Tʼusan mi spetsaniluk ja kristyano wa snaʼawe ja jastik leki sok ja jastik mi lekuki. Tʼusan mi spetsaniluke mi lek xyilawe ja ixtalaneli, ja milwaneli sok ja yixtalajel ja yal untiki. Jaxa tuk, lekni xyilawe ja yajtanel, ja snajel syajal ja tuk sok ja skʼulajel ja bʼa toj. Pe ¿jastal wa xyilawe sbʼaja maʼ oj staʼ sbʼajesok, bʼa yaljel ma miyuk ja smeranil ma bʼa jastal stojel ja untiki? Jitsan wa spensarane ke mini kechanuk ay jun rason bʼa lek; wani xyalawe ke chikan jas rason ojni bʼobʼ kʼot lek. Ja yuj jitsan kristyano ja wa skʼulane ja jas stojolil xyilawe, ma wa snochowe ja jas wa xyalawe ja tuk. Pe ¿lek maʼ ja it?

Yajni wa xkʼulantik jun jasunuk, jani wa xkaʼatikan a-stojotik ja jconcienciatik, bʼa wa xyala kabʼtik ja jas lek sok ja jas mi lekuki (Romanos 2:​14, 15). Asta ja yal untiki wa snaʼawe sok wa xtʼabʼtʼuni skʼujole, yajni ay jas mi lek wa skʼulane. Ja yuj yajni wantik kʼiʼeljani, wani stojo ja jconcienciatik ja jrelijyontik, ja jkostumbretik, ja jpamilyatik, ja jmojtik, ja jmaestrotik sok ja jbesinotik. Anto yajni wa stsaʼatik skʼulajel jun jasunuk, ja jconcienciatik wa xyala ta wa slaja sbʼaj soka jas jeʼubʼaljankitiki.

Ja jconcienciatik wa xbʼobʼ snikotik bʼa oj kabʼtike stojol ja tuk, yajel tsʼakatal, mi oj jelxukotik sok snajel syajulale. Cha wani skoltayotik bʼa mi oj yajbʼestik ja matik wa xyajtaytiki ma oj ya kʼixwukotik sok mulal oj ya ajyukotik.

¿Lek maʼ sjipjel jkʼujoltik ja bʼa jas stojolil wa xpensaraʼantiki? Yajni junto kerem, ja Garrick yala oj yiʼ ja sakʼanil ja jastal wa skʼana, pe soka tyempo kʼot yil ke ja jas stojolil wa xyila ja yeʼn, mini iji bʼa slekilal. Sok yuja jaw, iji och bʼa sjomelal, bʼa koʼel mulal sok ixuk winik, yabʼjel droga, yakbʼel sok spekʼjel chikʼ.

Mi kechan wa xkaʼatikan bʼa oj stojotik ja jconcienciatik, jitsan ekʼele jani wa xwaj jkʼujoltik ja jas oj spensaraʼuke ja tuk yuja jas oj jkʼuluktiki.  Ja slekilal sbʼaja it eske wa xnebʼatik sbʼaja snajeli sok ja sbiboʼil ja tuk. Yajni wa xkʼulantik ja stojolil wa xyilawe ja jpamilyatik sok ja bʼa jkomontik, wani skisawotike.

¿Lek maʼ snochjel ja jas stojolil wa xyilawe ja tuk? Yajni junto akʼix, ja Priscila jani wa skʼulan ja jas wa skʼulane ja yamigoʼiki, bʼa yeʼnle mini ay smaloʼil wayel sok tuktukil bʼa mi nupaneluke. Pe kʼot snaʼ ke skʼulajel ja jas wa spensaraʼane ke stojol wa xyilawe ja tuk, mini aji gustoʼaxuk. Wa xyala: «Skʼulajel ja jas kʼajyel wa skʼulane ja tuk, mini ya gustoʼaxukon. Jkʼulan jastik mi sbʼejuk sok xiwela sbʼaj ajyi ja jsakʼanil».

Jelni tʼilan ja jas wa xpensaraʼantik ja keʼntik sok ja jas wa spensaraʼane ja tuk ja yajni wa stsaʼatik skʼulajel ja bʼa stojolili. Pe mi tolabida lek wa x-elkʼot, ta kechan ja wa xkaʼa tʼabʼan jkʼujoltik ja it. Ayni ekʼele mi xpensaraʼantik ja jas wa stsaʼatik skʼulajeli sok mi xkilatik janekʼto swokolil oj yijankitik ja keʼntik ma ja tuki (Proverbios 14:12). Ama seguro aytik ja jas wa xkʼuʼantik sok ja jas wa skʼuʼane ja tuk, pe bʼobʼta mini stojoluk. Sok mi xnaʼatik ta mi oj tukbʼuk ja yajni x-ekʼ ja tyempo. Pes ayni jastik bʼa mi lekuk wa x-ilji ajyi, pe ja wego lekxa wa x-ilji. Ayni modoʼalik ke lekni skʼeljel ajyi, pe ja wego mixa lek x-ilxi.

Bʼa snajel bʼay ja stojolil sok ja bʼa miyuki, ¿ayma jun tojelal bʼa mas lek bʼa wa xbʼobʼ jip jkʼujoltik? Bʼa mi oj natik malaya tsaʼan, ¿ayma bʼa oj tatik lekil rasonik bʼa oj skoltayotik stsajel jastik lek?

Pe ayni jun tojelal bʼa wani xbʼobʼ jip jkʼujoltik, bʼa tolabida wa xyiʼajan jastik lek chikan jastalotik ma bʼa wala taxtika. Ja bʼa artikulo jakumi oj skoltayotik stajel ja lekil tojelal, bʼa jachuk tolabida oj kʼuluktik ja jas lek ja bʼa jsakʼaniltiki.