¿MERAN MAʼ WA XBʼOBʼA TSAʼ JA JAS OJ EKABʼAJI? Jujuntik wa skʼuʼane chapanxa ay ja jas oj ekʼuk ja bʼa sakʼanile, sok tuk wa xyalawe yeʼnbʼi yamanyuj ja Dyos. Ja yuj, yajni mi staʼawe ja jas wa skʼanawe, wa x-el sganaʼe sok wa xyalawe: «Yujni jach wa skʼana ja Dyos».

Jujuntik wa x-el sganaʼe yajni wa xyilawe mi xchʼak ja wokolik soka jastik wan kʼulaxel bʼa mi tojuk ja bʼa luʼumkʼinal it. Bʼobʼta wa skʼanawe oj ajyuk jun sakʼanile mas lek, pe jitsan ekʼele mi x-elkʼot lek ja jas wa skʼanawe yuja guerraʼik, milwanel, chamelik ma ja desgrasyaʼik. Sok wa xkʼot snaʼe lom wane xchʼakjel yip.

Ay jastik wa x-ekʼ bʼa wa stukbʼes ja jsakʼaniltiki soka jastik jchapunej oj jkʼuluktiki (Eclesiastés 9:11). Pe ama jachuk, yuja jmodotik wani xbʼobʼ jtsatik ta wa xkʼanatik oj ajyukotik sakʼan bʼa tolabida, ma miyuk. Sok jachni wa xyala ja Biblia, keʼn wa stsaʼatik. ¿Jas yuj jach wa xkalatik?

Yajni ja chonabʼ Israel ojxta ochuk ja bʼa Luʼum Kʼapubʼal, ja Moisés aljiyabʼ yuja Dyos bʼa oj yalyabʼ ja chonabʼi: «Ti wa xkaʼakan bʼa weʼn oja tsaʼex ja sakʼanil sok ja chamelchʼakeli, ja lekilal sok ja jas mi lek oj ekabʼajexi, sok tʼilani oja tsaʼex ja sakʼanil bʼa oj ajyanik sakʼan, ja weʼnlex sok jawa wintilex, bʼa syajtajel jawa Dyosex Jyoba, smaklajel ja skʼumal sok ajyel kʼubʼan soka yeʼn» (Deuteronomio 30:15, 19, 20).

«Ti wa xkaʼakan bʼa weʼn oja tsaʼex ja sakʼanil sok ja chamelchʼakeli, ja lekilal sok ja jas mi lek oj ekabʼajexi, sok tʼilani oja tsaʼex ja sakʼanil» (Deuteronomio 30:19).

¡Jachukniʼa! Ja Dyos ya el libre ja israʼelenyoʼik ja bʼa Egipto sok yaʼa libre bʼa ajyel jun sakʼanile mas gusto ja bʼa Luʼum Kʼapubʼali. Pe ja slekilal jaw mi lomta oj jakuk. Ja yeʼnle tʼilan ay jas oj skʼuluke: jani stsajel «ja sakʼanil». ¿Jastal? Jani syajtajel ja Dyos, smaklajel ja skʼumali sok ajyel kʼubʼan soka yeʼn.

Cha jachtikni oja kʼuluk ja weʼn, ja jas oja tsaʼ skʼulajel jachni oj ekabʼaj. Ta waxa tsaʼa syajtajel ja Dyos, smaklajel ja skʼumali sok ajyel kʼubʼan soka yeʼn, jani wana stsajel ja sakʼanil, ja sakʼanil bʼa ajyel tolabida bʼa jun kʼachinubʼ bʼa Luʼum. Pe ¿jastik ti chʼikan ja bʼa jastik it?

Yuja aji ekʼyi yuja Dyos, ja jekabʼanum Juan stsʼijbʼan: «Porque ja Diosi, jel juntiro ja syajal scʼujoli», pes jani ja modoʼal mas tʼilan yiʼoj ja yeʼn (1 Juan 4:8). Ja yuj, yajni jobʼjiyi ja Jesús bʼay ja mandar mas tʼilani, ja yeʼn yala: «Yaj oja huab ja Huajual Diosi soc spetzanil ja hua cʼujoli, soc spetzanil ja hua hualtzili, soc spetzanil ja hua pensari» (Mateo 22:37). Ja yajtanel jani ja mero yechalil bʼa lek oj kil jbʼajtik soka Dyos sok mi yuj xiwel ma lom ita skʼuʼajel. Pe ¿jas yuj tʼilan oj jyajtaytik?

Ja yajtanel yiʼoj ja Jyoba sbʼaja ixuk winik oj slaj jastal ja yajtanel yiʼoj ja nantatalik sbʼaja yuntikile. Anima mulanume, ja nantatalik wani skʼujolane bʼa sjejelyile, bʼa stsatsankʼujolajele, bʼa skoltajele sok tsamalxta stojel ja yuntikile yujni wa skʼanawe aʼajyuke gusto sok awajyujile lek ja bʼa sakʼanile. ¿Sok jasa wa smajlaye ja bʼa yuntikile? Wa smajlaye akʼanjuke, akʼuʼajuke sok ayabʼye stojol spetsanil ja jas wa xyalawe bʼa slekilal yeʼnle. ¿Anke sbʼejni ja jTatik Dyos, bʼa tojni lek ja yeʼn, wani smajla oj jyajtaytik  sok yajelyi tsʼakatal yuj spetsanil ja jas skʼulunejkitiki?

