«¿Bʼaxa ay ja Dyosi?»
«TIKʼANXTA WA XJOBʼXI JA IT: ¿BʼAXA AY JA DYOSI?» (Ja papa Benedicto XVI, yajni wan yulatajel jun lugar bʼa ajyiyujile presoʼanumik ja bʼa Auschwitz [Polonia]).
¿JAXA WEʼN? ¿AY MAʼ BʼA AJOBʼUNEJ ABʼAJ JA SJOBʼJEL IT YAJNI WAXA WILA JUN DESGRASYA? ¿AY MAʼ BʼA EKʼELABʼAJ JUN JASUNUK BʼA JEL SYAJBʼESA SOK YA PENSARAʼUK JA DYOS MI XCHAMSKʼUJOL AMOK?
Ja Sheila, ti sbʼaj bʼa Estados Unidos sok ti kʼi bʼa jun pamilya bʼa jel skʼuʼuneje ja srelijyone, wa xyala: «Man yal jchʼinil jkʼuʼunej bʼa Dyos yujni wa xnaʼa yeʼn ja jKʼulumantiki, pe mi jel kʼubʼan ajyiyonsok. Ama wa xnaʼa wa xbʼobʼ yil-on, wani xpensaraʼan mi jel skisawon. Mi xkʼuʼan ta wa xyilkʼujolanon, pe cha mini xkʼuʼan ta wa xchamskʼujol jmok». ¿Jas yuj jach wa spensaraʼani? Yeʼn wa xyala: «Mi bʼa kila ja skoltanel ja Dyos yajni ja jpamilya tikʼanxta ekʼ sbʼaj desgrasya».
Jastalni ja Sheila, bʼobʼta ja weʼn waxa kʼuʼan ja bʼa Dyos jel juntiro yipi, pe ama jachuk, waxa jobʼo abʼaj ta wa xchamskʼujol amok. Cha jachni sjobʼo sbʼaj ja Job, jun tojil winik bʼa sjipa skʼujol ja bʼa yip sok ja sbiboʼil ja jKʼulumantiki (Job 2:3; 9:4). Tsaʼan ja tikʼanxta ekʼ sbʼaj wokolik sok yabʼ lomxa ay ja sakʼanili, sjobʼoyi ja Dyosi: «¿Jas yuj waxa nakʼaki jawa sati sok waxa wilawon kontra?» (Job 13:24).
Pe ¿jas wa xyala ja Biblia? ¿Yeʼn maʼ smul ja Dyos ja wokoliki? ¿Wan maʼ xchamskʼujol sbʼa yibʼanal ja ixuk winik sok bʼa jujune ja keʼntiki? ¿Jastal oj bʼobʼ jnatik ta wa snaʼa jbʼajtik, ta wa xyabʼyotik stojol sok ta wa skoltayotik yajni ay kiʼojtik wokoli?
Ja bʼa artikuloʼik jakumi, oj kiltik jastal ja skʼulbʼenik ja Dyos sok ja Biblia wa sjeʼakitik ja Dyos wa syajtayotik (Romanos 1:20). Jachuk, ja weʼn mas oja naʼ sbʼaj jawa Kʼulumani, sok yajni mas waxa naʼa sbʼaj, mas oja kʼuʼuk wa xchamskʼujol amok (1 Juan 2:3; 1 Pedro 5:7).
