YUJA skʼokowe mandar ja bʼajtan jnantatiki, ja yuj aji ekankitik ja mulal soka chamelali, pe ja jasa wa skʼana oj skʼuluk ja Dyos sbʼaja kristyano mini tukbʼeluk. Ja bʼa Yabʼal stsʼijbʼunejkan, ja bʼa Biblia, ja Dyos tikʼanxta wa xyala kabʼtik ja jas wa skʼana oj skʼuluki mini tukbʼeluk.

• «Ja matik toji oj sbʼajuke ja luʼumi, sok ti tiw oj ajyuke sakʼan bʼa tolabida» (Salmo 37:29).

• «Ja yeʼn oj sbʼukʼ koʼe ja chamelali bʼa tolabida, soka Kajwaltik Jyoba oj skus ja yaʼalel sat ja ixuk winiki» (Isaías 25:8).

• «Ja tsaʼanxta kontraʼali, ja chamelali, tʼilan oj ajuk chʼayuk snajel» (1 Corintios 15:26, TNM).

• «Mi xa ni oj to ocʼuque otro vuelta. Mi xa oj to tristeaxuque. [...] Mi ni maʼ oj chamuca» (Apocalipsis [Revelación] 21:4).

¿Jasa oj skʼuluk ja Dyos bʼa oj ‹chʼay el› snajel juntiro ja chamelali? Jastalni kilatikta, ja Biblia wa xyala jaman lek «ja matik toji [...] oj ajyuke sakʼan bʼa tolabida» ja bʼa Luʼumi. Pe chomajkil wa xyala: «Mini ay jun winik toj ja bʼa luʼumi bʼa tolabida wa skʼulan ja bʼa leki sok mi oj koʼ mulal (Eclesiastés 7:20). ¿Wan maʼ stojolan ja jaw ja Dyos oj stukbʼes ja jastik yaʼunejkan kulani? Miyuk, ja Dyos mini oj skʼuluk ja jaw, yujni ‹mi oj sleʼ abʼal› (Tito 1:2, TNM). Anto, ¿jasa oj skʼuluk bʼa oj ya kʼotuk ja jas wa skʼana ajyi sbʼaja kristyano?

Ja yajtanel yiʼoj ja Jyoba jani nikji bʼa oj yaʼ jun koltanel bʼa oj bʼobʼ ya elkotik libre ja bʼa chamelali. Ja bʼa Biblia, jun koltanel jani ja slokʼol wa x-axi yajni ay jas wa xjomxi ma ja jas wa xkʼanji bʼa oj tupxuk ja jas mi lek kʼulaxeli. Ja stsʼakol ja koltanel tʼilan junxta soka jas jomubʼali. Yuja mulanumotik jpetsaniltik sok yuja ya ochkotik moso ja bʼa chamelali, ja Biblia wa xyala jaman lek: «Mini june wa xbʼobʼ skolta ja smoji, sok mini stupjelyi ja Dyosi bʼa skoltajel sbʼaj yeʼna (skoltajel ja sakʼanileʼi jel chaʼan stsʼakol sok mini june wa xbʼobʼ stupe)» (Salmo 49:7, 8).

Yajni jun mulanum wa xchami, kechantani wa xbʼobʼ stup ja smulik. Mini oj bʼobʼ skoltay sbʼaj cha mini ja bʼa smulik ja tuk kristyano (Romanos 6:7). Wani xkʼanatik june maʼ toj sok bʼa mey smul bʼa oj yaʼ ja sakʼanili, mini jaʼuk ja bʼa smuliki, jani ja bʼa jmultiki (Hebreos 10:1-4).

Jani jaw ja jas skʼulan ja Dyos. Ja Yunin, ja Jesús, bʼa ti ajyi bʼa satkʼinal, sjekakon bʼa Luʼum bʼa oj pojkuk jastal jun winik bʼa mey mini jun smul (1 Pedro 2:22). Ja Jesús yala: «Jaquelon ba oj [...] caa ja jvida ba oj huajuc libre jitzan» (Marcos 10:45). Chami bʼa oj xchʼaysnajel ja chamelali sok bʼa oj bʼobʼ ajyukotik sakʼan bʼa tolabida (Juan 3:16).

Ja wego ayotik sakʼan bʼa tyempoʼik jel wokol sok bʼa wokolni oj kuchkujtik, bʼa wa xchiktes jastalni wa xyala ja Biblia, teyotik ja bʼa ‹tsaʼanik kʼakʼu› ja bʼa luʼumkʼinal jel malo (2 Timoteo 3:1). Ja bʼa tsaʼanikxta kʼakʼu bʼa oj «yae cuenta soc ja smulei, ti oj yile ta mi oj ni chʼac chʼay snaajelea» (2 Pedro  3:3, 7). Pe ja matik wa syajtaye ja Dyos oj kanuke sakʼan ja bʼa niwan wokol jaw sok oj staʼe ja «vida ba mi ni nunca oj chʼacuc» (Mateo 25:46).

Chomajkil jitsan miyon kristyanoʼik oj sakʼwuke sok oj bʼobʼ ajyuke sakʼan bʼa tolabida. Ja Jesús wa xbʼobʼ ya sakʼwuk ja matik chamele. Yajni waj ja bʼa chonabʼ Naín, ja syajulal skʼujol nikji bʼa oj ya sakʼwuk ja kechanta skerem jun biguda (Lucas 7:11-15). Ja jekabʼanum Pablo cha yala: «Huax cʼuan [bʼa Dyos] ja maʼ huax chami, tʼilan oj cho sac-huuc, sea lec, ma malo». Ja meran kʼapjelal it juni sjejel ja janekʼto wa syajtay ja Dyos ja kristyano jumasaʼ (Hechos 24:15).

Jitsan mil kristyano oj bʼobʼ ajyuke sakʼan bʼa tolabida. Ja Biblia wa xyala: «Ja matik toji oj sbʼajuke ja luʼumi, sok ti tiw oj ajyuke sakʼan bʼa tolabida» (Salmo 37:29). Anto, oj bʼobʼ yal-e ja junxta yaljelik yala ja jekabʼanum Pablo bʼa ayxa junuk chabʼ mil jabʼil: «Chamelal, ¿bʼaxa ay ja jastik bʼobʼelawuji? Chamelal, ¿bʼaxa ay jawa wip bʼa ixtalanel?» (1 Corintios 15:55, TNM). Ti kʼot ja yoraʼil bʼa oj chʼayjuk snajel ja niwan skontra ja kristyano.