JA Dyos yala yabʼ: «Ja kʼakʼu xa loʼo ojni chamana» (Génesis 2:17). Ta ja Adán oj chamuk ajyi, anto lomni ja mandar ajiyile. Ja Adán wa snaʼa ta mi sloʼo ja sat ja teʼi mini oj chamuk ajyi.

Mi yajnaluk oj sloʼe ajyi ja sat teʼi bʼa oj ajyuke sakʼan ja Adán soka Eva, pes ja bʼa kʼachinubʼ jel ja tuk teʼaltik wa satini (Génesis 2:9). Lekukxta mi sloʼowe ja sat teʼi, ojni sjeʼe kʼuʼabʼal aye soka maʼ ajiyile ja sakʼanileʼi sok oj sjeʼe kechantani ja Dyos ayiʼoj ja derecho bʼa oj aljuk yabʼye ja jas oj skʼuluke ajyi.

Bʼa oj kabʼtik stojol jas yuj cham ja Adán soka Eva, la jpaklaytik jun loʼil bʼa wantikto yiljel ja swokolil man wego. Ja Satanás, jun anjel malo, ya makunuk jun bʼitsʼbʼichan bʼa yaljel jun niwan abʼal. Ja Biblia wa xyala: «Pe ja bʼitsʼbʼichani kechani yeʼn ja mas chʼabʼanxta ajyi ekʼ yuja tuk kʼakʼal chanteʼik bʼa kʼul skʼulunej ja Jyoba Dyos. Anto, yala yabʼ ja ixuki: ‹¿Meran maʼ lek ja Dyos yalunej awabʼyex mi oja loʼex ja tekʼulik tey bʼa kʼachinubʼi?›» (Génesis 3:1).

Ja Eva yala yabʼ: «Wani xbʼobʼ jloʼtikon ja sat ja tekʼulik ja bʼa kʼachinubʼi. Pe ja Dyosi yalunej sbʼaja teʼ tey bʼa snalan ja kʼachinubʼi: ‹Mokni aloʼex ja sati, miyuk, mokni ayam-ex; mikʼa ojni chamanik›». Ti yala ja bʼitsʼbʼichani: «Meran lek, mini oj chamanika. Yujni ja Dyosi snaʼunej ja kʼakʼu xa loʼowex ja tekʼuli, oj jamxuk jawa satexi sok ojni kʼotanik jastal Dyos, snajel ja bʼa leki soka bʼa mi lekuki». Soka yaljelik it, ja Satanás ya chiknajuk ja Jyoba jun tan leʼa abʼal sok wan timwanel bʼa jastik lek (Génesis 3:2-5).

Ja Eva koʼ ja bʼa trampa. Skʼela lek ja teʼi. Jel lek skʼeljel bʼa slojel ja sati... Stima ja skʼabʼi, syama sok kʼe sloʼ. Ja Biblia wa xyala ja jas ekʼi: «Tsaʼan yayi ja statami yajni ti ajyi soki, soka yeʼn cha sloʼoniʼa» (Génesis 3:6).

¡Janekʼto tristeʼaxi ja Dyos yiljel ja yuntikil bʼa jel skʼana stsaʼawe skʼokjel ja smandari! ¿Jastal yila? Ja Jyoba yala yabʼ ja Adán: «Soka stikaw jawa sniʼa sati oja taʼ awaʼel man la kumxi ja bʼa luʼumi, pes yujni ti jakela tiw. Bʼobʼela sok tsʼubʼil luʼum sok cha tsʼubʼil luʼum oj paxan» (Génesis 3:17-19). Sok jachni ekʼa, «anto ja Adán ajyi sakʼan 930 jabʼil, sok tixa chama» (Génesis 5:5). Yajni chami, ja Adán mi ti waj bʼa satkʼinal ma bʼa pilan lugar. Bʼajtanto yuja Jyoba oj skʼuluk bʼa stsʼubʼil luʼum, ja Adán mini ay ajyi, sok yajni chami, cha kumxi bʼa tsʼubʼil luʼum, wa xkʼan kaltik, chʼaysnajel. ¡Jelni triste yabʼjel!

Yuja Adán soka Eva stsaʼawe skʼokjel ja smandar ja Dyos xchʼayawe ja skwerpoʼe bʼa mey yiʼoj mini jun mulal soka bʼobʼel ajyel sakʼan bʼa tolabida. Man tiw tukbʼi ja skwerpoʼe: paxye mulanume. Pe mi kechanta yeʼn ijijanyile wokol yuja jas skʼulane; spetsanil ja yintil jumasaʼ paxye mulanum. Ja Romanos 5:12 wa xyala: «Qʼuelahuil jastal och ja mulal ja ba mundo. Smul ni jun huinic sbiil Adán, jaxa scastigo ja slea ja smuli, cham nia. Jayuj cajcajil huala chamtic porque mi ni maʼ mi huas slea ja smuli».

Ja Biblia wa xyala ja chamelali jach jastal jun kʼuʼuts bʼa wa smusu yibʼanal ja chonabʼiki sok jastal jun jalubʼal kʼuʼuts bʼa wa spotso yibʼanal ja paisik (Isaías 25:7). Ja kʼuʼuts jaw wa smusu ja kristyano jastal jun ason bʼa wa xmilwani sok mi maʼ wa xbʼobʼ eluk. Jachniʼa, «smul ja huala chamtiqui, jaʼ ni ja Adani» (1 Corintios 15:22). Pe ja wego ay jun sjobʼjel, jastalni yala ja jekabʼanum Pablo: «¿Mach ma junuca oj bob scʼulucon librar ja quen ba?». ¿Ay maʼ oj bʼobʼ ya elkotik libre? (Romanos 7:24).