JA LOʼLANEL ja bʼa nupaneli jelni xyajbʼesni. Meran, ayni jujuntik yaʼuneje perdon ja snupe yuja sutxi skʼujoli sok cha ajyel lajan. * Pe ama skʼutsu ja snupanele ma lajanto x-ajyiye, ja maʼ mey smuli jelni yaj xyabʼi. ¿Jasa oj bʼobʼ koltajukeyuj yajni jel yajbʼel ay xyabʼye ja skʼujoleʼi?

Ama yajbʼel ay lek ja skʼujole ja matik loʼlubʼale yuja snupe, akʼubʼal kulan skʼujole yuja Biblia. Ja yeʼnle snebʼuneje ja Dyos wa xyila ja swokole sok wa xyabʼ stojol ja syajal wa xyabʼyeʼi (Malaquías 2:13-16).

«Yajni ja chamkʼujolik och jitsanbʼuk bʼa keʼna, ja weʼn awaki kulan jkʼujol sok wa lamxukon» (Salmo 94:19).

Ja Bil wa xjul skʼujol: «Yajni wa xkʼuman ja bersikulo it, wa xkabʼ ja Jyoba tsamalxta wa slaʼan kʼumanon, jastalni wa skʼulan jun tatal bʼa jel syajulal skʼujol».

«Ja weʼn toj waxa jeʼabʼajsok ja maʼ toj ayi» (Salmo 18:25).

Ja Carmen, bʼa loʼlaji jitsan ixaw yuja statam, wa xyala: «Ja jtatami xchʼaykʼujolanon, pe ja keʼn wa xnaʼa ja Jyoba tolabida toj oj ajyuk jmok, mini oj xchʼaykʼujolukon».

«Mix cham acʼujolex. Cʼumanic ja Diosi. Cʼanahuic yi lec pavor ja Dios ba oj scoltayex. Aahuic yi lec stzʼacatal. Jaxa Diosi oj ya laman ja hua cʼujolexi» (Filipenses 4:6, 7).

Ja Saxa wa xyala: «Mini xkaʼakan skʼumajel ja teksto it. Yajni mas wa xkayi orasyon, ja Dyosi mastoni wa xyaki lamanil».

Spetsanil ja matik jtaʼatikta tiʼali ayni spensarane mixa ay sbʼej ajyel sakʼan, pe sjipa skʼujole bʼa Jyoba, sok tsatsankʼujolajiye yuja Biblia. Ja Bil yala jachuk: «Ja skʼuʼajeli jani yayi stojolil ja jsakʼanili yajni bʼa keʼna lajansok chʼakta jomuk yibʼanal. Ama bʼejyiyon jun tyempo bʼa jun chʼayan kʼinal, ja Dyosi tini ajyi jmoka» (Salmo 23:4).