JA 26 bʼa diciembre bʼa 2004, jun tsatsal terremoto bʼa 9,1 ja yipi yixtalaʼan ja isla bʼa Simeulue, wa xtax bʼa noroeste bʼa Sumatra (Indonesia). Ja matik ti aye kʼulan bʼa stiʼ ja mari kʼe yile wan tsʼujel ja jaʼi. Sok kechan ja yilaweʼi, wegoxta spakawe ajnel bʼa witsik, sok och awanuke «Smong! Smong!», ja bʼa skʼumale wa stojolan «tsunami». Mini ekʼ nalan ora, kʼe bʼutʼuk sok swesesi eljan ja jaʼi, bʼa sjomokan tʼusan mi spetsaniluk ja naʼitsik soka yal lugarik.

Ja isla bʼa Simeulue jani ja bʼajtan lugar ixtalaji yuja tsatsal tsunami. Ja bʼa 78,000 ixuk winik ja bʼa lugar jaw, kechan chamye juke. ¿Jas yuj jel tʼusani? * Ja swinkil tiw jel xyalawe ja refrán it: «Ta aykʼa jun terremoto sok waxa wila ja mari wan tsʼujel, paka ajnel bʼa witsik, pes yujni wego oj wespujuk». Ja swinkil ja Simeulue ti snebʼawe ja yaljelik jaw bʼa matik ekʼpaxtayujile bʼa snajel wani mojxeljan jun tsunami yajni xyilawe ja mari wan tsʼujel. Yuja skisawe ja senyaʼiki koltajiye bʼa kanye sakʼan.

Ja Biblia wa xyala xmojojixtajan jun niwan desgrasya bʼa yibʼanal ja luʼumi, jun wokol bʼa «jel tzatz juntiro. Quechan huocol mas tzatz ja iti masan cujlaji ja satqʼuinali soc mi ni nunca oj jac otro vuelta» (Mateo 24:21). Pe ja it mi wa stojolan ja kʼotel ja xchʼakelal ja Luʼum yuja smul mi stalnaye ja ixuk winiki ma jun desgrasya; pes ja Dyos mini skʼana oj xchʼaysnajel ja Luʼumi (Eclesiastés 1:4). Sbʼaja niwan tsatsal wokol jaw, ja Dyosi oj «[x]chʼay ele ja maʼ mero huas somo [...] ja luumi». Jani oj chʼaysnajel ja jastik mi lekuki soka wokoliki (Apocalipsis 11:18; Proverbios 2:22). ¡Juni lekil smajlajel!

Jas stukil jun tsunami, jun terremoto soka yajni wa xbʼojti jun volcán, ja bʼa chʼakelal jelxa mojani mini oj chamuk ixuk winik bʼa mey smule. Ja Biblia wa xyala «ja Diosi, jel [...] ja syajal scʼujoli» sok wa skʼapa «ja matik toji oj sbʼajuke ja luʼumi, sok ti tiw oj ajyuke sakʼan bʼa tolabida» (1 Juan 4:8; Salmo 37:29). ¿Jasa oj bʼobʼa kʼuluk bʼa oj kanan sakʼan ja bʼa niwan wokoli sok yabʼjel stsamalil ja jastik skʼapunej ja Dyosi? Jani skisjel ja abisoʼiki.

Mini xbʼobʼ kaltik ja yajtabʼ oj chʼakuk yibʼanal ja bʼa mi lekuki soka wokoliki, pes ja Jesús yala: «Mini june ma‘ oj sna‘e jas ora jas skʼakʼu‘il oj ekʼuk spetzanil. mini jun yanjel ja bʼa satkʼinali mini ja yunini. kechan ye‘n wa sna‘a ja tatali». Pe ama jachuk, ja Jesús slokowotik bʼa kʼelan jakan oj ajyukotik (Mateo 24:36; 25:13, Ja yajkʼachil sju‘unil ja dyosi). ¿Jas yuj? Ja Biblia wa xcholo jastal oj ajyuk ja luʼumkʼinali bʼajtanto ja Dyos oj yijan ja chʼakelal. Ja jastal junta chʼaykʼujol tsʼuj ja mari bʼa aji snaʼ kʼinal ja swinkil bʼa Simeulue jakum jun tsunami, cha jachni junxta oj tukbʼuk ja jastal wa xtax ja luʼumkʼinali bʼa oj yaʼ jnatik kʼinal mojanxa ja  chʼakelali. Ja bʼa yal rekwagro wa staʼa tiʼal jujuntik jas oj tukbʼuk bʼa yalunej ja Biblia.

Jastalni wa xyala ja rekwagro, ja jastik junuk it wani ekʼel anima tuktukil ja jas wa x-ekʼi sok mi bʼa yibʼanaluk ja luʼumkʼinali. Pe ja Jesús yala ja yajni xkilatik «spetzanil ja cosa iti» ojni jnatik ja chʼakelal jelxa mojan (Mateo 24:33). Jobʼo abʼaj jas styempo ekʼel ja jastik yalakan ja Jesús 1) bʼa yibʼanal ja luʼumkʼinali, 2) bʼa junta lajan sok 3) bʼa wan ipaxel mas. Pes ja smeranili, ti ayotik sakʼan ja bʼa tyempo jaw.

