Jas yuj ay sbʼej ajyel sakʼan
JA BʼA artikuloʼik ekʼta kilatik jujuntik wokolik wa xyaʼa xiwel bʼa wani xbʼobʼ ya kiltik lajansok mixa ay sbʼej ja jsakʼaniltiki. Bʼobʼta ja wego wan ekʼela bʼaj jun wokol sok waxa wabʼ lajansok mixa ay sbʼej ajyel sakʼan ma mixa maʼ xcham skʼujol amok. Pe wani xbʼobʼa kʼuʼuk lek ja Dyosi yaj wa xyabʼ ja wa xyila wana wokolaneli. Jelni xcham skʼujol amok.
Ja tsʼijbʼanum bʼa Salmo 86 xchiktes jachuk ja jastal wa sjipa skʼujol bʼa Dyosi: «Wa xkʼumana ja bʼa skʼakʼuʼil ja jwokoli, yujni ja weʼn oja jakʼ ki» (Salmo 86:7). Pe bʼobʼta ja weʼn waxa jobʼo abʼaj: «¿Jastal wa sjakʼaki ja Dyos yajni jel chamkʼujol ayoni?».
Anima ja Dyos bʼobʼta mi wegoxta oj stojbʼes jawa wokoliki, wani skʼapa oj ya laman jawa kʼujoli bʼa oj kuchukawuj. Ja bʼa Yabʼali, ja Biblia, wa xyala kabʼtik: «Mix cham acʼujolex. Cʼumanic ja Diosi. Cʼanahuic yi lec pavor ja Dios ba oj scoltayex. Aahuic yi lec stzʼacatal. Jaxa Diosi oj ya laman ja hua cʼujolexi. Oj ya cujlajuc [...] ja hua pensarex» (Filipenses 4:6, 7). Paklay ja tekstoʼik jakumi. Oja wil janekʼto wa xcham skʼujol amok ja Dyosi.
Ja Dyosi wa xcham skʼujol amok
«Cuenta ni ay yuj ja Dios ja yalchan jumasa [...], ¡jauc to ma ahualtzilex mi cuentauc oj ajyuca!» (Lucas 12:6, 7).
PENSARAʼAN JA IT: Ja yal chaniki, ama jel skoʼelal xkilatik, ja Dyosi jelni tʼilan xyila. Mini chʼaybʼenyuj jun yal nuxil chan; jujune bʼa yeʼnle jelni chaʼanyabʼal xyila ja sakʼanili. Pes sbʼaja Dyosi, mastoni jel chaʼanyabʼal xyila ja kristyanoʼiki yuja yal chaniki. Ja smeranili, keʼntik ja skʼulbʼen mas ekʼxeli. Yujni kʼulubʼalotik jastal splanta yeʼna sok wa xbʼobʼ ajyukujtik sok sjejel ja tsamalik smodo (Génesis 1:26, 27).
«Ah Jyoba, weʼna paklunejon, sok waxa naʼa jbʼaj lek. [...] Waxa wabʼ stojol ja jpensarik [...]. Naʼa jbʼaj jastal meran wala taxyon, sok naʼa ja jpensar jumasaʼ bʼa wa xya chamjkʼujoli» (Salmo 139:1, 2, 23).
PENSARAʼAN JA IT: Ja Dyosi wani snaʼa bʼaj lek. Wa snaʼa ja jastal aya xa wabʼi sok ja jas kechan weʼn wa xchama kʼujoli. Anima ja tuk bʼobʼta mi xyabʼye lek stojol jawa wokoli, ja Dyosi wani xcham skʼujol amok sok wa skʼana oj skoltaya. Ja jaw wani xyayi sbʼejlal jawa sakʼanili.
Ayni stojolil jawa sakʼanili
«Ah Jyoba, maklay ja korasyoni; aʼakan akʼotuk abʼaj ja kawanel bʼa skʼanjel koltanel. [...] Sutu jawa chikin ja bʼayoni; wegoxta jakʼaki ja yajni xkʼumana. [...] Ja yeʼn oj smaklay ja yorasyon ja maʼ mixa jas yiʼoji» (Salmo 102:1, 2, 17).
