Ta ja Dyos mi yeʼn smuluk, ¿maʼ xa smul? ¿Jas yuj ay jitsan jel pobreʼe sok wane chamel waʼin? ¿Jas yuj jel ja guerraʼik, ja chamelik sok ja desgrasyaʼik yuja mal tyempoʼik? Ja Biblia wa xcholo oxe rasonik yuja wan wokolanel ja ixuk winiki:

1. Yeʼnxta slekilal, kʼankʼunel stajel sok ilkʼujolanel. «Ja winiki ibʼ kʼabʼal ayuj ja winiki bʼa sjomelal» (Eclesiastés 8:9). Tikʼanxta, ja ixuk winik wa xyiʼaje wokol yuja tuk ixuk winik mulanume bʼa mi snaʼawe syajal ja smoji sok bʼa kechanta wa sleʼa slekilal yeʼnle.

2. Ja tyempo soka jas mi xmajlaxi oj ekʼuki. Ja Biblia wa sjeʼa ja ixuk winik wa xwokolani «yujni ja tyempo soka jas mi xmajlaxi oj ekʼuki wa x-ekʼ sbʼaje spetsanile» (Eclesiastés 9:11). Wa xkʼan yal, bʼobʼta teytik bʼa jun lugar sok bʼa jun ora bʼa mi ti oj ajyukotik sok wa x-ekʼ ja desgrasya, ma jani yuja mi xkaʼa jkwidadotik sok yuja mulanumotiki.

3. Ja mandaranum jel malo bʼa luʼumkʼinali. Ja Biblia wa sjeʼa maʼ smul ja wokol wan ekʼel sbʼaj ja ixuk winiki yajni wa xyala: «Ja maʼ tey ba mundo, ti aye juntiro ja ba scʼab ja diablo» (1 Juan 5:19). Ja Dyablo jun anjel jel ja yipi bʼa mi xbʼobʼ kiltik, bʼa juni lekil anjel ajyi, pe «mi ni nunca huax yala ja smeranili» (Juan 8:44). Pilan anjelik snochowe ja jastal skʼoko abʼal ja Satanás bʼa yajel kʼotuk ja skʼankʼunele sok jachuk paxye pukujik (Génesis 6:1-5). Man skʼokowe abʼal, ja Satanás soka spukujiki ibʼ kʼabʼal ayujile ja luʼumkʼinali sok mi snaʼawe syajal, sok ja bʼa jtyempotiki mas wan ilxel. Ja Dyablo jel tajkel ay sok yeʼnani «huas slola spetzanil ja cristiano ja ba mundoi», ja yuj ja Biblia wa xyala: «¡Jel ajul ja sbaj spetzanil ja maʼ tey ba luumi[!]» (Apocalipsis 12:9, 12). Ja Satanás mini tʼun xnawani syajal, jel malo sok jel skʼulan gusto yiljel ja swokol ja ixuk winiki. Yeʼn smul ja wokolik wan ekʼeli, mi jaʼuk ja Dyosi.

PENSARAʼAN JA IT: Kechan june maʼ jel malo sok mi xnawani syajal wa xbʼobʼ yayi wokol ja ixuk winiki. Pe ja Biblia wa xyala ja «Diosi, jel juntiro ja syajal scʼujoli» (1 Juan 4:8). Ja yuj, ja Dyos mini oj skʼuluk jun jasunuk bʼa mi lekuk ma bʼa mi tojuk (Job 34:10).

Pe bʼobʼta waxa jobʼo abʼaj: «¿Jas ora oj xchʼak ja Dyos ja jastik mi lekuk wan skʼulajel ja Satanás?». Jastalni jpaklaytikta, ja Dyos wa xyilkʼujolan ja malo sok wa syatsʼa sbʼaj ja skʼujoli yajni wa xyila wantik yijel wokol. Cha ja Yabʼali wa stsatsankʼujolanotik bʼa wa xyala: «Ti xa huaahuex can ja ba scʼab ja Diosi porque ja Diosi, huan nix yaahuex sata» (1 Pedro 5:7). Ja Dyos jel juntiro yipi jel syajtayotik, ja yuj, ojxta xchʼak ja wokolik soka jastik mi tojuki, jastal oj kiltik ja bʼa artikulo jakumi. *