Skʼulajel ja bʼa toji: Ja Biblia ayiʼoj tojelalik bʼa wa xbʼobʼ jipjkʼujoltik

STSANJEL BʼA

Ta ja yajni wa stsaʼatik skʼulajel ja bʼa toji ja wa xkʼulantik ja jas wa xyala ja jconcienciatik ma ja jas wa spensarane ja tuk, mini seguroʼuk ta lek oj wajkujtik. Ja Biblia wa xcholo jas yuj jach wa x-ekʼi sok wa xyalakabʼtik jastal wa xbʼobʼ ajyukotik gusto sok bʼa oj ajyuk stojol ja jsakʼaniltiki. Pes ja Biblia ayni yiʼoj tojelalik bʼa wani xbʼobʼ jipjkʼujoltik.

WANI XKʼANATIK KE OJ STOJOTIK JA DYOSI

Ja bʼa Biblia, ja Jyoba Dyos a wani xyala ke wani xmakunikujtik ja skoltaneli, mini kʼulajitik bʼa keʼnta oj toj jbʼajtik (Jeremías 10:23). Ja yujil, yaʼakankitik ja bʼa Biblia ja tojelal wa xmakunikujtik bʼa oj tsatik ja jastik tʼilan ja bʼa jsakʼaniltiki. Jelni syajtayotik juntiro, sok mini skʼana oj tsatik jastik junuk bʼa kechanta oj kʼuluktik probar sok yiljel ta oj wajkujtik lek. Pes yujni jel xya kitik wokol sok chamkʼujol (Deuteronomio 5:29; 1 Juan 4:8). Chomajkil, yeʼnani ja jKʼulumantiki sok jelni bibo sok wani snaʼa jbʼajtik lek ke wani xbʼobʼ yakitik ja rasonik wa xmakunikujtiki (Salmo 100:3; 104:24). Pe ja Dyosi mi maʼ skʼulan obligar bʼa oj yiʼ ja sakʼanil ja jastalni yaʼunejkan kulani.

Ja Jyoba yayi ja Adán sok ja Eva, ja bʼajtan winik sok ja bʼajtan ixuk, yibʼanal ja jas makuniyujile bʼa oj ajyuke meran gusto (Génesis 1:28, 29; 2:8, 15). Cha yayile tojelalik bʼa mi jel wokoluk bʼa smajlayni ke oj skʼuʼuke, pe yaʼanikan bʼa yeʼn oj stsaʼe ta oj skʼuʼuke ma miyuk (Génesis 2:9, 16, 17). Tristeni yabʼjel, ja Adán sok ja Eva stsaʼawe skʼulajel ja jas skʼanaweʼi sok mi jaʼuk ja jas skʼana ja Jyoba (Génesis 3:6). ¿Sok jastal wajelkujtik yuja keʼn mismo wa stsaʼatik ja bʼa jas stojolili? ¿Wajel maʼ kujtik lek? Miniʼa. Ja jastik ekʼeli sjeʼunej ke skʼokjel ja jastik yaʼunej kulan ja Dyosi mini yiʼunejukjankitik lamanil sok mini gustoʼil (Eclesiastés 8:9).

Ja Biblia wani xyakitik ja tojelal wa xmakunikujtik bʼa oj tsatik ja jas toj chikan bʼa jbʼajtika ma bʼa jakelotika (2 Timoteo 3:16, 17; kʼela ja recuadro « Jun libro bʼa spetsanil kristyano»). Ja wego la kiltik jastal ja Dyos wa stojowotik soka Biblia.

Ila jas yuj stojolni yaljel ke ja Biblia jani «ja yabʼal ja Dyos» (1 Tesalonicenses 2:13). Kaʼax ja bʼa jw.org sok kʼela ja bideo ¿Maʼ spensar tsʼijbʼunubʼal ja bʼa Biblia?

JAS YUJ JUJUNTIK MI SKISAWE JA BIBLIA

Jujuntik wa xyalawe ke mini ayiʼoj tojelalik bʼa wa xbʼobʼ jipjkʼujoltik ja bʼa Biblia. Jani it ja jas wa xbʼobʼ yale jujuntik:

Ja jas wa xyalawe: «Ja Biblia tuktukil ja jas wa xyala».

Ja smeranili: Bʼobʼta lajansok oj kiltik ke jujuntik loʼilik bʼa Biblia mini junukxta ja jas wa xyala, pe ta kaʼa tʼabʼan jkʼujoltik ja jas mero wa xkʼan yali, ja bʼa tyempo ekʼi sok ja kostumbreʼiki, ja jastal yilawe ja tsʼijbʼanumiki sok tuk jastik, ojni kiltik ke wa xchʼak syak sbʼaj.

Ta waxa kʼana oja wil jujuntik sjejel, kaʼax bʼa jw.org sok kʼuman ja artikulo «¿Se contradice la Biblia?».

Ja jas wa xyalawe: «Ja kristyano wa skʼuʼan bʼa Biblia, cha wani skʼulan jastik bʼa mi lekuk, ja yuj mini jun lekil tojelaluk».

Ja smeranili: Ja Biblia mini yeʼn smuluk yuja smodoʼe mi lekuk ja matik mi skʼuʼane ja srasoniki. Pes ja Biblia yalunejxani ke jitsan kristyanoʼik, bʼa tini chʼikane ja olomalik bʼa relijyon, mini oj yawe makunuk ja jas wa sjeʼaweʼi. Cha yalunejxa ke yuj smul yeʼnle «oj yale jastik bʼa wa xyajbʼesni» ja bʼa jas wa sjeʼa ja Biblia (2 Pedro 2:1, 2).

