Junta chʼaykʼujol elumejan sok xbʼataljiyejan. Ja chane winike soka kawujik bʼa kajaneʼi lajansok meran elumejan ja bʼa Biblia. Ja bʼajtan kawuji yelaw melado (ma sak), ja maʼ kajani jel chaʼanyabʼal sok jun ajkʼach mandaranum. Tixa wa snochoyi jun kawuj alasán (ma yelaw kʼakʼ), ja maʼ kajani mi xyaʼ ajyuk lamanil ja bʼa luʼumi. Tixa cha nochan jun kawuj oscuro, kʼikʼ jastal akwal, ja maʼ kajani slikunej jun pesa sok wan abʼxel jun rason bʼa xiwela sbʼaj bʼa wan yaljel mey waʼelal. Ja xchanili, jun yaʼax keskes kawuj bʼa yiʼojan chamelik sok chamelchʼakel yuj tuk jastik junuk, sok ja maʼ kajani jani ja Chamelchʼakeli. Ja Hades, ja kʼeʼen bʼa wa xchʼak wajuk ja ixuk winiki, kʼubʼanxta ay bʼa spatik, smiljel yibʼanal ja bʼa wa x-ekʼi (Apocalipsis [Revelación] 6:1-8).

«Jel ya xiwkon ja sbʼajtanil ekʼele jkʼuman sbʼaja chane matik kajan kawuj bʼa Apocalipsis. Jpensaran kʼota ja tyempo yajelyi kwenta ja Dyosi sok mi chapan ayon sok mini oj kankon sakʼan» (Crystal).

«Jel xkʼulan gusto ajyi ja nakʼsat bʼa chanwane winik kajane kawuj bʼa tuktukil yelawi. Yajni jnebʼa jas wa stojolan, kila ayni lek sbʼeja» (Ed).

¿Junxta maʼ waxa pensaraʼan jastal yeʼnle? Chikan jastal xa pensaraʼan, ja nakʼsat bʼa chanwane winik kajane kawuj ja bʼa tsaʼanxta libro bʼa Biblia, sbʼiʼil Apocalipsis ma Revelación, jani ja mas jel naʼubʼal sbʼaji. Sok yabʼjel stojol ja nakʼsat it, jelni oj skoltaya. Ja Dyos wa xyalawabʼ ta akʼuman, awabʼ stojolil sok akʼulan ja jas wa xyala ja nakʼsatik bʼa libro it, ojni ataʼ ja meran gustoʼil (Apocalipsis 1:1-3).

Ayni ixuk winik wa xiwye yuj ja nakʼsat bʼa chane winik kajane kawuj bʼa Apocalipsis, pe mi kʼulubʼal bʼa ay maʼ oj yaʼ xiwuk. Jaʼukto ma jaw, ay jitsan miyon ixuk winik bʼa akʼubʼal tsatsbʼuk yile ja skʼuʼajel yiʼojeʼi sok ajyel yujile ja smajlajel bʼa oj tojbʼuk ja jastik junuki. Sok jachni oj bʼobʼ ekabʼaj ja weʼn. Ja artikulo jakumi wa xcholo mas.