PENSARAʼAN JA IT: Jach jastal ja Dyos snolunej yibʼanal ja yalel satal pekʼel man kʼe ajyuk ja ixuk winiki (Salmo 56:8). Sok cha tini chʼikan jawa bʼaji. Ja Dyos wani xchʼak snaʼ ja wokolik ekʼela bʼaji sok ja janekʼ okʼela yujni jel chaʼanyabʼal xyilawa.
«Mok jas chamuka kʼujol, yujni keʼnon jawa Dyosi. Keʼn ja maʼ oj jtsatsankʼujolana, jaʼi, keʼn oj jkoltaya [...]. Ja Jyoba wa Dyosi [...] wa xyalawabʼ: ‹Mok xiwan. Keʼn meran lek oj jkoltaya›» (Isaías 41:10, 13).
PENSARAʼAN JA IT: Ja Dyosi pwesto ay bʼa oj skoltaya. Ta mokʼya, yeʼnani oj stul-a.
Ojto awil jun tsamal sakʼanil
«Como ja Diosi, jel yaj huax yab juntiro spetzanil ja cristiano, jayuj seca con ja único yunini. Jaxa spetzanil ja maʼ huas scʼuan ja yeni, mi ni oj chʼayuquea. Oj ni stae ja svida jau ba mi ni nunca huax chʼaqui» (Juan 3:16).
PENSARAʼAN JA IT: Ja Dyosi jelni skʼanawa juntiro ja yuj pwesto ajyi bʼa yajel ja sakʼanil ja Yunin yuj weʼna. Ja sakʼanil ja Jesús wa xyawi ja smajlajel bʼa oj ajyukawuj juna sakʼanil bʼa ay stojolil sok bʼa tolabida oj ajyan gusto. *
Anima jel chamkʼujol aya sok lajansok mixa xkuchawuj ajyel sakʼan, pila tyempo bʼa spaklajel ja Biblia sok ayijbʼuk ja skʼuʼajel awiʼoj sbʼaja jastik skʼapunej ja Dyosi. Ja jaw ojni ya gustoʼaxan sok oj skoltaya yiljel ayni sbʼej ajyel sakʼan.
^ par. 19 Ta waxa kʼana oja naʼ mas sbʼaja slekilal ja xchamelal ja Jesús, kʼela ja bideo La ka juljkʼujoltik ja xchamelal ja Jesús, wa xtax bʼa www.pr418.com/toj. Kaʼax bʼa JUʼUNIK > BIDEOʼIK > JA JTSOMJELTIKI SOKA XCHOLJELI.
Bʼobʼta cha ojni akʼul gusto
SBʼAJA KEʼNTIKONI
¿Jas yuj tʼilan spaklajel ja Biblia? (bideo mas najat)
Ja Biblia skoltunej jitsan mil ixuk winik bʼa sutanal ja luʼumi bʼa stajel ja sjakʼjel ja sjobʼjelik mas tʼilanik ja bʼa jsakʼaniltiki. ¿Wan maʼ xcha kʼana oj ataʼ ja weʼn?
JA JUʼUN CHOLUMANI
Ja orasyoni, ¿jastal wa skoltayotik?
Ja oj kʼajyukotik yajelyi orasyoni, ¿wan maʼ xmakuni?
JA JUʼUN CHOLUMANI
Ja slekilal ja syajal skʼujol ja Dyos
Ja Biblia wa skoltayotik bʼa ajyelkujtik skʼuʼajel ja bʼa tsamal smajlajel wa skʼapakitik ja Dyosi.
JA JUʼUN CHOLUMANI
¿Jas yuj jel chaʼanyabʼal ja majtanal yaʼunejkitik ja Dyosi?
¿Jas yuj oja wil jun majtanal jel chaʼanyabʼalil? Spensarajel sbʼaja jastik it wa skoltayotik bʼa oj jyajtaytik mas ja koltanel yaʼunejkitik ja Dyosi.
