Pensaraʼan jutsʼin sbʼaja jastal jel kʼubʼan xyiʼaj sbʼaje ja lojiki. Lajansok juneʼitaʼe. Ja direktora sbʼaja matik wa spaklaye ja lojiki, ja Nancy Segal, bʼa chomajkil ayiʼoj jun yijtsʼin loj, wa xyala bʼa jujuntik ja matik loji «wa xyabʼ stojolil sbʼaje lek sok mi tʼilanuk oj yal sbʼaje». Jun ixuk yala ja jastal wa xyiʼaj sbʼaj soka yijtsʼin loji: «Wa xnaʼa jbʼajtikon lek».

¿Jas yuj wa xyabʼ xchikʼel sbʼajeʼi? Ama tini cha chʼikan ja jas joybʼanubʼal yujile sok tuk jastik junuk ja bʼa skʼiʼelaleʼi, jujuntik paklanumik kʼotele snajel yuja jachuke jabʼi yuja junxta ADN yiʼoje.

PENSARAʼAN JA IT: Yeʼnani ja Dyos ja maʼ skʼulan ja chaʼanyabʼal ADN, ja yujil, sbʼejni spensarajel wani xyabʼyotik lek stojolil. Ja yuj, ja tsʼebʼanum David stsʼijbʼan: «Wa ajyukon nakʼan bʼa yoj slukum ja jnani. Ja jbʼakeliki mini nakʼanuk ajyi bʼa weʼna ja yajni nakʼan kʼulajiyoni [...]. Jawa sati kʼotni yil ja yal jkwerpo mito tsʼikanuki; yibʼanal ja sparteʼik naka tixa taxel tsʼijbʼunubʼal bʼa wa libro» (Salmo 139:13, 15, 16). Ja Dyos mi kechanta wa snaʼa sok wa xyabʼ stojol ja jastal mero kʼulubʼalotiki, cha wa snaʼa ja jastik ekʼel ja bʼa jsakʼaniltiki bʼa wa sjeʼa jas yuj jachuk ja jmodotiki. Ja yuj, wani xkʼuʼantik lek bʼa mey pilan jastal yeʼn bʼa wa xyabʼyotik lek stojolil.

Ja mandaranum David yayi orasyon: «Ah Jyoba, weʼna paklunejon, sok waxa naʼa jbʼaj lek. Waxa naʼa yajni wala kulaniyoni sok yajni wala kʼeyoni. Waxa wabʼ stojol ja jpensarik ama najat aya lek. Mito x-el ja bʼa kakʼi, ¡pe kʼela!, ah Jyoba, ja weʼn wanxa xa naʼa lek» (Salmo 139:1, 2, 4). Chomajkil, ja Jyoba wa snaʼa lek ja jas mero nakʼan ay ja bʼa jkʼujoltiki, ja jas mero wa xkʼan jkʼultiki (1 Crónicas 28:9; 1 Samuel 16:6, 7). ¿Jas wa sjeʼakitik ja it sbʼaja Dyosi?

Wa sjeʼakitik ama ay ekʼele ja bʼa korasyontiki mi xnaʼatik yaljel jastal ayotik soka jas wa xpensaraʼantiki, ja jKʼulumantiki wanxa snaʼa. Ja yeʼn wa xyila ja jas wa xkʼulantiki, pe cha wani xyabʼ stojol jas yuj wa xkʼulantik. Sok mi kechanuk ja jaw, cha wani xbʼobʼ snaʼ ja jas oj jkʼuluktik lekbʼi mi xbʼobʼkujtik yajel mas ja janekʼ wa xkʼanatik bʼa yaʼteltajeli. Jachukniʼa, yuja ja Dyos yeʼnani skʼulanotik bʼa oj yajtanukotik, wani xkʼuʼantik lek ja yeʼn mi kechanta wa skʼana, cha wani xkʼankʼuniyuj snajel sok yabʼjel stojol ja jastik lek wa xpensaraʼantiki sok ja jas wa snikawotik skʼulajeli (1 Juan 4:7-10).

Ja Biblia wa xyalakabʼtik:

• «Porque ja maʼ toji, huan iljel yuj ja Diosi. Huan maclajel cuando huas scʼuman ja Diosi» (1 PEDRO 3:12).

• Ja Dyos wa skʼapa: «Oj ka awabʼ stojolil, sok oj jeʼawi ja bʼej bʼa tʼilan oj wajani. Ojni kaʼa jsata bʼa oj kawi rasonik» (SALMO 32:8).

¿Wan maʼ skoltayotik bʼa oj kuchkujtik ja wokolik snajel ja Dyos wa xyabʼyotik stojol? Pensaraʼan sbʼaja Anna, bʼa Nigeria. «Yuja mi xnaʼa jas oj jkʼuluki wa xjobʼo jbʼaj ajyi ta lekto ja jsakʼanoni. Yajni aljikabʼ ay kiʼoj cáncer bʼa jmix, chamtani ja jtatami sok ja yal kakʼixi tey bʼa ospital yuja ayiʼoj hidrocefalia (wa stsomo sbʼaj jaʼ ja bʼa xchijnakʼi). Jelni wokol bʼa keʼna ajyel ja bʼa ospital lajan soka yal kakʼixi sok ajelki operasyon, quimioterapia sok radioterapia».

¿Jasa koltaji ja Anna bʼa oj kuchyuj? «Jel xkʼulan gusto spensarajel sbʼaja tekstoʼik jastal ja Filipenses 4:6, 7, bʼa wa xyala ja Dyosi ‹oj ya cujlajuc ja jcʼujoltiki porque ta ti cʼa ay ja jpensartik soc ja Cristo Jesusi, oj ya ecʼquitic ja chamcʼujoltiqui›. Yajni wa xkaʼ jul jkʼujol ja yaljelik it, jel kʼubʼan wa xkabʼ wala ajyiyon soka Jyoba, pes wani xnaʼa ja yeʼn wa xyabʼyon lek stojol yuja keʼni. Cha jelni skoltayon ja kala jmoj-aljelik Taʼumantiʼiki.

Ama maloto ayon, pe mas lekxa wala taxtikon soka yal kakʼixi. Jaʼ wa xwaj jkʼujoltikon ja jas leki ama ay wokolik pes ja Jyoba tolabida tey jmoktikon. Ja Santiago 5:11 wa xyala: ‹Jayuj huax calatic que jel lec yilahue. Huan nix naatic jastal jel tzatz ecʼ ja Job soc ja Diosi. Huax naatic jastal jel lec huaj ja mas tzaani porque jach ni huas scʼana ja Cajualtic Diosi. Jel ni huas stalna jyaujulaltic ja Cajualtiqui. Huan nix yab ja syajal ja juocoltiqui›». Ja Jyoba wani xyabʼ stojol ja wokolik stʼaspun ja Job, sok lani jkʼuʼuktik lek ja Jyoba cha wani snaʼa ja jbʼajtiki.