«¿Janekʼto tyempo, ah Jyoba, oj awanukon skʼanjel jkoltajel, pe ja weʼn mixa maklay? ¿Janekʼto tyempo oj jkʼan jkoltajel yuja spekʼjel chikʼi, pe ja weʼn mi jas xa kʼulan?» (Habacuc 1:2, 3). Jach yala ja Habacuc, jun tojil winik, bʼa lek ilji yuja Dyosi. ¿Yuj maʼ mi sjipa skʼujol bʼa Dyos yuja yala ja it? Mini tʼusila. Jaʼukto maʼ jaw, ja Dyos stsaʼunejxa jun kʼakʼu bʼa oj xchʼak ja wokoliki (Habacuc 2:2, 3).

Yajni juna pamilya ma weʼn wan ekʼelabʼaj wokol, wego wa x-ocha pensaraʼuk ja Dyos jelxa albʼita ja mi xkoltani. Pe ja Biblia wa xyalakabʼtik: «Meran nia, lajan soc mi ni nunca oj cʼot smeranil ja jas huax yala ja Cajualtiqui pero majlayic, ti oja huilex ta mi oj ni cʼot smeranila. Mi tox jaqui, como jel ja spasensia jmoctiqui. Mi huas scʼana ay maʼ oj chʼayuc ja yaltzili. Ja sgusto ja Cajualtiqui, que spetzanil ja cristiano oj suchuc ja scʼujolei» (2 Pedro 3:9).

Ja Dyosi ojxta skʼuluk. Ja Jesús yala jun lame ixuk winik oj yil ja senyaʼik bʼa oj sjeʼ xmojojixta «ja xchʼakelal ja jastik ay bʼa luʼumi» (Mateo 24:3-42, TNM). Ja wego wani kʼotel smeranil ja jas yala oj ekʼuk ja Jesús, bʼa wa sjeʼa ja Dyos wani yajel yochel ja bʼa jastik wan ekʼel ja bʼa luʼumi. *

¿Pe oj maʼ bʼobʼyuj ja Dyos xchʼakjel ja wokoliki? Yajni ti ajyi bʼa Luʼumi, ja Jesús sjeʼa ja Dyos oj bʼobʼ ya lamxuk ja swokol ja ixuk winik. La kiltik jujuntik sjejel.

Ja mal tyempo. Bʼa jun ekʼele yajni ja Jesús sok ja snebʼumaniki ti aye bʼa mar bʼa Galilea, ajyi jun tsatsal chawuk jaʼ bʼa xiwela sbʼaj oj mukxuk koʼ ja barko. Ja Jesús sjeʼa ja yeʼn sok ja sTati, wani xbʼobʼ skom-e ja yip ja skʼulbʼeniki (Colosenses 1:15, 16). Ja yeʼn kechanta yala: «Laman la ajyi, xyutaj. Jaxa chʼac yali, chʼabaji huego ja iqʼui. Xlamami huaj juntiro» (Marcos 4:35-39).

Ja chameliki. Jitsan ixuk winik wani snaʼawe ja Jesús wa xbʼobʼ stojbʼes ja matik mi xyila kʼinali, matik renkoʼaye, matik wa x-ajiyile atake, matik ayiʼoj lepra sok tuk chamelik. Ja Biblia wa xyala ja Jesús ya tojbʼuk «spetzanil ja matic malo ayi» (Mateo 4:23, 24; 8:16; 11:2-5).

Ja waʼini. Yajni ti ajyi bʼa Luʼumi, ja Jesús ya makunuk chabʼ ekʼele ja ipal akʼubʼalyi yuja sTati bʼa yajel jitsanbʼuk ja tʼusan waʼelal yiʼoji bʼa yajel waʼuk jitsan mil ixuk winik (Mateo 14:14-21; 15:32-38).

Ja chamelchʼakeli. Ja Jesús ya sakʼwuk oxe ixuk winik, june bʼa yeʼnle ayxa yiʼoj chane kʼakʼu chamel. Ja it wa sjeʼa ja Jyoba wani xbʼobʼ ya sakʼwuk ja chamwiniki (Marcos 5:35-42; Lucas 7:11-16; Juan 11:3-44).