JA Jordan syamunej jun sakapunta splanta barko bʼa lajansok mi jel chaʼanyabʼal. ¡Pe jeltoni syajtay! Ja yeʼn yala: «Ja skʼebʼaki ja Rusell, jun yamigo ja jpamilya ja yajni chʼinonto». Yajni cham ja Ruselli, ja Jordan snaʼa jastal jel koltani ja bʼa sakʼanil ja statawelo soka bʼa snantati ja yajni wan ekʼel sbʼaje tsatsal wokoliki. Ja Jordan yala: «Yuja mas wanxa xnaʼa bʼa yeʼna ja wego, ja yal majtanal yakiʼi masto jel chaʼanyabʼalil xkila».

Ja sjejel it wa sjeʼa mini junukxta chaʼanyabʼalil wa xkilatik jun majtanal. Yajni june mi chaʼanyabʼalil xyila, ja juni jel chaʼanyabʼalil xyila yuja wa xyabʼ stojolil ja jas ti chʼikani. Ja Biblia wa staʼa tiʼal jun majtanal mi jas wa slaja, yajni wa xyala: «Como ja Diosi, jel yaj huax yab juntiro spetzanil ja cristiano, jayuj seca con ja único yunini. Jaxa spetzanil ja maʼ huas scʼuan ja yeni, mi ni oj chʼayuquea. Oj ni stae ja svida jau ba mi ni nunca huax chʼaqui» (Juan 3:16).

¡Juni majtanal wa xbʼobʼ yaʼ sakʼanil bʼa juntiro ja maʼ wa xyiʼaji! ¿Ay maʼ pilan majtanal bʼa jel chaʼanyabʼal? Ama jujuntik mi jach wa xyilawe, pe sbʼaja yaʼtijumik Dyosi jun jasunuk «jel chaʼan stsʼakol», bʼa jel chaʼanyabʼal (Salmo 49:8; 1 Pedro 1:18, 19). Pe ¿jas yuj ja Dyos yaʼa jastal majtanal ja sakʼanil ja Yunin bʼa keʼntik?

Ja jekabʼanum Pablo xcholo jachuk: «Qʼuelahuil jastal och ja mulal ja ba mundo. Smul ni jun huinic sbiil Adán, jaxa scastigo ja slea ja smuli, cham nia. Jayuj cajcajil huala chamtic» (Romanos 5:12). Ja bʼajtan winik Adán, pax mulanum ja yajni gana skʼoko ja smandar ja Dyos sok ja yuj kʼot chamuk. Yuj smul ja Adán, jpetsaniltik wala chamtik.

«Ja stzʼakol ja mulali ja‘ni ja chameli. ja stzʼakatal  ja dyosi ja‘ni ja jlekilaltiki [ma jsakʼaniltik bʼa juntiro] yuj ja kajwaltik kristojesusi» (Romanos 6:23, Ja yajkʼachil sju‘unil ja dyosi [YD]). Bʼa oj bʼobʼ eluk libre ja ixuk winik ja bʼa chamelchʼakeli, ja Dyosi sjekakon bʼa Luʼum ja Yunin Jesukristo, bʼa oj yaʼ ja sakʼanil mey yiʼoj mulal yuj jpetsaniltik. Stsʼakatal yuja yaʼa ja sakʼanili ma ‹ja koltanel›, ja maʼ wa x-ajyiyuj skʼuʼajel bʼa Jesús oj staʼ sakʼanil bʼa juntiro (Romanos 3:24, YD).

Sbʼaja spetsanil slekilal yaʼunejkitik ja Dyos stsʼakatal yuja Jesukristoʼi, ja Pablo yala: «Stzʼacatal lec ja Diosi porque ay jas yaunej quitic ja ba jel nihuan juntiro» (2 Corintios 9:15). Jachukniʼa, ja sakʼanil yaʼa jani ja majtanal mas jel niwan juntiro bʼa jel chaʼanyabʼal. Pe bʼa yibʼanal ja majtanalik yaʼunejkitik ja Dyos, ¿jas yuj ja xchamelal ja Jesús jaʼa mas jel niwani? ¿Jasa stukil yiʼoj yuja tuk majtanalik yaʼunejkitiki? * ¿Sok jastal oj kiltik ja keʼntiki? Ja chabʼ artikulo jakumi wa sjakʼa ja sjobʼjelik it.