¿AY MAʼ bʼa ekʼela bʼaj jachuk ja weʼni? Ta aykʼa, sen wani xa wabʼ stojol ja wokol wa xyiʼaje ja matik ekʼel sbʼaje: jom olomil, mal pensarik, mi snajel jas skʼulajel, chamkʼujol sok waychinel. Jitsan ja matik ekʼel sbʼaje jachuki jelxani axwele sok mixa ay sganaʼe ajyel sakʼan.

Ta yaʼunejakan telan akʼabʼ jun desgrasya, bʼobʼta waxa wabʼ mixa oj kuchukawuj mas ja wokoli. Bʼobʼta wa xkʼe apensaraʼuk lomxta sakʼana. Pe ja Biblia wa xcholo ayni sbʼej ja ajyel sakʼan sok ayni kiʼojtik rasonik bʼa smajlajel jun tsamal jsakʼaniltik.

Ja Eclesiastés 7:8 wa xyala: «Mas lek ja xchʼakulabʼil bʼa jun jasunuk yuja skʼeʼulabʼili». Ta ekʼela bʼaj jun desgrasya sok cha oja wa kulan jawa sakʼanili, bʼobʼta oja wabʼ lomxtani ay jas oja kʼuluka. Pe ta ajyi apasensya sok akʼujolan, ja jas wan ekʼelabʼaji oj tojbʼuk.

Ja Biblia yalunejkan oj kʼotuk ja kʼakʼu ja kristyano «mixato oj abʼxuk mas bʼa yeʼna ja yokʼeli mini ja yalalanel bʼa wokoli» (Isaías 65:19). Ja yaljelik it ojni kʼot smeranil yajni ja sGobyerno ja Dyos xya pax jun tsamal kʼachinubʼ ja Luʼumi (Salmo 37:11, 29). Mixa ojto ekʼ desgrasyaʼik. Ja xiwelal sok ja syajal awiʼojkani oj chʼayuk snajel. Ja Dyos maʼ jel ja yipi wa skʼapa: «Ja jastik junuk ekʼta mixa maʼ oj jak spensar sok mixa oj yajbʼesnuk» (Isaías 65:17).

Pensaraʼan sbʼaja it: ja jKʼulumantiki xchapunej bʼa oj ajyukujtik «jun lekil smajlajel ja bʼa tyempo jakumi», wa skʼana lamanxa oj ajyukotik sakʼan yajni xyaʼa mandar ja sgobyerno (Jeremías 29:11). ¿Oj maʼ yayi sbʼejlal jawa sakʼanil ja smajlajel it? Ja Sali, bʼa jtaʼatik tiʼal ja bʼa bʼajtan artikulo, wa xyala: «Spensarajel ja bʼa jas jel tsamal wantik smajlajel yajni xyaʼa mandar ja sGobyerno ja Dyosi ojni skoltaya bʼa oj chʼayuka kʼujol ja jas ekʼi sok bʼa oj kuchukawuj ja jas wan ekʼeli».

¿Jasa mas ojxta skʼuluk ja sGobyerno ja Dyos? Wa xlokowatikon bʼa spaklajel. Jachuk oja wil ayni sbʼej ja ajyel sakʼan ama awiʼajta wokol sok ja desgrasyaʼiki mojanxa oj kʼot tikʼan. Pe malan xkʼot ja kʼakʼu jaw, ja lekil rasonik bʼa Biblia ojni bʼobʼ skoltaya bʼa oj kuchukawuj ja wokoliki. La kiltik jujuntik sjejel.