Ta waxa kʼana oja wil jun sjejel bʼa jastal jitsan olomalik bʼa relijyon mi yaʼuneje makunuk ja jas wa sjeʼa ja Biblia, kaʼax bʼa jw.org sok kʼuman ja artikulo «La religión, ¿un gran negocio?».

Ja jas wa xyalawe: «Ja Biblia wa xyaʼakan bʼa mi lek oj kil jbʼajtik».

Ja smeranili: Ja Biblia wa xyala la jkis jbʼajtik. Mini lekuk wa xyila ja modoʼalik it:

Skʼuʼajel ke mas ekʼxelotik ja keʼntik yuja tuk (Filipenses 2:3).
Ja mi oj kistik ja maʼ tuk kʼotele yuja keʼntiki (1 Pedro 2:17).
Stʼenjel ja tuk bʼa oj spensaraʼuke jastal keʼntik (Mateo 10:14).

Ja Biblia wa sjeʼa ke ja Dyosi tolabida jel lek sok tojni kʼotel soka kristyanoʼiki, sok wani skʼana ke jach oj cha jkʼuluktik (Romanos 9:14).

Ta waxa kʼana oja naʼ mas, kaʼax bʼa jw.org sok kʼuman ja artikulo «¿Wan maʼ skoltayotik ja Biblia bʼa oj tekʼxukujtik?».

JA DYOS WA STOJOWOTIK SOKA BIBLIA

Ja Biblia wani xyalakabʼtik ja jastal yilunej sbʼaj ja Dyos sok ja kristyanoʼik bʼa snajtil ja tyempo ekʼeljani. Stsʼakatal yuja jas wa xyalakabʼtiki wani xbʼobʼ jnatik ja jas lek sok ja jas mi lek wa xyila ja Dyosi, wa xkʼan kaltik, ja jas wa xbʼobʼ kiltik slekilali ma ja jas wa xbʼobʼ ya kitik wokoli (Salmo 19:7, 11). Sok jachuk wa xtaʼatik rasonik bʼa mi nunka xjomi sok bʼa wani stojowotik.

Jun sjejel, la kiltik ja rason wa xtaʼatik ja bʼa Proverbios 13:20: «Ja maʼ wa smojtay ja matik bibo, ojni biboʼaxuk, pe ja maʼ wa smojtay ja matik sonso mini lek oj wajyuj». Ja rason it jeltoni xmakuni ja wego, jastalni makuni ja bʼa tyempo ekʼta. Sok ja it kechani june ja bʼa rasonik jel xmakuni sok jel chaʼanyabʼalil wa xtaʼatik ja bʼa Biblia (kʼela ja recuadro « Ja rasonik bʼa Biblia tolabida wa xmakuni»).

Bʼobʼta waxa jobʼo abʼaj: «¿Jastal wa xbʼobʼ ajyukon seguro ke ja rasonik bʼa Biblia wani xbʼobʼ skoltayon?». Ja bʼa artikulo ti nochani oj kiltik jujuntik sjejel ja bʼa jtyempotik.

a Ja Dyosi sbʼiʼil Jyoba (Salmo 83:18).

JA RASONIK BʼA BIBLIA TOLABIDA WA XMAKUNI

Ama ja Biblia chʼak tsʼijbʼaxuk tʼusan mi ayxa ja chabʼ mil jabʼil, jeltoni wan makunel man jtyempotik. Ja jas wa skʼana ja kristyano mini tukbʼeluk, jpetsaniltik wa xkʼujolantik bʼa gusto oj ajyukotik sok bʼa oj ajyuk jun lekil jsakʼaniltik (Eclesiastés 1:9). Ja lekil rasonik bʼa Biblia, bʼa mini xjomi, wani xbʼobʼ skoltayotik bʼa oj lajxukujtik.

Ja mi oj ochuka kʼabʼ

«Wani xkʼana oj jetikon toj ja jmodotikon bʼa yibʼanal» (HEBREOS 13:18).
«Ja maʼ wa x-elkʼani mokxa elkʼanuk mas, mas lek aʼatijuk tsats» (EFESIOS 4:28).

Yijela bʼaj lek soka tuk

«Jani la jletik ja slekilal ja tuki sok mi jaʼuk ja jbʼajtiki» (1 CORINTIOS 10:24).
«Moka waʼexkan stekʼjela bʼajex sok yajela bʼajex perdon sok spetsanila kʼujolex» (COLOSENSES 3:13).

Stsajel lek ja jas oja kʼuluk

«Ja maʼ mi snaʼa kʼinali wa skʼuʼan spetsanil ja jas wa x-aljiyabʼi, pe ja maʼ wa snaʼa kʼinali wa spensaraʼan jujune ja xeteʼik wa xyayiʼi» (PROVERBIOS 14:15).
«Ja maʼ wa spensaraʼan leki wa xyila ja jas xiwela sbʼaji sok wa snakʼa sbʼaj, pe ja matik mi spensaraʼan leki wa x-ekʼ toj sok wa xyiʼaje wokol» (PROVERBIOS 22:3).

JA JUʼUN CHOLUMANI