Ja komentarioʼik it jani wa xyalawe ja matik ayiʼoje wokolik bʼa spensare. ¿Jach maʼ waxa wabʼ wala taxi, ma ay maʼ waxa naʼa sbʼaj bʼa jach wan ekʼel sbʼaj?

Ta jachuk, ¿wan maʼ xa naʼa ke mi kechan weʼnuk? Bʼa sutanal ja luʼum, jitsan kristyano ayiʼoje jun tikʼe chamel ja bʼa spensare ma wa xyiʼaje wokol yujni june ja bʼa spamilyaʼe jach aye.

Chikani lek aytik sakʼan bʼa «tyempoʼik jel wokol sok mi pasiluk oj kuchkujtik», ja yuj ayni jitsan jas wa xyakitik syajal sok chamkʼujol (2 Timoteo 3:1). Jastalni wa xyala ja Tsome matik wa skʼelawe sbʼaja chamelik bʼa yibʼanal luʼumkʼinal, june bʼa kada waxake kristyano bʼa sutanal ja luʼum wa xyiʼaje wokol bʼa spensare. Sok yuja smul ja chamel COVID-19, ja bʼa 2020 ja matik ayiʼoje chamkʼujol kʼeni junuk 26% sok jaxa matik jel x-och stristeʼil junuk 28%.

Ama tʼilan snajel janekʼ kristyano ayiʼoje ja chamel jaw, pe ja mas tʼilani jani snajel jastik junuk ja mas lek oj bʼobʼ skoltaya ja weʼn sok jawa pamilya.

Yajni june lek ay ja jastal wa xtax ja spensari, lekni ay xyabʼi sok mini xwokolani ja bʼa yaʼtel wa skʼulan kada kʼakʼu. Wa xkuchyuj ja estrés, lek wa xwajyuj ja bʼa yaʼtel sok gusto wa x-ayi ja bʼa sakʼanil.

• MINI jaʼuk ta yuj june débil ay.

• JUNI chamel bʼa wa xbʼobʼ yijanyi jitsan chamkʼujol june, wa xbʼobʼ jomuk ja jastal wa spensaran sok ja jastal wa xbʼobʼ skom ja jastal ay xyabʼi sok ja smodo.

• Jelni wokol oj bʼobʼ mojxuksok ja tuk sok skʼulajel ja yaʼtelik ja bʼa sakʼanil.

• Ojni bʼobʼ ekʼ sbʼaj chikan machʼa, chikan janekʼ ja sjabʼil, ja skultura, ja srasa, ja srelijyon, ta ay ma mey stakʼin sok xchapjel.

Ayni ekʼele june wa xkʼe tukbʼuk jujuntik ja smodo, ja jastal kʼajyel wa xwaʼi ma ja wa xwayi. Ma bʼobʼta ayxa tyempo chamkʼujol ay ma triste ay. Ta jach wa x-ekʼabʼaj ma awabʼunej bʼa pilan, bʼobʼta tʼilani oja leʼa koltajel sok jun loktor bʼa chapan bʼa yiljel jas yuja jach wan ekʼelabʼaj. Pe ¿bʼa oj bʼobʼa taʼ akoltajel?

Ja winik mas jel bibo ajyi sakʼan ja bʼa Luʼum, ja Jesukristo, yala: «Ja matik lek ayi mi xmakuniyujile jun loktor, pe ja matik maloʼayi waniʼa» (Mateo 9:12). Soka skoltanel ja loktorik jel chapan sbʼaja wokolik bʼa pensar, masni pasil jun kristyano oj tojbʼuk ja jastal ayi sok oj kʼe staʼ ja jastal ay ajyi ja bʼa sakʼanil sok oj ajyukyuj ja gustoʼil. Ta wanxa ipaxel ma ayxa tyempo yiʼoj masni lek axa sleʼ skoltajel. a

Ja Biblia mini jun libroʼuk bʼa anik, pe ja jas wa xyala wani xbʼobʼ skoltayotik bʼa lek oj taxuk ja jpensartik. Ja bʼa artikuloʼik ti nochan oj staʼ tiʼal jastal ja Biblia oj skoltayotik bʼa oj kuchkujtik ja wokolik bʼa jpensartik. Wa xlokowatikon oja kʼumuk.