«Ja alarmaʼik bʼa wa xyaʼa abiso bʼajtan [...] wani xkoltani bʼa kanel sakʼan», jach yala jun presidente ja bʼa Estados Unidos. Yajni ekʼ ja tsunami ja bʼa 2004, aji ochuk alarmaʼik bʼa spetsanil ja lugar bʼa jachuk mixa oj chamuk jitsan ixuk winik. Junxta soka it, ja Dyosi wani cha yajel abiso sbʼaja jastal oj juluk ja chʼakelal. Ja Biblia wa skʼapa: «Jaxa yajcʼachil loil it [...] oj chʼac pucxuc ja ba spetzanil ja lugari. Cada lugar oj chʼac cholxuc yabye ja suinquili. Cuando chʼac ta pucxuqui, ti xa oj cʼot ticʼan ja tiempo ita» (Mateo 24:14).

Ja bʼa jabʼil ekʼi, ja taʼumantiʼik bʼa Jyoba skʼulane mas ja 1,900 miyon oraʼik bʼa xcholjel ja lekil rasoni bʼa 240 paisik sok lugarik, sok bʼa mas ja 700 kʼumali. Ja aʼtel it bʼobʼta jani ja preba mas chikan bʼa jelxa mojan ja chʼakelali. Yuja yajtanel yiʼoje sbʼaja smojeʼi, ja Taʼumantiʼik wa skʼulane ja janekʼ wa xbʼobʼyujile bʼa yaljel yabʼ ja tuk ja abiso bʼa jelxa mojan ja kastigo bʼa Dyosi (Mateo 22:39). Sok yuja weʼn aya wiʼoj ja rebista it wani sjeʼa ja janekʼto wa syajtaya ja Jyoba. Ajuluka kʼujol ja Dyos «mi huas scʼana ay maʼ oj chʼayuc ja yaltzili. Ja sgusto ja Cajualtiqui,  que spetzanil ja cristiano oj suchuc ja scʼujolei» (2 Pedro 3:9). Jaxa weʼn, ¿oj maʼ kis ja tsamal abiso wan yaljela wabʼ ja Dyosi?

Ajuluka kʼujol ja swinkil ja bʼa lugarik ja bʼa stiʼ mar bʼa Simeulue spakawe ajnel bʼa witsik bʼajtanto oj wespujukʼen ja mari. Yuja wego skisawe ja abiso it koltajiye bʼa kanye sakʼan. Junxtani soka it, bʼa oj kanan sakʼan ja bʼa niwan wokol jakumi jelni tʼilan oja leʼ akoltajel, pes jatoni ja styempoʼil ja wego. Ja jas aji ekʼyi ja aluman Isaías yuja Dyos stsʼijbʼan jun tsamal lokjelal bʼa wa xmakuni man jtyempotik, «ja bʼa xchʼakulabʼil ja kʼakʼu jumasaʼ». Ja lokjelali jaʼa it: «Laʼik, sok la kʼekotik ja bʼa swits ja Jyoba [...] soka yeʼn ojni sjeʼkitik sbʼaja sbʼejiki, sok tini oj bʼejyukotik tiwa» (Isaías 2:2, 3).

Kʼeʼel bʼa jun wits wani xbʼobʼa wil mas jaman lek sok jun lugar bʼa mi xyaʼa xiwel. Junxtani soka it, snajel ja sbʼejik ja Dyos, wa xtax bʼa Biblia, wan koltajel jitsan ixuk winik bʼa yibʼanal ja Luʼumi bʼa stojbʼesel ja sakʼanile (2 Timoteo 3:16, 17). Ja it wa xkoltajiye bʼa «oj bʼejyuk[e]» ja bʼa sbʼejik ja Dyosi, sok yabʼjel stsamalil ja skoltanel soka stalnanel.

¿Oj maʼ akʼan ja weʼn ja lokjelal soka talnanel wa skʼapa ja Dyos ja bʼa tyempo it jel wokoli? Awa pabor, paklay ja rekwagro yiʼojan ja artikulo it sbʼaja prebaʼik bʼa Biblia bʼa wa xya chijkajuk tixani ayotik ja bʼa stsaʼanil kʼakʼu (2 Timoteo 3:1). Ja Taʼumantiʼik bʼa wa komoni jelni sgustoʼe oj skoltaya bʼa oja wabʼ stojolil sok jastal bʼa oj wa makunuk ja jas wa xyala ja Biblia. Sok cha ojni bʼobʼa taʼ ja sjakʼjelik sbʼaja sjobʼjelik awiʼoji yulatajel ja jsitiotikon bʼa Internet www.pr418.com.