Ja yabʼjel syajal ja tuki wa stojolan yabʼjel lajansok weʼn wan ekʼelabʼaj ja jastal mero wa xtax ja juni. Ja loktor Rick Hanson, jun paklanum bʼa jel snaʼa jastal wa x-aʼtiji ja jpensartiki, wa xyala: «Tixani ay bʼa kojoltik ja yabʼjel syajal ja tuki».

PENSARAʼAN JA IT: ¿Jas yuj ja keʼntik wa xbʼobʼ kabʼtik syajal ja tuki pe ja chanteʼiki miyuk? Ja Biblia wa xyala kechanta keʼntik kʼulajitik jastal ja splanta ja Dyosi (Génesis 1:26). Ja it wa stojolan wa xbʼobʼ jetik ja lekil smodoʼiki. Ja yuj, yajni june wa xyabʼ syajal ja smoji, jani wan sjejel ja lekil smodo ja jKʼulumantik Jyoba (Proverbios 14:31).

Ja Dyos wa xyabʼyotik syajal sok jel tuk wa xyila yajni wa xkiʼajtik wokoli. Yajni ja israʼelenyoʼik ajyiye moso ja bʼa Egipto, bʼa jel yiʼaje wokol, sok ja 40 najtik jabʼilil ajyiye ja bʼa takin kʼinal, ja Biblia wa xyala: «Bʼa yibʼanal ja wokol ekʼ sbʼaji jelni yaj yabʼ ja yeʼn» (Isaías 63:9). Ta awila ja Dyosi mi kechan wa snaʼa wan yijel wokol ja xchonabʼi, cha wa xyabʼ ja syajalili. Yeʼn yala: «Sok wa xnaʼa lek ja syajal ja swokoleʼi» (Éxodo 3:7). «Chikan maʼ wa syamawex ja weʼnlexi jani wan syamjel ja jbʼakʼ sati» (Zacarías 2:8). Ja yuj, yajni ay maʼ wa syajbʼesotik, lajansok yeʼn wan kʼulajelyi.

Ja Biblia wa skʼapakitik, ama ja jkʼujoltiki xtʼabʼtʼuni sok wa xyaʼ kabʼtik mi xbʼajintik oj snaj jyajulaltik ja Dyosi, ja yeʼn wani «snaʼa spetzanil, como jel nihuan ja yeni» (1 Juan 3:19, 20). Ja Dyosi mas wa snaʼa jbʼajtik ja yeʼn yuja keʼntiki. Wa snaʼa lek yibʼanal ja jas wa x-ekʼ jbʼajtiki, ja jastik wa xpensaraʼantiki, ja jastal wala taxtiki sok yabʼjel lajansok yeʼn wan ekʼel sbʼaj ja jastal mero wala taxtiki.

Ja Biblia wa xyalakabʼtik:

• «Anto ja weʼn oj paywanan, sok ja Jyoba oj sjakʼawi. Oja kʼan akoltajel, sok ja yeʼn oj yalawabʼ: ‹¡It bʼayonjul!›» (ISAÍAS 58:9).

• «Yujni ja keʼn wa xnaʼa lek ja jas wanon spensarajel sbʼaja weʼnlexi›, jachʼ wa xyala ja Jyoba, ‹pensarik bʼa laman sok mi bʼa wokolik, bʼa oj kawilex jun lekil smajlajel ja bʼa tyempo jakumi. Sok ja weʼnlexi oja kʼumukonex sok oj jakanik sok oja waʼexki orasyon, sok ja keʼn ojni jmaklayex» (JEREMÍAS 29:11, 12).

• «Chʼika ja yaʼalel jsat bʼa wa tsuj. ¿Mi maʼ teyuk bʼa wa libro bʼa julkʼujolal?» (SALMO 56:8).

¿Wan maʼ skoltayotik bʼa oj kuchkujtik ja wokolik snajel ja Dyos wa xyabʼyotik stojol? La kiltik ja jas ekʼ sbʼaj ja María.

«Jelni yaj kabʼ yiljel jastal ja jkerem bʼa 18 sjabʼil jel wokolani yuja cáncer, bʼa kechan kuchyuj chabʼ jabʼil sok ti chama. ¿Jastal modo jach wan ekʼel jbʼajtikon? Jel tajkiyon soka Jyoba yuja mi skoltayoni.

Wa xkabʼ ajyi ja Jyoba mi syajtayon. Wake jabʼil tsaʼan, kalyabʼ ja jastal wala taxyon jun kamiga ja bʼa jkongregasyon, bʼa jel xyajtani sok bʼa jel snaʼa smaklajel. Yajni albʼelxa smaklayonta, ti ya juljkʼujol jun teksto bʼa Biblia bʼa jel snikawon: Ja 1 Juan 3:19, 20, bʼa wa xyala ja ‹Diosi huan ni snaa spetzanil, como jel nihuan ja yeni›. Sok ja kamiga cha xcholokabʼ ja Jyoba wani xyabʼ stojol ja jwokoltiki.

Ama jachuk, tajkeltoni ayonsok. Anto jkʼuman ja Salmo 94:19, bʼa wa xyala: ‹Yajni ja chamkʼujolik och jitsanbʼuk bʼa keʼna, ja weʼn awaki kulan jkʼujol sok wa lamxukon›. Ja teksto it kʼot man jkʼujol. Bʼobʼnikuj sjamjelyi ja jkʼujol ja Jyoba bʼa wani xnaʼa wa smaklayon, wa xyabʼyon stojol sok ja jaw ya ajyukon laman».

¡Janekʼto wa xya kulan jkʼujoltik snajel ja Dyosi wa xyabʼyotik stojol sok jyajaltik! Pe ¿jas yuj jel ja wokoliki? ¿Yuj maʼ wa xya jtuptik yuj jun mulal jkʼulunejtik? ¿Oj maʼ kʼot jun kʼakʼu oj kʼot tikʼan ja wokoli? Ja it oj jakʼxuk ja bʼa artikuloʼik jakumi.