JA Dyosi mini jach wa sgana ajyi ja jsakʼaniltik jastal ja wego. Ja yeʼn wa skʼana ajyi ja Luʼumi oj bʼutʼuk swinkil bʼa oj skis-e ja cholal yiʼoji, bʼa ayawe el slekilal ja srasoniki sok a-sjeʼe ja tsamalik smodo. Wa skʼana aʼajyuke sakʼan jach laman ja kristyano, aʼajyuk spamilyaʼe bʼa gusto oj ajyuk, akʼot snaʼe jastik bʼa ajkʼach sok bʼa ayawe paxuk ja Luʼum jun tsamal lugar.

• «Ja Yeʼn wan yajel kʼot tikʼan ja kʼakʼaneli [ma guerraʼik] bʼa yibʼanal ja luʼumi» (Salmo 46:9).

• «Cʼot ja cʼacʼu oja chʼay ele ja maʼ mero huas somo [...] ja luumi» (Apocalipsis [Revelación] 11:18).

• «Mini jun swinkil oj yale: ‹Maloʼayon›» (Isaías 33:24).

• Ja «yaʼtele oj skʼuluke soka skʼabʼe ja matik jtsaʼuneji ojni yabʼye stsamalil lek» (Isaías 65:22).

¿Jastal oj chʼak kʼot smeranil ja jastik junuk it bʼa alubʼalxakan bʼajtanto? Ja Dyos stʼojunej ja Yunin, ja Jesús, jastal Mandaranum bʼa jun gobyerno jel toj bʼa oj ya mandar ja bʼa Luʼum sok ti oj yakon mandar man satkʼinal. Ja Biblia wa xya sbʼiʼiluk sGobyerno Dyos (Daniel 2:44). Wa xcha yala sbʼaja Jesús: «Ja Dyosi oj yayi ja skujlayubʼi [...]. Ja smandaraneli mini oj chʼakuk» (Lucas 1:32, 33,  TNM).

Ja Jesús skʼulan jitsan milagro ja yajni ti ajyi bʼa Luʼumi. Jachuk sjeʼa, ja yajni xkʼe ya mandari, ja kristyano oj ajyuk jun sakʼanil bʼa mas lek.

• Yajnay chikan jas tikʼe chamel, jachuk sjeʼa ojni bʼobʼ xchʼaysnajel juntiro (Mateo 9:35).

• Ya lamxuk jun tsatsal ikʼ jaʼ, jachuk sjeʼa ibʼ kʼabʼal ayuj (Marcos 4:36-39).

• Yayi swaʼel jitsan kristyano, jachuk sjeʼa jaman lek wa xbʼobʼ yakitik ja jas wa xmakunikujtik (Marcos 6:41-44).

• Ya pax vino ja jaʼi bʼa jun nupanel, jachuk sjeʼa ojni kabʼtik stsamalil ja bʼa smandaraneli (Juan 2:7-11).

¿Jasa tʼilan oja kʼuluk ja weʼn bʼa oja wabʼ stsamalil ja jastik xchapunej ja Dyos sbʼaja matik wa xyajtajiyuji? Ay jun «bʼej» bʼa tʼilan oja noche. Ja Biblia wa xyala juni «bʼej wa x-ikʼwani och bʼa sakʼanil», sok jel tʼusan ja matik oj staʼi (Mateo 7:14, TNM).

¿Jas wa stojolan ja bʼej wa x-ikʼwani och ja bʼa sakʼanil bʼa tolabida? Ja bʼej jaw wa stojolan yibʼanal ja jas wa skʼanakitik ja Dyos. Ja yeʼn wa xyala: «Keʼnon ja Jyoba wa Dyosi, ja Maʼ wa sjeʼawi bʼa wa lekilal weʼna, ja Maʼ wa sjeʼawi ja bʼej bʼa tʼilan oj bʼejyani» (Isaías 48:17). Bʼejyel ja bʼa bʼej iti jani ja modoʼal mas lek ajyel sakʼani.

 Ja Jesús yala: «Ke‘nani ja bʼejoni ke‘nani ja smeraniloni ke‘nani ja sakʼaniloni» (Juan 14:6, Ja yajkʼachil sju‘unil ja dyosi). Skʼuʼajel ja jastik sjeʼa ja Jesús sok snochjel ja jasa skʼulani wa xya mojxukotik soka Dyos sok mas lek wa xya ajyuk ja jsakʼaniltik.

¿Jastal oj bʼobʼa taʼ ja bʼej jaw? Anima ay jitsan relijyonik ma bʼejik, ja Jesús yala ja it: «Ja maʼ tola vida huax yala: -Cajual, Cajual [...], ¿yuj ama yuj tola vida huax yala jachuqui ti xa ay soc ja smandar ja maʼ tey ba satqʼuinal ba? Quechan ja maʼ huas scʼulan ja jas huax yala ja jTat tey ba satqʼuinali, oj ni ochuque ja tihui» (Mateo 7:21). Cha yala ojni naxuk sbʼaj «yuj ja yatele» ma yuja sat wa xyaʼa (Mateo 7:16). Ja Biblia oj bʼobʼ skoltaya bʼa snajel ja relijyon smeranili (Juan 17:17).

¿Jas oja kʼuluk bʼa oj ajyan ja bʼa bʼej jaw? Jani snajel sbʼaj ja maʼ yaʼunej ja jsakʼaniltiki. Snajel machʼa, jas sbʼiʼil, jastal ja yeʼn, jas wan skʼulajel sok jas wa smajlay oj jkʼuluktik. *

Ja Dyosi mi skʼana ja kristyano kechanta aʼatijuk, awaʼuk, aya ekʼ gusto sok aʼajyuk spamilya. Wa skʼana la jnatik sbʼaj sok la kamigoʼuktik. Yajni wa xkʼuʼantikyi, wa xjeʼatik wa xyajtaytik. Ja Jesús yala: «Ja it wa stojolan sakʼanil bʼa tolabida, ja oj najukabʼaj ja weʼn, ja kechanta Dyos smeranili» (Juan 17:3, TNM).

Bʼa yajel gustoʼaxuk ja kechanta Dyos smeranili, bʼobʼta ja weʼn tʼilan ay jas oja wakani. Bʼobʼta wokol oja wile, pe bʼejyel ja bʼa bʼej jawi wani xbʼobʼ kʼotuk jun tsamal viaje, kechan tʼilan oja wayi ja bʼajtan xete. Ta aya wiʼoj jun sjobʼjel sbʼaja Dyos, kʼana jun estudio bʼa Biblia ja bʼa jsitiotikon bʼa Internet bʼa www.pr418.com/toj. Ja taʼumantiʼik bʼa Jyoba jelni jgustotikon oj kulatayatikon ja bʼa ora soka lugar mas lek xa wila.