¿Jun maʼ kʼankʼunel mi sbʼejuk? Miyuk. Ja Biblia wa xyala kabʼtik ja Dyosi yaʼakitik ja kʼankʼunel it ja bʼa jkʼujoltiki (Eclesiastés 3:11). Sok cha wa xyala ja «Diosi, jel juntiro ja syajal scʼujoli» (1 Juan 4:8). Snajel ja it, ¿ay maʼ sbʼej ja Dyos oj stojbʼesotik sok jun kʼankʼunel bʼa mi oj kʼot jtatik?

Mini maʼ wa skʼana oj chamuk. Sok ja Biblia wa xyala ja chamelal juni ‹kontraʼal› (1 Corintios 15:26, TNM). Ayni mi x-albʼi ja jsakʼaniltiki, pe ayni wa xcha x-albʼi, pe ojni eljul ja styempoʼil. Jitsan kristyano mi skʼanawe spensarajel ja bʼa chamelal sok ayni wa xiwyeʼa. ¿Oj maʼ kʼotuk ja kʼakʼu oj jkʼultik ganar ja kontraʼal it?

¿Wan maʼ xa naʼa ajyi ja Dyos mi skʼulan ja kristyano bʼa oj chamuke? Ja bʼa libro bʼa Génesis wa sjeʼa ja Dyos wa skʼana ajyi oj ajyukotik sakʼan tolabida ja bʼa Luʼumi. Ja Jyoba * xchapa tsʼikan lek ja Luʼumi. Anto, skʼulan ja bʼajtan winik, ja Adán, sok ti yaʼa bʼa jun kʼachinubʼ bʼa Edén. Ja yuj ja Dyos ti skʼela «spetsanil ja jastik skʼuluneji sok, ¡ilawil!, jelni lek yila juntiroʼa» (Génesis 1:26, 31).

Ja Adán kʼulaji jastal splanta ja Dyos; juni winik mey smul (Deuteronomio 32:4). Ja xcheʼum, sbʼiʼil  Eva, cha mini ay smul ja yeʼn. Ja Jyoba yala yabʼye: «Pojxanik sok aʼaybʼananik, bʼutʼuwik ja luʼumi sok talnayik, aʼajyuk bʼa yibʼ akʼabʼex ja chayik bʼa yoj jaʼi, ja chanteʼik wa xjujpi bʼa satkʼinali sok yibʼanal ja chante jumasaʼ wa xnijki bʼa luʼumi» (Génesis 1:28).

Sbʼutʼjel ja Luʼum soka yuntikil ojni yi tyempo. Bʼa oj kʼotuk ja jas skʼapunej ja Dyosi, ja Eva tʼilan oj ajyuk yuntikil, soka yuntikile ojni ajyuk mas yuntikile man xbʼutʼ yibʼanal ja Luʼumi (Isaías 45:18). Ta ja Adán soka Eva mi oj yil-e oj kʼotuk ja jas skʼapunej ja Dyos sok kechan oj ajyuke sakʼan bʼa oj yil-e ja yuntikile sok cha bʼobʼta ja yiji, ¿ay maʼ sbʼej ja Jyoba oj yayi ja mandar it?

Pensaran ja aʼtel ajiyi bʼa oj ajyuk bʼa yibʼ skʼabʼ ja chanteʼiki. Ja Adán tʼilan oj yayi sbʼiʼil ja chanteʼik, sok ja jaw ojni yi jitsan tyempo (Génesis 2:19). Chomajkil, bʼa snajel jastal stalnajel spetsanil ja jastik sakʼani, tʼilan oj snaʼ sbʼaj lek, sok wani skʼana oj ajyuk sok mas tyempo.

Ja yuj, ja chabʼ mandar ajiyi ja Adán soka Eva yuja Dyosi, ajyel bʼa yibʼ skʼabʼ ja chanteʼiki sok sbʼutʼjel ja Luʼum soka yintili, wa sjeʼa ja Dyos skʼulan ja Adán soka Eva bʼa oj ajyuke sakʼan jitsan tyempo. Ja Adán ajyini sakʼan jitsan jabʼil.

Ja Biblia wa xyala, bʼajtanto oj ekʼuk ja Bʼutʼ Jaʼi, ja kristyano masni wa x-albʼiye sakʼan yuja bʼa jtyempotik. Ja bʼa Génesis 5:5 wa xyala: «Anto ja Adán ajyi sakʼan 930 jabʼil, sok tixa chama». Sok wa staʼa tiʼal bʼa wake winik bʼa ajyiye sakʼan mas ja 900 jabʼil: ja Set, Enós, Quenán, Jared, Matusalén sok Noé, bʼa ayni yiʼoj 600 jabʼil ja Noé yajni jak ja Bʼutʼ Jaʼi (Génesis 5:6-27; 7:6; 9:29). ¿Jas yuj jel albʼi ja sakʼanile?

Yajni pojkiye ja yeʼnle, mito jel ekʼel jitsan tyempo ja koʼele mulal ja Adán soka Eva. Bʼobʼta ja yuj ajyiye sakʼan mas tyempo. Pe ¿jasa ti chʼikan ja mey kiʼojtik mulal soka ajyel sakʼan jitsan tyempo? Sok ¿jastal oj chʼayjuk snajel ja chamelali? Bʼa oj katikyi sjakʼjel ja sjobʼjelik it, bʼajtan tʼilan oj jnatik jas yuj wala awelaxitik sok wala chamtik.