Ja bʼa mero kʼumal tsʼijbʼaxi ja Biblia, ja yaljel smaklajel jitsan ekʼele wa stojolan «kʼuʼabʼal». ¿Sok mi maʼ jachuk wa smajlay jun tatal sbʼaj jun yunin yajni wa xyala yabʼ: «Maklayon»? Ja yuj, smaklajel ja skʼumal ja Dyos wa stojolan snajel ja jas wa skʼanakitik sok ja jas oj jkʼuluktiki. Anima ja bʼa jtyempotik, ja Dyos mixani skʼuman ja ixuk winiki, pe bʼa oj smaklayotik, tʼilan oj jkʼumuktik ja Biblia sok oj jkʼuluktik ja jas wa xyala (1 Juan 5:3).

Bʼa yajel chiknajuk ja stʼilanil smaklajel ja Dyosi, ja Jesús yala bʼa jun ekʼele: «Qʼuelahuile, mi quechanuc ja huaelal huax yaa sacʼanil ja cristiano, jaʼ ni spetzanil ja jas huax el ja ba sti ja Diosi» (Mateo 4:4). Ja waʼeli jelni tʼilan, pe smakʼlajel ja jpensartik soka snajel bʼa Dyos jani mas tʼilan. Ja mandaranum Salomón xcholo: «Ja snajeli wa xkoltani jastalni ja takʼini wa xkoltani, pe ja slekilal ja bʼa snajeli ja iti: Wa xya ajyuk sakʼan ja swinkili» (Eclesiastés 7:12). Ja biboʼil soka snajel bʼa Dyos wa xbʼobʼ skoltayotik ja bʼa jtyempotik sok bʼa oj kitik ja bʼej bʼa toj, bʼa wa x-ikʼwani och ja bʼa sakʼanil bʼa tolabida.

Ja bʼa artikulo kilatikta, kalatik jun sjejel sjeʼa ja Jesús bʼa xetʼan wa xyala: «Jaxa puerta ba chʼini soc ja chʼin beji, jaʼ ni huax huaj ja maʼ puro tzamal oj yili. Jel tʼusan ja maʼ huas staa ja bej jahui porque jel ni huocola» (Mateo 7:13, 14). Bʼa ajyel ja bʼa bʼej jaw, lekni oj kiltik oj skoltayotik june maʼ wa snaʼa kʼotel ja bʼa sakʼanil bʼa tolabida. Ja yuj, tʼilan kʼubʼan oj ajyukotik soka Dyosi (Salmo 16:8). Pe ¿jastal oj jkʼuluktik?

Ja bʼa kʼakʼuji jel jitsan ja jastik wa xkʼulantiki soka jas wa xkʼana oj jkʼultiki. Yuja jel latsʼanotik ma wantik spensarajel pilan jastik junuk mixa xkan tyempo bʼa spensarajel bʼa Dyos. Ja yuj, ja Biblia wa xya jul jkʼujoltik: «Jayuj huax cala huabyex, aa cuidadoex jastal huala bejyiyex ja ba mundo iti. Moc jauc amojex ja tonto jumasa [.] Porque huan eqʼuel ja tiempo y jel xa quistal ja mundo» (Efesios 5:15, 16). Ajyel kʼubʼan soka Dyos wani stojolan yajel bʼajtan bʼej ja bʼa jsakʼaniltik ja jastal wa xkila jbʼajtik soka yeʼn (Mateo 6:33).

Anima mixa xbʼobʼ atukbʼes ja jas ekʼtabʼaji, ayni jas oj bʼobʼ akʼuluk ja weʼn sok jawa pamilya bʼa oj ajyukawuj jun tsamal sakʼanil ja bʼa tyempo jakumto. Ja Biblia wa xyala ja jTatik Dyos, ja Jyoba, jelni skʼanawotik sok wa xyalakabʼtik ja jas oj jkʼuluktiki. Kʼela ja jas yala ja aluman Miqueas:

«Ja yeʼn yalunej awabʼ, ah winik, ja jas bʼa leki. ¿Sok jasunkiluk ja jas wan skʼanjelawi ja Jyoba? ¡Kechantani skʼulajel ja bʼa leki, sok yiljel chaʼanyabʼalil ja ajyel toji sok bʼejyel bʼa mi oj jelxan sok jawa Dyosi!» (Miqueas 6:8).

¿Jas la chiʼ ja weʼn? ¿Oj maʼ bʼejyan soka Dyosi? Ta waxa kʼana ja lokjelal it, ojni ataʼ ja slekilal bʼa tolabida oj yayi ja yamigoʼik ja Dyosi. Weʼnani oja tsaʼ.