TA JA weʼn ay maʼ chamelawuj, bʼobʼta tuktukil ja jastal awabʼuneji: syajal, jela tuchʼil sok kʼumbʼel aya. Ma bʼobʼta awabʼunej koraja, weʼna mul sok xiwel. Cha bʼobʼta ajobʼunej abʼaj ta ayto sbʼej ajyel sakʼan.

Ta wala okʼ yuj ay maʼ chamawuj, wani xbʼobʼa kʼuʼuk lek mi wa stojolan mi jas xkuchawuj. Ja smeranili, wa stojolan jel xa kʼana ja maʼ chamawuji. Pe ¿ay maʼ jas oj bʼobʼ skoltaya bʼa oja waʼ tʼun kulan?

Ama xa wabʼ lajansok mi jas oj ya kulan akʼujol, ja rasonik jakumi bʼobʼta oj skoltaya:

OKʼAN JA JANEKʼ OJ OKʼANI

Mini junukxta ja syajal wa x-abʼxiʼi sok mini ja janekʼ wa x-albʼi. Pe ja okʼeli oj bʼobʼ skoltaya bʼa oj lamxuk ja jastal waxa wabʼ aya. Ja Vanessa, bʼa jtaʼatikta tiʼal, wa xyala: «Kechan wa xmila jbʼaj okʼel. Wani  xkʼana oj ka eluk». Ja Sofía, bʼa junta chʼaykʼujol cham ja yijtsʼin ixuki, wa xyala: «Jelni yaj xkabʼ ja yajni wa xjuljkʼujol ja jas ekʼi. Jach jastal wa sakʼjiwi juna yajbʼel bʼa ayxa spojwil. Lajansok mini oj kuchukawuj ja syajali, pe jelni tʼilan oj kʼulaxuk bʼa oj tsutsuk ja bʼa yajbʼela».

ALA JA JAS WAXA PENSARANI SOK JA JASTAL AYA

Mini ay smaloʼil ja ayni ekʼele mixa kʼana maʼ oj smojtaya, pe ja syajali jelni al juntiro bʼa kechan weʼn oja kuche. Ja Jared, jun kerem bʼa 17 ja sjabʼili sok cham ja stati, wa xjul skʼujol: «Bʼobʼta ja jas wa xkala mini ay sbʼej, pe jelni skoltayon yaljel yabʼ ja tuk ja jastal wa xkabʼ ayoni». Ja Yanis, bʼa taxta tiʼal ja bʼa bʼajtan artikulo, wa xcha yala pilan slekilal: «Loʼilanel soka tuk jelni yaʼa kulan jkʼujol. Kabʼ wala abʼjiyon stojol sok mixa jel jtuchʼil kabʼ ayon».

KʼANA AKOLTAJANAN

Jun loktora yala: «Ja matik wa skʼana oj koltajuke yuja spamilya sok ja yamigoʼik, ja yajni ajkʼachto ay maʼ chamelyuji sok masni mixa jel wokoluk oj kuchyuj yajni x-ekʼ ja tyempo». Alayabʼ jawa wamigoʼik jasa oj bʼobʼ skʼuluke bʼa oj skoltaya. Bʼobʼta wani skʼanawe oj skoltaya, pe mi snaʼawe jastal (Proverbios 17:17).

MOJXAN MAS SOKA DYOSI

Ja Tina wa xyala: «Yajni ja jtatami junta chʼaykʼujol cham yuja canceri, jchʼaya ja maʼ mas wa xjipa jkʼujoli sok kʼe kalyabʼ yibʼanal ja Dyosi. Yajni wala kʼeyoni, wa xkʼanayi ayaki kip bʼa oj ekuj ja kʼakʼuji. Ja Dyos skoltayon bʼa jitsan modo...». Ja Tarxa, bʼa ayiʼoj 22 jabʼil yajni cham ja snani, wa xjul skʼujol: «Jelni xyaʼa kulan jkʼujol skʼumajel kʼakʼu kʼakʼu ja Biblia. Tolabida wa xyaki jun lekil jpensar».

SPENSARAJEL SBʼAJA SAKʼWELALI

Ja Tina cha yala: «Ja bʼajtanto, mini xyaki kulan jkʼujol ja smajlajel sbʼaja sakʼwelali. Ja keʼn wa xkʼana ti oj ajyuk jmok ja jtatam ja bʼa jutsʼin jawi jaxa kuntikili wani skʼana ti oj ajyuke soka stateʼi. Pe ja wego, ama ekʼta chane jabʼil, jkʼuʼunejxa lek sbʼaja smajlajel jawi. Jani wa xyaki kulan jkʼujol. Spensarajel ja yajni xkila jbʼajtikoni wani xya gustoʼaxukon sok wa xya ajyukon laman».

Bʼobʼta ja weʼn mini wegoxta oja waʼ kulan, pe ja jas yala ja Vanesa bʼobʼta oj skoltaya. Ja yeʼn yala: «Ja abʼani mini oj kuchukawuj, pe ayni kʼakʼujik mas xlikiki xa wabʼi».

Ajuluka kʼujol: anima mini jas oj xchʼayawi ja jastal aya xa wabʼi, pe ayni sbʼej ja ajyel sakʼani. Soka skoltanel ja Dyos, ja weʼn wani xbʼobʼa wabʼ stsamalil soka wa wamigoʼiki sok oj ajyuk stojolil jawa sakʼanil. Ja Dyosi ojxta ya sakʼwuk ja matik chameli. Ja yeʼn wa skʼana oja wil ja matik chamelawuji sok mixato oja wabʼ ja syajal waxa wabʼ ja wego.