gusto lek. Seguro ke jawa wamigoʼik sok jawa pamilya puestoni aye bʼa oj skoltaya, pe bʼobʼta mini snaʼawe jastal. Alayabʼ jaman lek ja jas wa xmakuni awuji, pe mok chʼayuka kʼujol mini oj skʼuluke yibʼanal ja jas waxa kʼana sok aʼa tsʼakatal yuja ja jas wa skʼulaneʼi.

«Kaʼa jbʼaj kuenta ayni jas mi lek wan ekʼel jbʼaj, ja yuj wajyon bʼa loktor. Ja loktora xcholokabʼ ja jas wan ekʼel jbʼaji, sok ja jaw skoltayon bʼa oj naʼ jas chamel kiʼoj. Cha xcholokabʼ jastik an oj bʼobʼ kiʼ» (Nicole, a bʼa wa xyiʼaj wokol soka chamel bʼa spensar bʼa wa xya tukbʼuk ja smodo).

«Skʼumajel tikʼan ja Biblia soka jcheʼumi wa skoltayon bʼa ajyelkuj pensarik bʼa lek sok wa stsatsankʼujolanon. Kilunej ke yajni jel tuk ayon xkabʼi ayni bersikuloʼik bʼa Biblia jel skoltayon» (Peter, bʼa wa xwokolani yuja jelxelxa tristeʼil).

«Ja bʼajtani wani la kʼixwiyon xcholjel yabʼ ja tuk ja jwokoli. Pe ajyi jun kamiga bʼa yabʼyon lek stojol sok yajxta yilawon bʼa skoltayon masxa lek oj ajyukon sok yiljel mi jtuchʼil ajyukon» (Ji-yoo, bʼa wan wokolanel yuja mi skʼana oj waʼ lek).

«Stsʼakatal yuja Biblia, ja wego mas wanxa xkayi stikʼanil ja bʼa aʼtel sok ja jijlel. Ja rasonik wa xyaʼa skoltunejon bʼa oj kuchkuj ja jwokoliki» (Timothy, bʼa wa xyiʼaj wokol yuja pensarik mey stojol bʼa wa xyaʼa chamkʼujol).