Skʼulajel ja bʼa toji: Jun jasunuk bʼa tʼilan weʼn oja tsaʼ
Ja jas oj tsatik skʼulajeli ojni skoltayotik bʼa oj ajyukotik gusto ma miyuk. Ja Jyoba wa snaʼa sok ja yuj wa skʼana ke ja oj kitik ja jastik yaʼunejkan kulani.
Ja Jyoba wa skʼana ke laman sok gusto oj ajyukotik.
«Keʼnon ja Jyoba wa Dyosi, ja maʼ wa sjeʼawi bʼa wa lekilal weʼna, ja maʼ wa stojowa ja bʼa bʼej bʼa tʼilan oj bʼejyani. ¡Lek wanukxta xa maklay ja jmandariki! Anto jawa lamanili, ojni kʼot ajyuk jastal jun yok jaʼ, sok ja stojolil waxa kʼulani, oj slaj jastal ja spukʼtsinel ja mari» (Isaías 48:17, 18).
Ay jitsan modoʼik bʼa jastal yijel ja jsakʼaniltiki. Pe yuja Jyoba yeʼn ja jKʼulumantik, yeʼn wa snaʼa ja bʼa mas lek. Ja yeʼn wa skʼana ke oj nochtik ja stojelal yujni wa snaʼa bʼay ja mas lek oj wajkujtik. Ta wa xkʼuʼantik ja jastik yaʼunejkan kulan ja Dyos, ojni bʼobʼ ajyukotik seguro ke lekni oj wajkujtik. Ja jastik oj tsatik skʼulajeli tolanibida ja bʼa stojolil sok oj yijankitik lamanil sok gustoʼil.
Ja Jyoba mi skʼanakitik ja jas mi oj bʼobʼkujtik.
«Ja mandarik it wanon yajelawi ja wego mini jel wokol bʼa weʼna sok mini najatuk ay bʼa oja taʼe» (Deuteronomio 30:11).
Bʼa oj katik makunuk ja bʼa jsakʼaniltik ja jastik yaʼunejkan kulan ja Dyos, bʼobʼta tʼilani oj tukbʼestik ja jastal wa xpensarantik sok ja jas wa xkʼulantik. Pe ja Jyoba mini skʼanakitik jastik mi oj bʼobʼkujtik, pes yuja yeʼn ja jKʼulumantiki wani snaʼa ja janekʼta wa xlajxikujtiki. Yajni wa xnaʼatik sbʼaj lek, wani xkilatik ke ja«smandariki mini jun kargaʼuk» (1 Juan 5:3).
Ja Jyoba wa skʼapa oj skoltay ja matik jaʼ wa skʼana oj yiʼe ja jastik yaʼunejkan kulani.
«Keʼn, ja Jyoba wa Dyosi, jyamunej ja stojol wa kʼabʼi; keʼn ja Maʼ wa xyalawabʼ: ‹Mok xiwan. Keʼn oj koltaya›» (Isaías 41:13).
Ojni bʼobʼ lajxukujtik yijel ja jsakʼaniltik yajel makunuk ja jastik yaʼunejkan kulan ja Dyos yujni wa skoltayotik. Ja yeʼn wa xya makunuk ja Yabʼal, ja Biblia, bʼa oj skoltayotik sok bʼa oj yakitik smajlajel.
Bʼa sutanal ja luʼumi, miyonik kristyano yiluneje ke tojbʼel ja sakʼanile yajel makunuk ja rasonik bʼa Biblia. ¿Wan maʼ xa kʼana oja naʼ mas ja rasonik wa xyaʼa ja Biblia? Ojni bʼobʼ kʼe akʼul estudiar ja poyeto: Abʼan stsamalil jawa sakʼanili. Kʼebʼubʼal sok wa xtax bʼa jw.org. Yiʼojan ja oxe sjejelik it:
-
«¿Jastal oj bʼobʼ skoltaya ja Biblia?».
-
«Ja Biblia wa xyaʼakitik smajlajel».
-
«¿Wan maʼ xbʼobʼa jipa kʼujol ja Biblia?».
Yajni xa nebʼa mas sbʼaja rasonik bʼa Dyos, oja wil ke ja srasoniki wani xmakuni sok «tolabida wa xbʼobʼ jipxuk kʼujolal, ja wego sok bʼa tolabida; kʼulubʼalni soka smeranil sok bʼa stojolil» (Salmo 111:8). Yajel makunuk ja rasonik wa xtax bʼa Biblia, jani mas lek yijel ja bʼa jsakʼaniltik. Pe ja Dyosi mini wa stʼenawotik bʼa skʼulajel (Deuteronomio 30:19, 20; Josué 24:15). Jun jasunuk tʼilani ke oj tsatik kada jujune.
