Ja maʼ yala it jun yamiga bʼa spamilya ja Bebe bʼa wani skʼana koltanel. Pe ja Bebe jel kʼubʼan ajyi soka stati, sok ja yaljelik aljiyabʼi mini tʼun aji kulan skʼujol, jaʼukto maʼ, jel yajbʼesji. Tikʼanxta wa sjobʼo sbʼaj, «¿jastal modo mas lek ja chami?». Jabʼilik tsaʼan, ja jas ekʼi ti stsʼijbʼan bʼa jun libro, soka jaw wa sjeʼa jeltoni snaʼa ja chamwinik stati.

Ja jas ekʼ sbʼaj ja ixuk it wa sjeʼa wani xyiʼaj jitsan tyempo bʼa yajel lamxel ja syajal sbʼaja maʼ wa xchamkujtiki, mastoni ta jaʼ june ja bʼa jpamilyatiki. Ja Biblia wa xyala ja ultimo jkontratik jani ja «chamel chʼaqueli» (1 Corintios 15:26). Junta chʼaykʼujol wa x-ekʼi sok wa sjomo ja jsakʼaniltiki sok mini oj bʼobʼ jkomtik bʼa mok ekʼuk, jani wa xyiʼajkitik ja maʼ jel xkʼanatiki. Ja yuj, sbʼejni ja mi xnaʼatik jas skʼulajel ja yajni ay maʼ wa xchamkujtiki soka jastik wa xyaʼakani.

Bʼobʼta ay bʼa ajobʼunejabʼaj: «¿Janekʼ tyempo oj ekʼuk bʼa mixa jel oj kabʼ ja syajali? ¿Jasa oj bʼobʼ jkʼuluk bʼa oj kuchkuj? ¿Jastal oj bʼobʼ jkoltaytik ja maʼ wan ekʼel sbʼaj ja it? ¿Ojto maʼ sakʼwukejan ja maʼ chamelkujtiki?».